ສຽງເນືອງນັນເກີນກຳນົດເປັນປາກົດການຫຍໍ້ທໍ້ໜຶ່ງທີ່ເປັນບັນຫາຊໍາເຮືອມາຍາວນານ

ເວົ້າເລື່ອງສຽງ ມີທັງສຽງຈາກເຄື່ອງຈັກກົນໄກ, ພາຫະນະຮັບໃຊ້ທົ່ວໄປ ທີ່ມີເຄື່ອງຈັກ ລວມທັງສຽງຈາກເຄື່ອງຂະຫຍາຍສຽງ ແລະ ສຽງສັດລ້ຽງ ທີ່ອາດຈະກະທົບຕໍ່ການດໍາລົງຊີວິດປະຈໍາວັນຂອງບຸກຄົນ, ກຸ່ມຄົນໃນຍາມປົກກະຕິ ຫລື ເກີດຂຶ້ນບາງເທື່ອບາງຍາມທີ່ລົບກວນເວລາຫລັບນອນ. ໃນບົດນີ້ຂໍຍົກປະເດັນບັນຫາສຽງເນືອງນັນຈາກສະຖານທີ່ບໍລິການທີ່ຕິດຕັ້ງເຄື່ອງຂະຫຍາຍສຽງສ້າງຄວາມມ່ວນຊື່ນ, ການຕັ້ງວົງຊຸມແຊວການກຳນົດເວລາ ແລະ ອື່ນໆ ຊຶ່ງຜ່ານມາກໍຄືປັດຈຸບັນ ກາຍເປັນບັນຫາໃຫ້ໄດ້ຖົກຖຽງ ຈົ່ມວ່າກັນເປັນໄລຍະ.

ຜ່ານມານະຄອນຫລວງວຽງຈັນ ໄດ້ອອກລະບຽບການຄວບຄຸມສຽງເນືອງນັນປະເພດຕ່າງໆທີ່ອາດຈະເປັນປາກົດການຫຍໍ້ທໍ້ທາງສັງຄົມ ຊຶ່ງການມີລະບຽບການຄວບຄຸມສຽງເນືອງນັນແມ່ນຄວາມຮຽກຮ້ອງຕ້ອງການໃນໄລຍະໃໝ່ ຊຶ່ງທຸກປະເທດຕ່າງກໍມີ ເພື່ອດັດປັບສາຍພົວພັນສັງຄົມ. ສຽງຖ້າບໍ່ເນືອງນັນຖືວ່າບໍ່ມີບັນຫາ ໝາຍວ່າໃຫ້ຢູ່ໃນຄວາມພໍດີການຮັບຂອງຫູຄົນເຮົາ ຊຶ່ງຄວາມພໍດີໃນການຮັບສຽງຂອງແຕ່ລະຄົນອາດຈະແຕກຕ່າງກັນ. ບັນຫາທີ່ມັກຕັ້ງຂຶ້ນໃນບ່ອນທີ່ມີບ້ານເຮືອນຕັ້ງຢູ່ແໜ້ນໜາກໍຄືຕົວເມືອງໃຫຍ່ທີ່ໃກ້ສະຖານທີ່ບໍລິການຄືການເປີດເຄື່ອງຂະຫຍາຍສຽງດັງແຮງເປັນປະຈໍາ ໂດຍສະເພາະເຂດທີ່ມີຫລາຍຮ້ານບໍລິການທີ່ເປີດແຂ່ງກັນປານປາງບຸນໃຫຍ່…ແນ່ນອນມັນກະທົບໂດຍກົງໃນເວລາພັກຜ່ອນ ຫລັບນອນຍາມຄໍ່າຄືນ ຊຶ່ງການຈະແກ້ໄຂບັນຫານີ້ຂາດຕົວໄດ້ ທັງຜູ້ປະກອບການ, ຜູ້ໃຫ້ບໍລິການ… ແລະ ຜູ້ອາໄສໃກ້ຄຽງ ຕ້ອງຈູນແນວຄິດເຂົ້າຫາກັນ ເນື່ອງຈາກທຸກບັນຫາລ້ວນມີທາງອອກສະເໝີ, ຈະຊ້າ ຫລື ໄວ ຂຶ້ນກັບບັນດາປັດໄຈ ແລະ ສະພາບເງື່ອນໄຂຕົວຈິງ.

 ກິດຈະກໍາມ່ວນຊື່ນທີ່ຜູ້ປະກອບການຮ້ານບັນເທີງ, ຮ້ານຄາຣາໂອເກະ ແລະ ຮ້ານກິນດື່ມທຸກປະເພດ ບໍ່ ຄວນລະເຫລີງ ຫລື ຝ່າຝືນຄໍາສັ່ງສະບັບເລກທີ 03/ຈນວ, ລົງວັນທີ 16 ມີນາ2022 ວ່າດ້ວຍການຫ້າມເປີດເຄື່ອງຂະຫຍາຍສຽງດົນຕີ ແລະ ເສບດົນຕີ ສົ່ງສຽງເນືອງນັນລົບກວນຄົນໃນຄອບຄົວ ແລະ ເຮືອນຂ້າງຄຽງ. ແນວໃດກໍດີເມື່ອບໍ່ດົນມານີ້, ກອງ ບກ ໜັງສືພິມລາວພັດທະນາ ໄດ້ຮັບການສ່ອງແສງຈາກປະຊາຊົນທີ່ອາໄສຢູ່ໃກ້ຮ້ານບັນເທີງໜຶ່ງໃນນະຄອນຫລວງວຽງຈັນວ່າ: ແຕ່ລະຄືນເປີດສຽງເນືອງນັນດັງແຮງ ລົບກວນຕໍ່ການພັກຜ່ອນຫລັບນອນເປັນທີ່ສຸດ. ຂະນະທີ່ຜ່ານມາເຈົ້າໜ້າທີ່ກ່ຽວຂ້ອງໄດ້ຕັກເຕືອນ ແລ້ວ ແຕ່ກໍຍັງຝ່າຝືນຢູ່.

ແເຖິງແມ່ນວ່າລະບຽບການກຳນົດອອກມາເຂັ້ມງວດແລ້ວກໍຕາມ ແຕ່ກໍຍັງ ສັງເກດເຫັນວ່າບັນຫາຕ່າງໆເຫລົ່ານັ້ນບໍ່ໄດ້ຫາຍໄປຈາກສັງຄົມເມືອງ ເປັນຫຍັງຈຶ່ງເກີດບັນຫານີ້? ຍ້ອນຜູ້ປະກອບການບໍ່ປະຕິບັດຄຳສັ່ງສະບັບນີ້ຢ່າງແທ້ຈິງ ແລະ ເຈົ້າໜ້າທີ່ລັດເອງບໍ່ເປັນເຈົ້າການປະຕິບັດ ຫລື ບໍ່? ເນື່ອງຈາກໃນຂໍ້ (ຄ) ຂອງມາດຕະການຕໍ່ຜູ້ລະເມີດໄດ້ກຳນົດແຈ້ງວ່າ: ໃນກໍລະນີເຈົ້າໜ້າທີ່ກ່ຽວຂ້ອງ ເມີນເສີຍ ຫລື ປະລະໜ້າທີ່ ບໍ່ບັງຄັບປະຕິ ບັດມາດຕະການໄວຕາມການໂທແຈ້ງເຂົ້າມາຂອງພົນລະເມືອງ ຫລື ຄອບຄົວທີ່ໄດ້ຮັບຜົນກະທົບຈາກມົນລະພິດທາງສຽງນັ້ນຈະຖືກພິຈາລະນາລົງວິໄນ ຫລື ດຳເນີນຄະດີປົກຄອງຕາມແຕ່ກໍລະນີເບົາ ຫລືໜັກ.

ສະຫລຸບບໍ່ວ່າໃນຍາມບຸນທີ່ຕ້ອງມ່ວນຊື່ນ ຫລື ຍາມບໍລິການປົກກະຕິ, ການບໍ່ສ້າງສຽງເນືອງນັນ ດັງແຮງ ເກີນຄວາມພໍດີໃນການຮັບສຽງຂອງແຕ່ລະຄົນ ເປັນສິ່ງສໍາຄັນໜຶ່ງສຳລັບການຢູ່ຮ່ວມກັນຢ່າງມີຄວາມສຸກຄືມີແຕ່ສຽງພໍດີພໍມ່ວນ ບໍ່ລົບກວນ ຫລື ລັກໄລ່ ຄົນໃກ້ຄຽງ ດີທີ່ສຸດແລ.