ຮອງລັດຖະມົນຕີ ປກສ ເນັ້ນໃຫ້ກຳລັງປ້ອງກັນຄວາມສະຫງົບເອົາໃຈໃສ່ 9 ວຽກງານ ເພື່ອຮັບປະກັນແຜນວຽກເຂົ້າສູ່ລະບົບ
ທ່ານ ພົຕ ວັນທອງ ກອງມະນີ ຮອງລັດຖະມົນຕີ ກະຊວງປ້ອງກັນຄວາມສະຫງົບ, ຫົວໜ້າກົມໃຫຍ່ການເມືອງປ້ອງກັນຄວາມສະຫງົບ ໄດ້ມີຄຳເຫັນຊີ້ນຳໃນກອງປະຊຸມສະຫລຸບວຽກງານກົມໃຫຍ່ການເມືອງ ປກສ ປະຈໍາປີ 2022 ຂອງວັນທີ 28 ທັນວາ 2022, ໂດຍຊີ້ນຳໃຫ້ບັນດາສະຫາຍເອົາໃຈໃສ່ບັນຫາຄົງຄ້າງຕ່າງໆ ເພື່ອສືບຕໍ່ຮັບປະກັນໃຫ້ເຫດການການເມືອງສໍາຄັນຂອງພັກ, ລັດ ກໍຄືແຜນວຽກຂອງຄະນະພັກ, ຄະນະບັນຊາກະຊວງປ້ອງກັນຄວາມສະຫງົບ ໃນປີ 2023 ໃຫ້ເຂົ້າສູ່ລະບົບທີ່ໜັກແໜ້ນຄື:
- ສືບຕໍ່ສຸມໃສ່ຕິດຕາມ, ເກັບກໍາສະພາບການເມືອງແນວຄິດຂອງນາຍ ແລະ ພົນຕໍາຫລວດໃນທົ່ວກໍາລັງ, ສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ V ອົງຄະນະພັກກະຊວງ ກໍຄືມະຕິກອງປະຊຸມໃຫຍ່ ຄັ້ງທີ VI ຂອງຄະນະພັກກົມໃຫຍ່ການເມືອງ, ຕິດພັນກັບ 02 ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ບັນຫາເສດຖະກິດ-ການເງິນ.
- ຖືເອົາວຽກງານສຶກສາອົບຮົມການເມືອງ-ແນວຄິດ ເປັນບູລິມະສິດສຳຄັນຕົ້ນຕໍ ແລະ ນຳໜ້າໃນທຸກຂົງເຂດວຽກງານ ໂດຍຢຶດໝັ້ນ 5 ຫລັກການ 3 ທິດນໍາຂອງພັກ ສ້າງໃຫ້ການຈັດຕັ້ງພັກ, ສະມາຊິກພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ ແລະ ມີລະບຽບແບບແຜນທັນສະໄໝ ຖືເອົາວຽກງານນີ້ເປັນປັດໃຈສຳຄັນໃນການສ້າງກຳລັງແຮງ ແຫ່ງຄວາມເປັນເອກະພາບດ້ານການເມືອງ ແລະ ການຈັດຕັ້ງປະຕິບັດຕົວຈິງ ແນ່ໃສ່ສ້າງຄວາມເຂົ້າໃຈອັນຖືກຕ້ອງ ຢ່າງພາວະວິໃສ ແລະ ຫັນໄປສູ່ແນວຄິດແບບແຜນວິທີເຮັດວຽກດໍາເນີນຊີວິດປະຈໍາວັນທ່ີ່ກ້າວໜ້າ.
- ສືບຕໍ່ປັບປຸງກົງຈັກການຈັດຕັ້ງບາງບ່ອນບໍ່ທັນສອດຄ່ອງ, ການມອບໝາຍໜ້າທີ່ໃຫ້ພະນັກງານໃຫ້ແທດເໝາະກັບຄວາມຮູ້-ຄວາມສາມາດຂອງວິຊາທີ່ຮຽນມາ; ເອົາໃຈໃສ່ປັບປຸງນິຕິກໍາທີ່ກ່ຽວຂ້ອງກັບລະບອບ, ລະບຽບການ, ກົນໄກກວດກາ-ຄຸ້ມຄອງການປະຕິບັດໜ້າທີ່ຂອງພະນັກງານແຕ່ລະຂັ້ນໃຫ້ຮັດກຸມ ເພື່ອເປັນເງື່ອນໄຂ, ບ່ອນອີງໃຫ້ພະນັກງານປັບປຸງຕົນເອງ, ເສີມຂະຫຍາຍຫົວຄິດປະດິດສ້າງ, ຮັບປະກັນປົກປ້ອງພະນັກງານກ້າຄິດ, ກ້າເຮັດເພື່ອຜົນປະໂຫຍດລວມ, ພ້ອມນັ້ນ, ກໍ່ຕ້ອງເດັດຂາດ ແກ້ໄຂນາຍ ແລະ ພົນຕໍາຫລວດ ທີ່ເສຍທາດຂາດຄຸນຂາດສະຕິຮັບຜິດຊອບຕໍ່ໜ້າທີ່, ຂາດຄວາມເປັນແບບຢ່າງໃນການປະຕິບັດໜ້າທີ່ວຽກງານ ແລະ ລະເມີດລະບຽບວິໄນຂອງກໍາລັງອອກຈາກການຈັດຕັ້ງ ດ້ວຍມາດຕະການຕົວຈິງຢ່າງເດັດຂາດ ແລະ ທັນການ.
- ເອົາໃຈໃສ່ວຽກງານກໍ່ສ້າງກຳລັງ ໂດຍສະເພາະແມ່ນການບຳລຸງ-ກໍ່ສ້າງນັກຮຽນ-ນັກສຶກສາຂອງກຳລັງປ້ອງກັນຄວາມສະຫງົບໃຫ້ມີຄຸນນະພາບ, ກາຍເປັນມືອາຊີບຢ່າງມີຈຸດສຸມ ສາມາດຕອບສະໜອງຄວາມຮຽກຮ້ອງຕ້ອງການ ແລະ ຮັບປະກັນໜ້າທີ່ການເມືອງໃນໄລຍະໃໝ່.
- ສືບຕໍ່ຊຸກຍູ້ ຕິດຕາມກວດກາ ການປະຕິບັດໜ້າທີ່ວິຊາສະເພາະຂອງກໍາລັງປ້ອງກັນຄວາມສະຫງົບ ຢູ່ບັນດາກົມກອງ-ທ້ອງຖິ່ນ ໂດຍສະເພາະແມ່ນບັນຫາຫາງສຽງວິພາກວິຈານຂອງສັງຄົມ, ປ້ອງກັນ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ໃນກໍາລັງ, ຄົ້ນຄວ້າປະຕິບັດວິໄນຕໍ່ຜູ້ລະເມີດລະບຽບ-ກົດໝາຍ ຢ່າງເຂັ້ມງວດ.
- ເອົາໃຈໃສ່ປະຕິບັດນະໂຍບາຍຕໍ່ນາຍ ແລະ ພົນຕໍາຫລວດປະຈໍາການ, ພະນັກງານປະຕິວັດອາວຸໂສ, ພະນັກງານບຳນານ ໃຫ້ຖືກຕ້ອງ, ເໝາະສົມ ແລະ ລົງໃກ້ສິດຕິດແທດໃຫ້ທົ່ວເຖິງ, ພ້ອມທັງເອົາໃຈໃສ່ຄຸ້ມຄອງ-ປັບປຸງ ລະບົບປະກັນສັງຄົມ ໃຫ້ເຂົ້າສູ່ລະບົບທັນສະໄໝຕາມແຕ່ລະໄລຍະຂອງການພັດທະນາ.
- ເອົາໃຈໃສ່ວຽກງານເສນາທິການ ໃຫ້ແກ່ຄະນະພັກ-ຄະນະນໍາກົມໃຫຍ່ ໃນການເຄື່ອນໄຫວວຽກງານ, ພົວພັນວຽກງານປະສານສົມທົບກັບທຸກພາກສ່ວນ, ເກັບກໍາສະພາບການ, ສະຫລຸບສັງລວມຂໍ້ມູນໃຫ້ລະອຽດຄົບຖ້ວນ, ການກໍານົດທິດທາງແຜນການ, ວຽກງານໃຫ້ຈະແຈ້ງ, ຖືກຕ້ອງກັບສະພາບການໃໝ່.
- ເຊື່ອມຊຶມກຳແໜ້ນ ແລະ ປະຕິບັດແນວທາງການຕ່າງປະເທດຂອງພັກໃຫ້ຖຶກຕ້ອງ, ເພີ່ມທະວີການພົວພັນຮ່ວມມືກັບກຳລັງ ປກສ ບັນດາປະເທດເພື່ອນມິດຍຸດທະສາດ, ປະເທດໃກ້ຄຽງຕາມເງື່ອນໄຂ; ໂດຍສະເພາະການແລກປ່ຽນບົດຮຽນ, ຝຶກອົບຮົມ ແລະ ກໍ່ສ້າງກຳລັງ.
- ອົງການຈັດຕັ້ງມະຫາຊົນ ກໍຄືຊາວໜຸ່ມ, ແມ່ຍິງ, ກຳມະບານ ຈົ່ງເຄື່ອນໄຫວຕາມພາລະບົດບາດຢ່າງຕໍ່ເນື່ອງ ແນໃສ່ຕ້ານປະກົດການຫຍໍ້ທໍ້ໃນຂົງເຂດຊາວໜຸ່ມແມ່ຍິງໃຫ້ຫລຸດລົງ.
ທັງນີ້, ກໍເພື່ອເຮັດໃຫ້ບັນດາໜ້າວຽກດັ່ງກ່າວໄດ້ຮັບການຜັນຂະຫຍາຍຖືກທິດ, ຕ້ອງໄດ້ເພີ່ມທະວີຄວາມສາມັກຄີເປັນເອກະພາບໃນຄະນະພັກກົມໃຫຍ່ການເມືອງ, ຄະນະພັກ-ຄະນະບັນຊາແຕ່ລະຂັ້ນ ຕິດພັນແໜ້ນກັບການເຊີດຊູນໍ້າໃຈຮັກຊາດ, ສະຕິເປັນເຈົ້າຕົນເອງ, ຕັ້ງໜ້າປັບປຸງ, ເພີ່ມທະວີບົດບາດການນຳພາຂອງພັກ ໃນທຸກຫົວໜ່ວຍການຈັດຕັ້ງໃນກຳລັງ; ສິ່ງສຳຄັນ ແມ່ນການປັບປຸງແບບແຜນວິທີເຮັດວຽກ ແລະ ແບບແຜນການດຳລົງຊີວິດ ໃຫ້ມີຄວາມປອດໃສ ແລະ ເຂັ້ມງວດ.
