ເຈົ້າໜ້າທີ່ສາທາລະນະສຸກຈີນເຕືອນ ກຸດຈີນນີ້ໂຄວິດອາດແພ່ລະບາດທົ່ວປະເທດ ໂດຍສະເພາະຊົນນະບົດທີ່ຂາດເຂີນເຄື່ອງມືປິ່ນປົວ
ວັນທີ 2 ມັງກອນ, ສໍານັກຂ່າວຕ່າງປະເທດລາຍງານວ່າ: ເຈົ້າໜ້າທີ່ສາທາລະນະສຸກລະດັບສູງຂອງຈີນປະກາດເຕືອນວ່າ: ໃນໄລຍະເທດສະການກຸດຈີນທີ່ຈະມາເຖິງນີ້ ພະຍາດໂຄວິດອາດແພ່ລະບາດໄປທົ່ວປະເທດ ໂດຍສະເພາະພື້ນທີ່ຊົນນະບົດທີ່ຂາດເຂີນເຄື່ອງມືປິ່ນປົວພະຍາດ ຈົນອາດເຮັດໃຫ້ສະຖານະການການແພ່ລະບາດຂອງໂຄວິດໃນຈີນຮຸນແຮງຂຶ້ນໄປອີກ.
ຈີນກໍາລັງຜະເຊີນການແພ່ລະບາດຂອງໂຄວິດຄັ້ງໃຫຍ່ ນັບແຕ່ເດືອນພະຈິກຜ່ານມາ ກ່ອນທາງການຈີນຈະຕັດສິນໃຈປ່ຽນແປງນະໂຍບາຍເຂັ້ມງວດເພື່ອຮັບມືໂຄວິດທີ່ໃຊ້ມາເກືອບ 3 ປີ ຄືນະໂຍບາຍໂຄວິດເປັນສູນ (Zero-COVID) ມາເປັນການປັບຕົວ ແລະ ດໍາລົງຊີວິດຢູ່ທ່າມກາງພະຍາດລະບາດ ຫລັງປະສົບບັນຫາເສດຖະກິດຫລຸດຖອຍ ແລະ ເກີດກະແສຕໍ່ຕ້ານລັດຖະບານຈີນທີ່ໃຊ້ມາດຕະການຮັບມືໂຄວິດທີ່ເຂັ້ມງວດຫລາຍເກີນໄປ ເປັນເຫດໃຫ້ໃນບາງພື້ນທີ່ຊຸມນຸມຮຽກຮ້ອງໃຫ້ປະທານປະເທດ ສີຈິ້ນຜິງ ລົງຈາກຕຳແໜ່ງຜູ້ນຳປະເທດ.
ນອກຈາກນີ້, ທາງການຈີນຍັງກຽມເປີດຊາຍແດນປະເທດໃນວັນທີ 8 ມັງກອນນີ້ ພ້ອມຫລຸດຜ່ອນມາດຕະການຮັບມືໂຄວິດ ເຮັດໃຫ້ຫລາຍຝ່າຍ ໂດຍສະເພາະໜ່ວຍງານດ້ານສາທາລະນະສຸກຂອງຈີນກັງວົນໃຈກ່ຽວກັບສະຖານະການການແພ່ລະບາດທີ່ຈະເກີດຂຶ້ນໃນໄລຍະເທດສະການກຸດຈີນ ເຊິ່ງຊາວຈີນຈໍານວນຫລາຍຈະເດີນທາງກັບພູມລຳເນົາຂອງຕົນ ເພື່ອສະເຫລີມສະຫລອງກັບຄອບຄົວ ໂດຍໃນປີນີ້ກົງກັບກາງເດືອນມັງກອນ 2023.
ໄລຍະເກືອບ 3 ປີຜ່ານມາ, ທາງການຈີນປິດຊາຍແດນປະເທດ, ສັ່ງລັອກດາວ ແລະ ດໍາເນີນມາດຕະການເຂັ້ມງວດ ເພື່ອຮັບມືພະຍາດລະບາດຢ່າງຈິງຈັງ ເປັນເຫດໃຫ້ກິດຈະກຳ ແລະ ທໍານຽມການປະຕິບັດຕ່າງໆໃນແຕ່ລະເທດສະການຖືກຍົກເລີກ ເນື່ອງຈາກເຫດຜົນດ້ານຄວາມປອດໄພ ຢ້ານເກີດການແພ່ລະບາດໃຫຍ່ ໂດຍສະເພາະໃນໄລຍະລະດູໜາວ.
ແຕ່ການປະກາດປ່ຽນແປງນະໂຍບາຍຮັບມືໂຄວິດລະດັບປະເທດໃນທ້າຍປີ 2022 ຜ່ານມາ ເຮັດໃຫ້ນັກເສດຖະສາດຈຳນວນໜຶ່ງເບິ່ງວ່າ: ການປ່ຽນແປງດັ່ງກ່າວຈະເຮັດໃຫ້ໄລຍະເທດສະການກຸດຈີນປີນີ້ເກີດການເດີນທາງຂອງຄົນຈຳນວນຫລາຍ ແລະ ມີການໃຊ້ຈ່າຍເງິນໃນປະລິມານສູງ ເພື່ອທົດແທນໂອກາດທີ່ເສຍໄປໃນໄລຍະ 2-3 ປີຜ່ານມາ.
ອ້າງອີງ:
- https://www.wsj.com/articles/chinese-health-official-raises-covid-alarm-ahead-of-lunar-new-year-holiday-11672664635
- https://www.bbc.com/news/world-asia-64131713
- https://www.theguardian.com/world/2022/dec/30/chinas-second-covid-wave-expected-in-rural-areas-after-lunar-new-year
