ປີ 2022 ທົ່ວປະເທດມີນັກໂທດຜູ້ຖືກຫາ ແລະ ຖືກດັດສ້າງ 35.000 ກວ່າຄົນ ແລະ ໄດ້ຮັບອະໄພຍະໂທດເກືອບ 2.000 ຄົນ

ກົມຕໍາຫລວດຄຸມຂັງ-ດັດສ້າງ ກະຊວງປ້ອງກັນຄວາມສະຫງົບ ໄດ້ສະຫລຸບການເຄື່ອນໄຫວວຽກງານຄຸມຂັງ-ດັດສ້າງປະຈໍາປີ 2022 ແລະ ທິດທາງວຽກງານຈຸດສຸມ ປີ 2023 ຈັດຂຶ້ນໃນວັນທີ 30 ທັນວາ 2022, ໂດຍການເປັນປະທານຂອງ ທ່ານ ພົຈວ ສົມລິດ ດາວຮຸ່ງສຸລິ ຫົວໜ້າກົມຕໍາຫລວດຄຸມຂັງ-ດັດສ້າງ ມີຕາງໜ້າກົມໃຫຍ່ຄະນະບັນຊາຄ້າຍຄຸມຂັງ-ດັດສ້າງ, ນາຍ ແລະ ພົນຕໍາຫລວດ ເຂົ້າຮ່ວມ.

ທ່ານ ພັອ ໄຊຍະວົງ ແກ້ວສຸລິວົງ ຮອງກົມຕໍາຫລວດຄຸມຂັງ-ດັດສ້າງ ໄດ້ຜ່ານບົດສະຫລຸບການເຄື່ອນໄຫວວຽກງານຄຸມຂັງ-ດັດສ້າງ ປີ 2022 ແລະ ທິດທາງວຽກງານຈຸດສຸມ ປີ 2023 ວ່າ: ໃນໄລຍະຜ່ານມາຄະນະກົມຄ້າຍຄຸມຂັງ-ດັດສ້າງທຸກຂັ້ນໄດ້ເອົາໃຈໃສ່ຊີ້ນຳຢ່າງຈົດຈໍ່ໂດຍສະເພາະການສຶກສາອົບຮົມການເມືອງ-ແນວຄິດ, ພັດທະນາພື້ນຖານການຜະລິດເພື່ອແກ້ໄຂຊີວິດການເປັນຢູ່ໃຫ້ນັກໂທດ, ຜູ້ຕ້ອງຫາ ແລະ ຜູ້ຖືກດັດສ້າງຢູ່ບັນດາຄ້າຍຄຸມຂັງປະຈຳພາກໃຫ້ມີຄວາມສະຫງົບ-ປອດໄພໂດຍພື້ນຖານ.

ປັດຈຸບັນນັກໂທດຜູ້ຖືກຫາ ແລະ ຜູ້ຖືກດັດສ້າງທົ່ວປະເທດມີ 35.113 ຄົນ ຍິງ 3.458 ຄົນ ທຽບໃສ່ປີ 2021 ເພີ່ມຂຶ້ນ 1.526 ຄົນ ຍິງ 153 ຄົນ. ໃນນີ້, ນັກໂທດພາຍໃນ 18.859 ຄົນ ຍິງ 2.009 ຄົນ, ຜູ້ຖືກຫາ 10.493 ຄົນ ຍິງ 1.256 ຄົນ, ຜູ້ຖືກດັດສ້າງ 4.951 ຄົນ ຍິງ 119 ຄົນ, ນັກໂທດຕ່າງປະເທດ 426 ຄົນ ຍິງ 40 ຄົນ, ຜູ້ຖືກຫາ 384 ຄົນ ຍິງ 34 ຄົນ, ສະເພາະຢູ່ບັນດາຄ້າຍຄຸມຂັງປະຈຳພາກທີ່ຂຶ້ນກັບກົມຕຳຫລວດຄຸມຂັງ-ດັດສ້າງ ມີ 16.052 ຄົນ ຍິງ 1.476 ຄົນ. ໃນນີ້ມີນັກໂທດພາຍໃນ 12.764 ຄົນ ຍິງ 1.300 ຄົນ, ຜູ້ຖືກຫາ 490 ຄົນ ຍິງ 58 ຄົນ, ຜູ້ຖືກດັດສ້າງ 2.261 ຄົນ ຍິງ 53 ຄົນ, ນັກໂທດຕ່າງປະເທດ 394 ຄົນ ຍິງ 37 ຄົນ, ຜູ້ຖືກຫາ 143 ຄົນ ຍິງ 29 ຄົນ, ໄດ້ຮັບນະໂຍບາຍການອະໄພຍະໂທດ-ຜ່ອນໂທດ ປະຈຳປີ 1.992 ຄົນ ຍິງ 280 ຄົນ ຄົນຕ່າງປະເທດ 25 ຄົນ ຍິງ 5 ຄົນ ອະໄພຍະໂທດຫລຸດຜ່ອນໂທດປະຫານຊີວິດເປັນໂທດຕະຫລອດຊິວິດ 25 ຄົນ ຍິງ 4 ຄົນ. ໃນນີ້ ຄົນຕ່າງປະເທດ 2 ຄົນ.