ອິນໂດເນເຊຍປະກາດຍົກເລີກມາດຕະການຄວບຄຸມໂຄວິດທັງໝົດ ຫລັງປະຊາຊົນສ່ວນຫລາຍສັກວັກຊີນແລ້ວ

ປະທານາທິບໍດີ ໂຈໂກ ວິໂດໂດ ຜູ້ນໍາອິນໂດເນເຊຍເປີດເຜີຍໃນວັນທີ 30 ທັນວາວ່າ: ອິນໂດເນເຊຍໄດ້ຍົກເລີກມາດຕະການທັງໝົດທີ່ກໍານົດຂຶ້ນເພື່ອຄວບຄຸມການແພ່ລະບາດຂອງພະຍາດໂຄວິດ-19 ໂດຍມີຜົນບັງຄັບໃຊ້ໃນທັນທີ ເນື່ອງຈາກປະຊາກອນສ່ວນຫລາຍໃນປະເທດໄດ້ຮັບວັກຊີນແລ້ວ.

ສໍານັກຂ່າວຣອຍເຕີລາຍງານວ່າ: ອິນໂດເນເຊຍເປັນປະເທດຫລ້າສຸດທີ່ປະກາດຍົກເລີກມາດຕະການຄວບຄຸມໂຄວິດ-19 ທັງໝົດໃນປະເທດຕໍ່ຈາກຈີນ ເຊິ່ງປະກາດຍົກເລີກນະໂຍບາຍໂຄວິດເປັນສູນ (Zero-Covid Policy) ຢ່າງກະທັນຫັນໃນກາງເດືອນທັນວາຜ່ານມາ ເຖິງວ່າຍັງມີຜູ້ຕິດເຊື້ອຈໍານວນຫລາຍກໍຕາມ.

ທັງນີ້, ອິນໂດເນເຊຍເປັນປະເທດທີ່ມີຜູ້ຕິດເຊື້ອໂຄວິດ-19 ສູງເປັນອັນດັບ 2 ໃນກຸ່ມປະເທດອາຊີຕາເວັນອອກສຽງໃຕ້ (ອາຊຽນ) ຮອງຈາກຫວຽດນາມ ແລະ ມີຈຳນວນຜູ້ເສຍຊີວິດລວມສູງທີ່ສຸດໃນອາຊຽນ.