ປກສ ເມືອງທ່າພະບາດ ຫາລືກະກຽມການປ້ອງກັນງານບຸນນະມັດສະການຮອຍພຣະພຸດທະບາດໂພນສັນ ປະຈໍາປີ 2023

ເພື່ອຮັບປະກັນວຽກງານປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ຮັບປະກັນໃຫ້ແກ່ງານບຸນນະມັດສະການຮອຍພຣະພຸດທະບາດໂພນສັນ ເມືອງທ່າພະບາດ ແຂວງບໍລິຄໍາໄຊ ປະຈໍາປີ 2023 ຈະໄດ້ຈັດຂຶ້ນໃນລະຫວ່າງວັນທີ່ 3-6 ມັງກອນ 2023. ໂດຍການເປັນປະທານຂອງ ທ່ານ ພັທ ສຸກສະຫວັນ ບຸບຜາພັນ ຫົວໜ້າກອງບັນຊາການ ປກສ ເມືອງ ທ່າພະບາດ, ມີຄະນະກອງບັນຊາການ, ຫົວໜ້າພະແນກ ພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ພັຕ ບຸນທະວົງ ວິພັນຊໍາ ຫົວໜ້າພະແນກຫ້ອງການ ໄດ້ຂຶ້ນຜ່ານແຜນປ້ອງກັນງານບຸນນະມັດສະການຮອຍພຣະພຸດທະບາດໂພນສັນ ເມືອງທ່າພະບາດ ແຂວງບໍລິຄໍາໄຊ ປະຈໍາປີ 2023, ງານບຸນດັ່ງກ່າວແມ່ນງານໜຶ່ງທີ່ມີຄວາມໝາຍ, ຄວາມສໍາຄັນຂອງແຂວງ ເຊິ່ງໄດ້ປະຕິບັດກັນມາທາງດ້ານວັດທະນາທໍາ, ຕາມຮິດຄອງປະເພນີ ຂອງພຣະພຸດຖະສາສະໜາ ທີ່ສືບທອດກັນມາ, ແນໃສ່ເຕົ້າໂຮມຄວາມສາມັກຄີທົ່ວປວງຊົນລາວບັນດາເຜົ່າ, ພ້ອມພາກັນມາກາບໄຫວ້ສັກກະລະບູຊາ, ສະເຫລີມສະຫລອງໃຫ້ມີຄວາມເບີກບານມ່ວນຊື່ນ. ດັ່ງນັ້ນຕ້ອງຮັບປະກັນໃຫ້ແກ່ການກະກຽມ, ການປ້ອງກັນໃນທົ່ວເມືອງ ທ່າພະບາດໃຫ້ມີຄວາມສະຫງົບ, ປອດໄພ ແລະ ມີຄວາມເປັນລະບຽບຮຽບຮ້ອຍ, ສ້າງຄວາມເຊື່ອໝັ້ນໃຫ້ແກ່ກໍາລັງປ້ອງກັນຄວາມສະຫງົບ, ຕ້ອງພ້ອມກັນຖືເອົາວຽກງານປ້ອງກັນຄວາມສະຫງົບຄັ້ງນີ້ ເປັນບັ້ນຮົບໜຶ່ງຂອງກອງບັນຊາການ ປກສ ເມືອງ, ດັ່ງນັ້ນກອງບັນຊາການ ປກສ ເມືອງ ທ່າພະບາດ ຈຶ່ງໄດ້ຄົ້ນຄວ້າປຶກສາຫາລຶ ເພື່ອສ້າງ ແລະ ຮັບຮອງແຜນປ້ອງກັນເພື່ອເປັນບ່ອນອິງໃຫ້ແກ່ການຈັດຕັ້ງປະຕິບັດໃຫ້ເຂັ້ມງວດ, ແຕ່ງຕັ້ງໜ່ວຍປະຈໍາການຕະຫຼອດ 24 ຊົ່ວໂມງ, ກວດກາລາດຕະເວນໃນຂອບເຂດທົ່ວເມືອງດ້ວຍຄວາມຮັບຜິດຊອບສູງ. ເພື່ອເຮັດໃຫ້ງານບຸນຄັ້ງນີ້, ດໍາເນີນໄປດ້ວຍຄວາມເບີກບານມ່ວນຊື່ນ, ມີຄວາມສະຫງົບສຸກ, ເປັນລະບຽບຮຽບຮ້ອຍຮອບດ້ານ ແລະ ປອດໄພ 100% ດ້ວຍຜົນສໍາເລັດຢ່າງຈົບງາມ.

ນອກນີ້, ທ່ານ ຫົວໜ້າກອງບັນຊາການ ປກສ ເມືອງ ທ່າພະບາດ ໄດ້ ເນັ້ນໃຫ້ທຸກສະຫາຍເພີ່ມທະວີຄວາມເອົາໃຈໃສ່ຈັດຈັດຕັ້ງປະຕິບັດຕາມແຜນການດັ່ງກ່າວຢ່າງເຂັ້ມງວດ, ຮັບປະກັນຄວາມສະຫງົບສຸກ, ຄວາມເປັນລະບຽບຮຽບຮ້ອຍ ແລະ ມີຄວາມປອດໄພ 100%.