ຢຶດນ້ຳ ແລະ ສ່ວນປະສົມໃນການປຸງແຕ່ງກະທ່ອມ ຢູ່ບ້ານສີວິໄລ ແລະ ບ້ານຄຳຮຸ່ງ ຈຳນວນຫລາຍ
December 30, 2022 - 1:06 PM
ຂ່າວໜັງສືພິມຄວາມສະຫງົບ ລາຍງານວັນທີ 30 ທັນວາ 2022 ນີ້ໃຫ້ຮູ້ວ່າ: ພະແນກກວດກາ ແລະ ຄວບຄຸມຢາເສບຕິດ ກອ ງບັນຊາການ ປກສ ນະຄອນຫຼວງວຽງຈັນ ໄດ້ສົມທົບກັບ ກອງບັນຊາການ ປກສ ເມືອງໄຊທານີ, ປກສ ກຸ່ມສີວິໄລ ແລະ ປກສ ບ້ານຄຳຮຸ່ງ ເມືອງໄຊທານີ ນວ ໄດ້ລົງກວດກາ ແລະ ຕິດຕາມຕົວຈິງຈາກແຫຼ່ງຂໍ້ມູນ ວ່າມີການຜະລິດ ແລະ ຈຳໜ່າຍນ້ຳກະທ່ອມແທ້ ຢູ່ບ້ານສີວິໄລ ແລະ ບ້ານຄຳຮຸ່ງ ເມືອງໄຊທານີ ນະຄອນຫຼວງວຽງຈັນ ໄດ້ລົງຢຶດຂອງກາງນ້ຳທ່ອມ, ໃບກະທ່ອມ ແລະ ສ່ວນປະສົມໃນການປຸງແຕ່ງໄດ້ຈຳນວນຫຼວງຫຼາຍ.
ເຈົ້າໜ້າທີ່ ປກສ ໃຫ້ຮູ້ວ່າ: ນໍ້າຕົ້ມໃບກະທ່ອມ, ໃບກະທ່ອມ ແລະ ສ່ວນປະສົມ ໃນການປຸ່ງແຕ່ງນໍ້າໃບກະທ່ອມ ທີ່ນໍາຢຶດໄດ້ໃນຄັ້ງນີ້, ແມ່ນຢຶດມາໄດ້ ຢູ່ຫ້ອງເຊົ່າ ບ້ານສີວິໄລ ໜ່ວຍ 36 ແລະ ຫ້ອງເຊົ່າບ້ານຄຳຮຸ່ງ ໜ່ວຍ 8 ເມືອງໄຊທານີ ນວ.
ໃນນີ້ຫ້ອງເຊົ່າ ບ້ານສີວິໄລ ເຊິ່ງມີນໍ້າກະທ້ອມຕົ້ມແລ້ວ ໃສ່ຕຸກ ຂະໜາດ 1,5 ລິດ ຈຳນວນ 53 ຕຸກ, ໃບກະທ່ອມດິບຖົງໃຫຍ່ 1 ກິໂລ ມີ 58 ຖົງ, ໃບກະທ່ອມດິບຖົງນ້ອຍ 150 ກຣາມ ມີ 14 ຖົງ, ໃບກະທ່ອມແຫ້ງ 12,4 ກິໂລ, ນ້ຳໝາກພ້າວແກ້ວໃຫຍ່ 49 ແກັດ, ນ້ຳໝາກພ້າວນ້ອຍ 25 ແກັດ ກັບ 5 ແພັກ, ນ້ຳໝາກພ້າວ 76 ແກັດ, ນ້ຳໂອອີຊີ 71 ແກັດ, ຢາດີໄອດີທິດຊິນ ຈຳນວນ 3 ແກັດ ກັບ 299 ຂວດ ແລະ ນໍ້າຕົ້ມໃບກະທ່ອມ ຈຳນວນ 2 ໝໍ້ໃຫຍ່ .
ຫ້ອງເຊົ່າ ບ້ານຄຳຮຸ່ງ ມີນ້ຳກະທ່ອມ 150 ຕຸກ, ໃບກະທ່ອມ 801 ກິໂລ, ນ້ຳໝາກພ້າວ 32 ແກັດ, ນ້ຳຕານສົດ 100% ໂຄຟີ ແກັດສີແດງ 19 ແກັດ, ແກັດສີຂຽວ 40 ແກັດ ກັບ 17 ແກ້ວ, ໂອອີຊີຝາສົ້ມ 28 ແກັດ ແລະ ຝາຂຽວ 39 ແກັດ, ຢາດີໄອ 24 ແກັດໃຫຍ່ ກັບ 18 ແກັດນ້ອຍ ແລະ ນ້ຳຕົ້ມໃບກະທ່ອມຈຳນວນ 2 ໝໍ້ໃຫຍ່.
ຕໍ່ກັບບັນດາເປົ້າໝາຍຈຳນວນດັ່ງກ່າວ, ທາງເຈົ້າໜ້າທີ່ ປກສ ຈະໄດ້ນຳຕົວຜູ້ກະທຳຜິດເຂົ້າມາສຶກສາອົບຮົມກ່າວເຕື່ອນ ບໍ່ ໃຫ້ກະທຳຜິດ ແລະ ຮັບຮູ້ເຂົ້າໃຈກ່ຽວກັບລະບຽບ ກົດໝາຍ ສ່ວນຂອງກາງນໍ້າກະທ່ອມ,ໃບກະທ້ອມແລະ ສ່ວນປະສົມໃນການປຸງແຕ່ງນໍ້າກະທ່ອມແມ່ນທາງ ເຈົ້າໜ້າທີ່ໄດ້ນຳໄປທຳລາຍຖີ້ມ.
