ປີ 2022 ການສົ່ງອອກຢາງພາລາຢູ່ເມືອງຊຽງຮ່ອນສ້າງມູນຄ່າໄດ້ 30 ຕື້ກວ່າກີບ
ແຫລ່ງຂ່າວບໍລິຄຳໄຊ ໃຫ້ຮູ້ວ່າ: ອີງຕາມການຂໍ້ມູນຂອງທ່ານ ສີເມືອງ ອິນທະວົງ ຫົວໜ້າຫ້ອງການ ອຸດສາຫະກຳ ແລະ ການຄ້າເມືອງຊຽງຮ່ອນ ລາຍງານການສົ່ງອອກຢາງພາລາຂອງຢູ່ເມືອງຊຽງຮ່ອນໂດຍຜ່ານການກວດກາຈາກໝ່ວຍງານຜ່ານປະຕູດຽວຂອງເມືອງໃນໄລຍະ 1 ປີ 2022 ສາມາດສົ່ງອອກຢາງພາລາໄປພາຍໃນຕ່າງແຂວງ ຈຳນວນ 2.179 ໂຕນ, ສ້າງມູນຄ່າໄດ້ທັງໝົດ 19.321.200.000 ກີບ ແລະ ສົ່ງຢາງພາລາອອກໄຕ່າງປະເທດ ໄດ້ 978 ໂຕນ, ສ້າງມູນຄ່າໄດ້ 521.247 ໂດລາ, ຢາງພາລາແຜນ 1.200 ໂຕນ ມູນຄ່າ 639.600 ໂດລາ, ການກໍານົດແຜນປີ 2023 ຕໍ່ໜ້າການສົ່ງອອກຢາງພາລາຄາດວ່າຈະຈະບັນລຸໃຫ້ໄດ້ອີກ 3.000 ໂຕນ ມູນຄ່າ 40.000.000.000 ກີບ.
ການເພີ່ມຂຶ້ນຢາງພາລາຢູ່ເມືອງຊຽງຮ່ອນ ຍ້ອນມີເນື້ອທີ່ການປາດຢາງພາລາທົ່ວເມືອງເພີ່ມຂຶ້ນ. ໃນນັ້ນ, ທົ່ວເມືອງມີເນື້ອທີ່ປູກຢາງພາລາທັງໝົດ 5.988 ເຮັກຕາ, ເນື້ອທີ່ທີ່ໄດ້ປາດແລ້ວ 3.880 ເຮັກຕາ ຜົນຜະລິດ 13.581 ໂຕນ ໂດຍມີການລົງທຶນປູກຂອງບໍລິສັດ ລີລ້ຽງຢູນານ ຈໍາກັດ ໃນເນື້ອທີ່ 642 ເຮັກຕາ, ບໍລິສັດ ຊຽງຕາລີ ຈຳຈັດ 2.885 ເຮັກຕາ, ບໍລິສັດ ບໍ່ແກ້ວ ຈຳກັດ ໃນເນື້ອທີ່ 187 ເຮັກຕາ ແລະ ປະຊນຊົນປູກເອງ ຈຳນວນ 2.274 ເຮັກຕາ, ເຊິ່ງໃນປີ 2023-2024 ທາງຫ້ອງການກະສິກຳ ແລະ ປ່າໄມ້ເມືອງຍັງມີແຜນການຊຸກຍູ້ສົ່ງເສີມໃຫ້ຊາວກະສິກອນປູກຕື່ມໃນໄລຍະ 2 ປີຕໍ່ໜ້າຈຳນວນ 5.000 ກວ່າເຮັກຕາ ເພື່ອຕອບສະໜອງໃຫ້ບໍລິສັດ ລາວຈູນທົງຈຳກັດ ປຸງແຕ່ງຢາງພາລາເພື່ອສົ່ງອອກໄປ ສ.ປ ຈີນ ເຊິ່ງມີກຳລັງການຮັບຊື້ຈຳນວນ 3.000 ໂຕນຕໍ່ເດືອນ ແລະ ນອກນີ້ທາງບໍລິສັດຍັງໄດ້ສົ່ງເສີມໃຫ້ປະຊາຊົນຢູ່ເຂດກຸ່ມບ້ານມົກສະຕຸ ແລະ ກຸ່ມບ້ານປາກເປັດ ປູກຢາງພາລາໂດຍບໍລິສັດເປັນຜູ້ສະໜອງແນວພັນ.
ເພື່ອປະຕິບັດຕາມຕາມແຜນພັດທະນາເສດຖະກິດ-ສັງຄົມຂອງເມືອງ ຕິດພັນກັບການຊຸກຍູ້ສົ່ງເສີມຊາວກະສິກອນຢູ່ພາຍໃນເມືອງປູກພືດອຸດສາຫະກຳເປັນສິນຄ້າສ້າງລາຍຮັບເຂົ້າຄອບຄົວເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂື້ນ ແລະ ເຮັດໃຫ້ເມືອງຊຽງຮ່ອນຫຼຸດພົ້ນອອກຈາກເມືອງທຸກຍາກໃນຕໍ່ໜ້ານີ້.
