ປີ 2022 ຈຳນວນເດັກນ້ອຍເກີດໃໝ່ຂອງຍີ່ປຸ່ນ ຕ່ຳກວ່າ 800.000 ຄົນ

 ກະຊວງສາທາລະນະສຸກ, ແຮງງານ ແລະ ສະຫວັດດີການຂອງຍີ່ປຸ່ນ ໄດ້ເປີດເຜີຍວ່າ ຈຳນວນເດັກນ້ອຍເກີດໃໝ່ຂອງຍີ່ປຸ່ນມີທ່າອ່ຽງຫຼຸດລົງຕ່ຳກວ່າ 800.000 ຄົນ ໃນປີ 2022 ຊຶ່ງເປັນລະດັບຕໍ່າທີ່ສຸດເປັນປະຫວັດສາດ.

ໃນໄລຍະເດືອນມັງກອນເຖິງເດືອນຕຸລາ ຈຳນວນເດັກນ້ອຍເກີດໃໝ່ຫຼຸດລົງ 4,8% ຈາກປີ 2021 ຢູ່ທີ່ 669.871 ຄົນ ຂະນະທີ່ຈຳນວນເດັກນ້ອຍເກີດໃໝ່ລວມທັງໝົດປີ 2022 ມີທ່າອ່ຽງຢູ່ທີ່ 770.000 ຄົນ ຊຶ່ງໜ້ອຍກວ່າໂຕເລກ 811.604 ຄົນ ເມື່ອປີ 2021 ຊຶ່ງຈຳນວນເດັກນ້ອຍເກີດໃໝ່ຫຼຸດລົງທຳລາຍສະຖິຕິເປັນເວລາ 7 ປີຕິດຕໍ່ກັນແລ້ວ ແລະ ຈະຫຼຸດລົງຕ່ຳກວ່າ 800.000 ຄົນເປັນຄັ້ງທຳອິດນັບຕັ້ງແຕ່ລັດຖະບານຍີ່ປຸ່ນເລີ່ມຮວບຮວມສະຖິຕິການເກີດຂອງເດັກນ້ອຍເມື່ອປີ 1899. ບົດລາຍງານລະບຸວ່າ ອັດຕາການເກີດຫຼຸດລົງໄວກວ່າທີ່ລັດຖະບານເຄີຍຄາດຄະເນໄວ້ ໂດຍສະຖາບັນວິໄຈປະຊາກອນ ແລະ ຄວາມໝັ້ນຄົງທາງສັງຄົມແຫ່ງຊາດຂອງຍີ່ປຸ່ນໄດ້ຄາດຄະເນໄວ້ເມື່ອປີ 2017 ວ່າ ຈຳນວນເດັກນ້ອຍເກີດ ໃໝ່ຈະຢູ່ທີ່ປະມານ 850.000 ຄົນໃນປີ 2022 ແລະ ຫຼຸດລົງຕ່ຳກວ່າ 800.000 ຄົນໃນປີ 2030.

ນອກຈາກນີ້, ບົດລາຍງານຍັງໄດ້ລະບຸຕື່ມວ່າ ອັດຕາການເກີດຫຼຸດລົງໃນສັງຄົມຜູ້ສູງອາຍຸທີ່ຂະຫຍາຍຕົວຢ່າງວ່ອງໄວຂອງຍີ່ປຸ່ນ ຈະສົ່ງຜົນກະທົບຕໍ່ການຈັດຫາເງິນສຳລັບໂຄງການປະກັນສັງຄົມທີ່ເພີ່ມຂຶ້ນຂອງລັດຖະບານໃນອະນາຄົດເຊັ່ນ: ເງິນບຳນານ ແລະ ການຮັກສາພະຍາບານສຳລັບຜູ້ສູງອາຍຸ.