ເງິນເດືອນພະນັກງານ ບໍ່ແມ່ນແນວຕິດໜີ້ ລັດຖະມົນຕີກະຊວງການເງິນຮັບປະກັນບໍ່ໃຫ້ຄ້າງແນ່ນອນ

ຄວາມກັງວົນຕໍ່ເງິນເດືອນພະນັກງງານ ແລະ ຄ່າຄອງຊີບໄດ້ເພີ່ມທະວີຂຶ້ນ ເມື່ອຄ່າເງິນກີບນັບມື້ນັບອ່ອນຄ່າ, ເງິນເດືອນພະນັກງານບໍ່ສາມາດຈູນເຈືອຄ່າໃຊ້ຈ່າຍປະຈຳວັນໄດ້ ສ້າງຄວາມເດືອດຮ້ອນທົ່ວສັງຄົມ ກາຍເປັນຫົວຂໍ້ໜຶ່ງທີ່ບັນດາສະມາຊິກສະພາ ແລະລັດຖະບານໄດ້ປຶກສາຫາລືກັນຢ່າງເຄັ່ງຮ້ອນ ໃນກອງປະຊຸມ ສະໄໝສາມັນຄັ້ງທີ 4 ຂອງສະພາແຫ່ງຊາດຊຸດ IX ໃນເດືອນທັນວາ 2023.

ຄວາມສົມເຫດສົມຜົນຂອງເງິນເດືອນພະນັກງານນັ້ນໄດ້ເປັນເລື່ອງຖົກຖຽງມາໂດຍຕະຫຼອດ ຍ້ອນທັງໄດ້ໜ້ອຍ ແລະບໍ່ໄດ້ເປັນປົກກະຕິ ເຊິ່ງພວກເຮົາລຶ້ງເຄີຍກັບສະພາບແບບນີ້ມາຕັ້ງເທົ່າໃດປີແລ້ວ ແຕ່ບໍ່ໄດ້ຮັບການແກ້ໄຂ ຢ່າງບຸກທະລຸເທົ່າທີ່ຄວນ ແລະ ບັນຫານີ້ໄດ້ຮ້າຍແຮງຂຶ້ນເມື່ອຄ່າເງິນກີບອ່ອນຄ່າເປັນປະຫວັດກການໃນປີ 2022.

ຜົນກະທົບຈາກເງິນອ່ອນຄ່າ ບວກໃສ່ກັບເງິນເດືອນທີ່ໜ້ອຍກວ່າຄວາມເປັນຈິງນັ້ນ ໄດ້ເຮັດໃຫ້ຊີວິດການເປັນຢູ່ຂອງພະນັກງານ, ທະຫານ, ຕຳຫຼວດ ແລະ ຜູ້ໄດ້ຮັບຄ່າແຮງຂັ້ນຕໍ່າຕ້ອງເຖິງຂັ້ນປາກກັດຕີນຖີບກໍມີ ໂດຍສະເພາະ ຜູ້ທີ່ບໍ່ມີເງື່ອນໄຂ ການຊອກຫາລາຍໄດ້ອື່ນ, ບໍ່ມີພື້ນຖານຄອບຄົວທີ່ດີ ແລະອາໄສໃນຕົວເມືອງ ທີ່ທຸກຢ່າງຕ້ອງໄດ້ໃຊ້ເງິນ.

ເພາະສະນັ້ນ, ເກີດປະກົດການຫຍໍ້ທໍ້ຂອງພະນັກງານ ເຖິງຂັ້ນຜູ້ມີຄວາມສາມາດ ໃນອົງການຈັດຕັ້ງລັດ ໄດ້ທະຍອຍກັນອອກຈາກລະບົບລັດໄປບໍ່ແມ່ນໜ້ອຍ ເຊິ່ງເປັນໜ້າເສົ້າໃຈຢູ່ບ່ອນວ່າ ຄວາມຈິງແລ້ວຄວາມເຂັ້ມແຂງຂອງລະບົບລັດ ຕ້ອງເພິ່່ງພາຜູ້ມີຄວາມຮູ້ຄວາມສາມາດ ແຕ່ຖ້າຫາກວ່າ ຍັງມີທ່າອ່ຽງເລື່ອງເສດຖະກິດຖົດຖອຍ ແລະ ມີສະພາບບັນຫາຫຍຸ້ງຍາກຫລາຍຄືດັ່ງປັດຈຸບັນ ອາດເປັນໄປໄດ້ວ່າ ລະບົບລັດເຮົາອາດເຮັດຜູ້ຄວາມສາມາດໜ້ອຍລົງໄປຢ່າງແນ່ນອນ ທຸກຂະນະຢ່າງແນ່ນອນ ຍ້ອນຫຼາຍຄົນເຫັນວ່າ ໃຊ້ຄວາມສາມາດເຕັມທີ່ ແຕ່ຜົນຕອບຮັບໜ້ອຍ, ບໍ່ພໍຄ່າໃຊ້ຈ່າຍໃນຊີວິດປະຈຳວັນ ຈຶ່ງຈຳຕ້ອງຫາທາງອື່ນເພື່ອຄວາມຢູ່ລອດ.

ພວກເຮົາຮັບຮູ້ດີວ່າ ໃນສະຖານະການປັດຈຸບັນແມ່ນມີຄວາມຫຍຸ້ງຍາກທີ່ຈະຂຶ້ນເງິນເດືອນ ຫຼື ເພີ່ມອັດຕາໃດໜຶ່ງແກ່ພະນັກງານຂອງລັດ ເນື່ອງຈາກສິ່ງທ້າທາຍຫຼາຍອັນ ໂດຍສະເພາະ ໜີສິນ, ການເກັບລາຍຮັບ ແລະ ອື່ນໆ ແຕ່ອັນນີ້ ກໍສະແດງໃຫ້ເຫັນເຖິງຄວາມບອບບາງຂອງເສດຖະກິດ ແລະບັນຫາທີ່ສະສົມມາຫຼາຍປີ ໂດຍບໍ່ມີການບຸກທະລຸການແກ້ໄຂບັນຫາຢ່າງຈິງຈັງ.

ເມື່ອພວກເຮົາມາຮອດສະຖານະການນີ້ແລ້ວ ບໍ່ມີເວລາໃດທີ່ຈະເໝາະສົມໄປກວ່ານີ້ອີກ ທີ່ຈະປ່ຽນແປງ ເພື່ອຄວາມຢູ່ລອດ ແລະດີຂຶ້ນກວ່າທີ່ຜ່ານມາ ເຊິ່ງຮຽກຮ້ອງໃຫ້ ມີຄວາມກ້າຫານໃນການຕັດສິນໃຈ ໂດຍສະເພາະ ແກ້ໄຂການສໍ້ລາດບັງຫຼວງ, ການສວຍໃຊ້ອຳນາດໜ້າທີ່ ເໜືອລະບຽບກົດໝາຍ, ຕີຕ້ານຄວາມໂລບໝາກໂລພາໂດຍບໍ່ເຄົາລົບຕໍ່ຜົນປະໂຫຍດລວມຂອງຊາດ ຂອງບາງກຸ່ມຄົນ, ສົ່ງເສີມການເຮັດແທ້ທຳຈິງ ແລະຈິງໃຈໃນການເຮັດໜ້າທີ່ເພື່ອປະເທດຊາດ.

ພະນັກງານລັດ, ທະຫານ ຕຳຫຼວດ ຄູອາຈານ ແລະ ຜູ້ໃຊ້ແຮງງານທັງມວນລ້ວນແລ້ວແຕ່ມີສັກສີຂອງຕົນ ແຕ່ເຂົາເຈົ້າຈຳຕ້ອງໄດ້ຊອກຊ່ອງທາງເພື່ອຄວາມຢູ່ລອດ ຫຼາຍຄົນກໍຍອມເຮັດຜິດກົດໝາຍ ຫຼືເຂົ້າຮ່ວມຂະບວນການ ການສໍ້ລາດບັງຫຼວງ ແລະອື່ນໆ ເພາະສະນັ້ນ ພວກເຮົາເຫັນວ່າ ການແກ້ໄຂບັນຫາຢູ່ປາຍເຫດ ມັນອາດເປັນເລື່ອງເປົ່າປະໂຫຍດ ເຊັ່ນວ່າ ຈະປາບການສໍ້ລາດບັງຫຼວງໄດ້ແນວໃດ ຖ້າຫາກບໍ່ສາມາດເບິ່ງແຍງຊີວິດການເປັນຢູ່ທີ່ດີຂອງພະນັກງານໄດ້?

ການຕິດໜີ້ຫຼືຈ່າຍເງິນເດືອນພະນັກງານຊ້າ ຫຼາຍຄົນລຶ້ງເຄີຍມາດົນເລີຍຖືເປັນເລື່ອງທຳມະດາ ແຕ່ຄວາມເປັນຈິງແລ້ວບໍ່ຄວນໃຫ້ມີສະຖານະການແບບນີ້ເກີດຂຶ້ນເດັດຂາດ ແລະເປັນເລື່ອງທີ່ຍິນດີຢ່າງຍິ່ງ ໃນກອງປະຊຸມສະໄໝສາມັນເທື່ອທີ 4 ນີ້ ແມ່ນຄວາມເຂັ້ມຂຸ້ນ ຈິງຈັງຈິງໃຈຫຼາຍຂຶ້ນ ໂດຍສະເພາະ ມີທ່ານ ສະມາຊິກສະພາແຫ່ງຊາດ ທີ່ກ້າຫານເຈາະຈີ້ມ ສະແດງຄວາມເປັນຫ່ວງມາຍັງລັດຖະບານຕໍ່ການເບີກຈ່າຍເງິນເດືອນ ແລະ ກໍຍັງເຫັນຄວາມຕັ້ງໃຈຂອງລັດຖະບານ ທີ່ຈະພະຍາຍາມບຸກບືນແກ້ໄຂບັນຫາ ທີ່ຊໍ້າເຮື້ອນີ້ໃຫ້ໄດ້ ໂດຍຈະບໍ່ໃຫ້ມີອີກແລ້ວຄວາມຊັກຊ້າ. ການພະຍາຍາມປ່ຽນແປງ ແລະ ແກ້ໄຂບັນຫານີ້ ບໍ່ແມ່ນການໃຊ້ຄວາມເວົ້າທີ່ສວາຍງາມ ແລະມ່ວນຫູ, ຢາດີຕ້ອງສີຂົມໆ ແຕ່ຖ້າເຮົາກິນໄດ້ກໍຈະດີເມືອໜ້າ.

ຕໍ່ກໍລະນີການເຈະຈີ້ມຂອງສະມາຊິກສະພານັ້ນ ລັດຖະມົນຕີກະຊວງການເງິນກໍໃຫ້ຄຳໝັນສັນຍາຢ່າງສຸດໃຈວ່າ ຈະບໍ່ໃຫ້ມີບັນຫາການຄ້າງຈ່າຍເງິນເດືອນພະນັກງານລັດຖະກອນຢ່າງແນ່ນອນ ທັງນີ້ກໍຍ້ອນວ່າໄດ້ມີການຄົ້ນຄວ້າ ຕັດຮອນຂັ້ນຕອນການເບີກຈ່າຍ ພ້ອມນີ້ກໍຈະມີການຂຶ້ນເງິນເດືອນລັດຖະກອນຕື່ມອີກ.

ເຖິງຢ່າງໃດກໍຕາມ ເຊື່ອແນ່ວ່າພາກລັດຈະບໍ່ເວົ້າລ້າ ປະໃຫ້ພະນັກງານຄອງຄອຍເກີ້ຢ່າງແນ່ນອນ