ປີເກົ່າຜ່ານພົ້ນໄປ ຜົນງານເພິ່ງພໍໃຈຫລາຍ ປີໃໝ່ມາຂໍໃຫ້ເປັນປີເງິນປີທອງຂອງທຸກໆຄົນ
ປີເກົ່າ 2022 ໄດ້ຜ່ານພົ້ນໄປ ປີໃໝ່ສາກົນ 2023 ໄດ້ໝູນວຽນມາບັນຈົບຄົບຮອບທົດແທນປີເກົ່າຕາມກົດເກນວັດຕະຈັກຂອງໂລກ. ໃນປີເກົ່າ ຫລືວ່າ ປີ ພສ 2022 ຜ່ານມາ, ສປປ ລາວ ຂອງພວກເຮົາຍັງຄົງເດີນໜ້າໃນການສ້າງສາພັດທະນາປະເທດຊາດພາຍໃຕ້ການນຳພາຂອງພັກ ແລະ ລັດຖະບານບົນເສັ້ນທາງແຫ່ງຄວາມມຸ່ງຫວັງຂອງຊາດ ແລະ ປະຊາຊົນລາວບັນດາເຜົ່າຢ່າງຮອບດ້ານ ໂດຍສະເພາະການຈັດຕັ້ງຜັນຂະຫຍາຍມະຕິຄັ້ງທີ IX ຂອງພັກໃຫ້ຫັນເຂົ້າສູ່ລວງເລິກ ແລະ ປາກົດຜົນເປັນຈິງ.
ຕະຫລອດໄລຍະໜຶ່ງປີຜ່ານມາ ໄດ້ມີຫລາຍສິ່ງຫລາຍຢ່າງທີ່ເກີດຂຶ້ນ ແລະ ມີການປ່ຽນແປງພັດທະນາບົນຜືນແຜ່ນດິນລາວ ແລະ ກ້າວໄປຢ່າງບໍ່ຢຸດຢັ້ງ ເຊິ່ງທັງໝົດກໍມີທັງອັນຕັ້ງໜ້າ ແລະ ຫຍໍ້ທໍ້, ແຕ່ອັນທີ່ພົ້ນເດັ່ນທີ່ສຸດ ຜູ້ຂຽນຂໍຍົກເອົາພຽງ 2 ເຫດການມາເປັນຕົວວັດຄື:
ອັນທີໜຶ່ງ ແມ່ນຜົນສໍາເລັດໂຄງການສ້າງທາງລົດໄຟ ລາວ-ຈີນ ເຊິ່ງໄດ້ຮັບໃຊ້ບໍລິການຂົນສົ່ງໂດຍສານ ແລະ ຂົນສົ່ງສິນຄ້າມາເປັນເວລາ 1 ປີເຕັມ (31/12/2021-31/12/2022) ອັນເປັນການປົດລັອກຢ່າງຊິ້ນເຊີງ ເພື່ອນໍາເອົາປະເທດຊາດກາຍເປັນປະເທດເຊື່ອມຈອດ ແລະ ເຊື່ອມໂຍງຢ່າງເຕັມຕົວ ເຊິ່ງໃນປະຫວັດສາດຫລາຍຮ້ອຍປີພັນປີຜ່ານມາ ປະເທດລາວບໍ່ເຄີຍມີທາງອອກສູ່ທະເລ ເພື່ອໄປມາຄ້າຂາຍກັບພາຍນອກຄືຍຸກນີ້ ມາໃນປັດຈຸບັນ ນະຄອນຫລວງວຽງຈັນ ສປປ ລາວ ໄດ້ກາຍເປັນສູນກາງຂົນສົ່ງສິນຄ້າອີກແຫ່ງໜຶ່ງຂອງພາກພື້ນ ແລະ ສາມາດເຊື່ອມໂຍງໄປທົ່ວໂລກ.
ອັນທີສອງ ແມ່ນພາຍຫລັງປະເທດຊາດໄດ້ເປີດປະເທດຫລັງການແພ່ລະບາດຂອງພະຍາດໂຄວິດ-19 ນັບແຕ່ເດືອນພຶດສະພາ 2022 ເປັນຕົ້ນມາ ໄດ້ເຮັດໃຫ້ບັນຍາກາດການທ່ອງທ່ຽວຄຶກຄັກ, ນັກທ່ອງທ່ຽວພາກັນຫລັ່ງໄຫລເຂົ້າມາທ່ຽວລາວຢ່າງຫລວງຫລາຍ, ໃນນີ້ຫລາຍກວ່າໝູ່ແມ່ນນັກທ່ອງທ່ຽວຈາກປະເທດໄທ. ນອກຈາກທີ່ກ່າວມານີ້ ກໍຍັງມີຫລາຍຂົງເຂດໄດ້ມີບັນຍາກາດໃໝ່ໃນການບຸກທະລຸສ້າງສາພັດທະນາ ເປັນຕົ້ນບັນຫາການຄ້າ, ການລົງທຶນ, ການສົ່ງອອກ-ນຳເຂົ້າສິນຄ້າ, ໂຄງການພັດທະນາເສດຖະກິດພິເສດ-ເສດຖະກິດສະເພາະ ຕະຫລອດໂຄງການກໍ່ສ້າງພື້ນຖານໂຄງລ່າງ, ຖະໜົນຫົນທາງກໍພວມດຳເນີນໄປຢ່າງຕັ້ງໜ້າເຄັ່ງຮ້ອນ.
ສະເພາະທາງດ້ານວັດທະນະທໍາ-ສັງຄົມ ເຫດການຫລ້າສຸດແມ່ນຫາກໍສໍາເລັດການຈັດງານມະຫະກຳກິລາແຫ່ງຊາດຄັ້ງທີ XI ໂດຍແມ່ນແຂວງຊຽງຂວາງເປັນເຈົ້າພາບ. ນີ້ເປັນພຽງຍົກເອົາສະພາບບັນຍາກາດແຫ່ງຜົນສຳເລັດບາງປະເດັນໃນປີ 2022 ມາເລົ່າສູ່ກັນຟັງ.
ແຕ່ແນວໃດກໍດີ, ໃນປີ 2022 ຜ່ານມານັ້ນ ປະເທດຊາດ ແລະ ປະຊາຊົນເຮົາກໍຍັງປະສົບບັນຫາວິກິດບາງຢ່າງທີ່ມີຜົນກະທົບຢ່າງໜັກໜ່ວງສົມຄວນໃຫ້ແກ່ການດຳລົງຊີວິດ ເປັນຕົ້ນບັນຫາເງິນກີບອ່ອນຄ່າຢ່າງໜັກ ອັນເປັນຕົ້ນເຫດໃຫ້ລາຄາສິນຄ້າທຸກປະເພດໃນທ້ອງຕະຫລາດຖີບຕົວສູງຂຶ້ນເປັນສອງສາມທົບ. ອັນທີ່ມີຜົນກະທົບແຮງທີ່ສຸດກໍແມ່ນບັນຫານ້ຳມັນຈາກລາຄາສະເລ່ຍ 7.000-8.000 ກີບຂຶ້ນມາເປັນ 19.000-20.000 ກີບຕໍ່ລິດ ແລະ ປະເພດສິນຄ້າຊະນິດອື່ນໆກໍທະຍອຍກັນຂຶ້ນແລ້ວບໍ່ຍອມລົງ.
ກໍຫວັງຢ່າງຍິ່ງວ່າ ໃນປີ 2023 ສະພາບເງິນເຟີ້ກໍຈະຫວນມາແຂງຄ່າຂຶ້ນ, ລາຄາຊີ້ນປາອາຫານກໍຈະຖືກລົງກວ່າເກົ່າ, ການຄ້າການຂາຍກໍຈະລາບລື່ນ, ບັນຫາຢາເສບຕິດກໍຂໍໃຫ້ຫລຸດໜ້ອຍຖອຍລົງ. ພິເສດ ພວກສໍ້ລາດບັງຫລວງທັງຫລາຍກໍຂໍໃຫ້ເອວັງລາລັບກັບຫາຍໄປຈາກສັງຄົມລາວໂດຍໄວ. ການເງິນການງານໃນປີ 2023 ຂໍໃຫ້ຫວນກັບມາດີຂຶ້ນຕາມຄວາມມຸ້ງໝັ້ນຂອງຊາດ ແລະ ປະຊາຊົນລາວ. ປີ 2023 ຈົ່ງກາຍເປັນປີເງິນປີທອງຂອງລາວເຮົາດັ່ງສົມໃຈຫວັງ.
