ແຂວງບໍລິຄໍາໄຊ ມີອຸບັດຕິເຫດເກີດຂຶ້ນ 14 ຄັ້ງ ໃນໄລຍະ 5 ວັນ ສົ່ງທ້າຍປີເກົ່າ 2022 ຕ້ອນຮັບປີໃໝ່ 2023
ເຈົ້າໜ້າທີ່ພະແນກຕໍາຫລວດຈະລາຈອນ ປກສ ແຂວງບໍລິຄໍາໄຊ ໄດ້ໃຫ້ຮູ້ວ່າ: ໃນໄລຍະ 5 ວັນ ແຕ່ວັນທີ 29 ທັນວາ 2022 ຫາ ວັນທີ 2 ມັງກອນ 2023, ເຊິ່ງເປັນໄລຍະສະເຫລີມສະຫລອງສົ່ງທ້າຍປີເກົ່າ ຄສ 2022 ຕ້ອນຮັບປີໃໝ່ສາກົນ ຄສ 2023 ທົ່ວແຂວງ ບໍລິຄໍາໄຊ ມີອຸບັດຕິເຫດເກີດຂຶ້ນ 14 ຄັ້ງ, ມີພາຫະນະເປ່ເພທັງໝົດ 26 ຄັນ. ໃນນີ້, ເປ່ເພເລັກໜ້ອຍ 17 ຄັນ, ເປ່ເພສົມຄວນ 9 ຄັນ, ບາດເຈັບເລັກໜ້ອຍ 19 ຄົນ, ບາດເຈັບສົມຄວນ 6 ຄົນ, ສົມທຽບໃສ່ປີຜ່ານມາເຫັນວ່າເກີດຂຶ້ນ 14 ຄັ້ງເທົ່າກັນ ແລະ ຜູ້ເສຍຊີວິດຫລຸດລົງ 2 ຄົນ.
ເຈົ້າໜ້າທີ່ຕໍາຫລວດຈະລາຈອນ ປກສ ແຂວງ ໃຫ້ຮູ້ຕື່ມວ່າ: ອຸບັດຕິເຫດທີ່ເກີດຂຶ້ນມີຢູ່ເມືອງບໍລິຄັນ 5 ຄັ້ງ, ເມືອງຄໍາເກີດ 3 ຄັ້ງ, ເມືອງວຽງທອງ 3 ຄັ້ງ, ເມືອງ ປາກຊັນ, ທ່າພະບາດ, ປາກກະດິງ ເກີດຂຶ້ນເມືອງລະ 1 ຄັ້ງ. ສ່ວນສາເຫດທີ່ພາໃຫ້ເກີດຍ້ອນການເມົາແລ້ວຂັບຂີ່ພາຫະນະ, ໃຊ້ຄວາມໄວເກີນກໍານົດ, ແຊງບໍ່ຮັບປະກັນ, ປ່ຽນທິດທາງເດີນ, ໃຊ້ຄວາມໄວບໍ່ຮັກສາໄລຍະຫ່າງ, ບໍ່ປ່ອຍສິດ, ສັນຈອນບໍ່ຖືກທິດທາງ.
