ໂຣນັລໂດ ເປີດໃຈຄັ້ງທຳອິດ ໄດ້ທຸກຢ່າງໃນຢູໂຣບແລ້ວ ຫລັງຍ້າຍໄປ ອັລ ນາສເຊີ

ໂຣນັລໂດ ຫາກໍຍ້າຍເປັນນັກເຕະບໍ່ມີສັງກັດກ່ອນການແຂ່ງຂັນບານໂລກ 2022 ທີ່ກາຕ້າ ຫລັງຈາກຕົກລົງທີ່ຈະຍົກເລີກສັນຍາກັບ ແມນເຊສເຕີ ຢູໄນເຕັດ ໃນພຣີເມຍລີກ ອັງກິດ.

ກ່ອນທີ່ລາວຈະເຊັນສັນຍາກັບ ອັລ ນາສເຊີ ສະໂມສອນໃນລີກຊາອຸດິອາຣະເບຍ ເຖິງປີ 2025 ພ້ອມຄ່າເມື່ອຍສະຖິຕິໂລກ ແລະ ຫລ້າສຸດລາວໄດ້ຮ່ວມການ ຖະແຫລງຂ່າວກັບສະໂມສອນໃຫມ່ໃນຕາເວັນອອກາງເປັນຄັ້ງທຳອິດແລ້ວ.

ໂດຍກອງໜ້າອາຍຸ 37 ປີກ່າວວ່າ : “ ໃນຢູໂຣບ ວຽກຂອງຂ້ອຍມັນສຳເລັດແລ້ວ ຂ້ອຍຊະນະທຸກຢ່າງ ຂ້ອຍໄດ້ຫລິ້ນກັບເກືອບທຸກສະໂມສອນໃຫຍ່ໃນຢູໂຣບ ແລະ ຕອນນີ້ມັນເປັນຄວາມທ້າທາຍຄັ້ງໃຫມ່ໃນເອເຊຍ ”.

“  ຄົງບໍ່ມີໃຜຮູ້ ແຕ່ຂ້ອຍສາມາດເວົ້າໄດ້ວ່າ ຂ້ອຍໄດ້ຮັບຂໍ້ສະເໜີຫລາຍຢູໂຣບ, ຫລາຍສະໂມສອນບຣາຊິລ, ອອສເຕຣເລຍ, ສະຫະລັດອາເມລິກາ ລວມເຖິງໂປຣຕຸເກສ ຫລາຍສະໂມສອນພະຍາຍາມເຊັນສັນຍາກັບຂ້ອຍ ”.

“ ແຕ່ຂ້ອຍໄດ້ໃຫ້ຄຳຫມັ້ນສັນຍາກັບສະໂມສອນແຫ່ງນີ້ສຳລັບໂອກາດທີ່ຈະພັດທະນາບານເຕະ ແລະ ສ່ວນທີ່ໜ້າປະທັບໃຈທັງຫມົດຂອງປະເທດນີ້ ”.