ໄຟໄໝ້ອຸໂມງທາງດ່ວນຢູ່ ສ.ເກົາຫລີ ມີຜູ້ເສຍຊີວິດ 5 ຄົນ ບາດເຈັບຫລາຍສິບຄົນ

ເກີດເຫດໄຟໄໝ້ຄັ້ງໃຫຍ່ຢູ່ທາງດ່ວນຂອງ ສ.ເກົາຫລີ ໃນວັນທີ 29 ທັນວາ ສົ່ງຜົນໃຫ້ມີຜູ້ເສຍຊີວິດຢ່າງໜ້ອ 5 ຄົນ ແລະ ບາດເຈັບອີກເກືອບ 40 ຄົນ.

ວິດີໂອໃນສື່ອອນລາຍສະແດງໃຫ້ເຫັນພາບຫລັງຄາອຸໂມງທາງດ່ວນຖືກໄຟລຸກໄໝ້ ຫລັງຈາກເກີດໄຟໄໝ້ຢູ່ທາງດ່ວນຢອງຈິນເສັ້ນທີສອງ (Second Gyeongin Expressway) ໃກ້ກັບນະຄອນຫລວງເຊອຸນ ເມື່ອເວລາ 13:49 ໂມງ ຕາມເວລາທ້ອງຖິ່ນ (11:49 ໂມງ ຕາມເວລາປະເທດລາວ).

ຜູ້ເຫັນເຫດການກ່າວຕໍ່ສະຖານີໂທລະພາບ YTN ວ່າ: ການຈະລາຈອນທີ່ໜາແໜ້ນເຮັດໃຫ້ຍານພາຫະນະຕ່າງໆຫລົບໜີອອກຈາກພື້ນທີ່ປະສົບໄພໄດ້ຍາກ ຂະນະທີ່ໄຟລຸກລາມ ແລະ ມີສຽງລະເບີດດັງຂຶ້ນ.

ສື່ທ້ອງຖິ່ນລາຍງານວ່າ: ໄຟເລີ່ມຂຶ້ນຫລັງຈາກລົດເມ ແລະ ລົດບັນທຸກຕໍາກັນ. ເຖິງຢ່າງໃດກໍດີ, ເຈົ້າໜ້າທີ່ມອດໄຟໃນຈຸດເກີດເຫດກ່າວວ່າ: ສາເຫດຂອງອຸບັດຕິເຫດໃນຄັ້ງນີ້ຍັງຢູ່ລະຫວ່າງການສອບສວນ.

ປັດຈຸບັນເຈົ້າໜ້າທີ່ສາມາດຄວບຄຸມໄຟໄດ້ແລ້ວ ພົບລົດເສຍຫາຍທັງໝົດ 44 ຄັນ, ຂະນະທີ່ມີຜູ້ເສຍຊີວິດ 5 ຄົນ ແລະ ບາດເຈັບຢ່າງໜ້ອຍ 37 ຄົນ ໃນຈຳນວນນີ້ອາການສາຫັດ 3 ຄົນ.

ອ້າງອີງ:

https://www.reuters.com/world/asia-pacific/fire-south-korean-highway-kills-five-injures-dozens-2022-12-29/