ເມືອງກະລຶມອອກແຈ້ງການ ອະນຸຍາດໃຫ້ນໍາໃຊ້ຂົວເບເລ ຢູ່ເມືອງກະລຶມເກົ່າ ໂດຍບໍ່ເສຍຄ່າ

ວັນທີ 3 ທັນວາ 2022 ຜ່ານມານີ້ ເຈົ້າເມືອງກະລຶມອອກແຈ້ງການ ອະນຸຍາດໃຫ້ນໍາໃຊ້ຂົວເບເລ ຢູ່ເມືອງກະລຶມ ເກົ່າ ໂດຍບໍ່ເສຍຄ່າ ໂດຍມີເນື້ອໃນດັ່ງນີ້:

1. ອະນຸຍາດໃຫ້ການນໍາພັກ-ລັດ ພະນັກງານ, ທະຫານ-ຕໍາຫຼວດ, ພໍ່ແມ່ປະຊາຊົນ, ພໍ່ຄ້າ-ຊາວຂາຍ, ຫົວໜ່ວຍ ທຸລະກິດ, ລັດວິສະຫະກິດ ແລະ ບໍລິສັດອື່ນໆ ເຊິ່ງເລີ່ມແຕ່ວັນທີ 1 ທັນວາ 2022 ຫາ ວັນ 31 ພຶດສະພາ 2023 ໃນລະດູແລ້ງ ໃຫ້ສາມາດນໍາໃຊ້ບໍລິການຜ່ານຂົວເບເລ ຢູ່ເມືອງກະລຶມເກົ່າ ໂດຍບໍ່ເສຍຄ່າ ລະຫວ່າງ ເມືອງ ຫາ ແຂວງ-ແຂວງ ຫາ ເມືອງ ໄດ້ຢ່າງສະດວກ ແລະ ຂ້າມໄດ້ ( 24 ຊົ່ວໂມງ ).
2. ສະມາຄົມເຮືອບັກ ແລະ ສະມາຄົມເຮືອຈັກຂ້າມຝາກ ຢຸດຕິບໍລິການຊ່ວງລະດູແລ້ງ ແຕ່ວັນທີ 1 ທັນວາ ປີ 2022 ຫາ ວັນທີ 31 ພຶດສະພາ 2023.
3. ອະນຸຍາດໃຫ້ສະມາຄົມເຮືອບັກ ແລະ ສະມາຄົມເຮືອຈັກຂ້າມຝາກ ບໍລິການຊ້ວງລະດູຝົນ ເລີ່ມແຕ່ວັນທີ 1 ມີຖຸນາ ປີ 2023 ຫາ ວັນທີ 31 ທັນວາ 2023

ໝາຍເຫດ: ສ່ວນການບໍລິການເຮືອບັກ ແລະ ເຮືອແພລອຍ ໃນກໍລະນີເກີດເຫດສຸກເສີນ ນໍ້າຂຶ້ນຫຼາຍຜິດ ປົກກະຕິ ແມ່ນໃຫ້ຈັດຕັ້ງປະຕິບັດ ຕາມບົດບັນທຶກ ແລະ ສັນຍາ ລະຫວ່າງຂະແຫນງການຂອງລັດກັບ ສະມາຄົມເຮືອ ຢ່າງເຂັ້ມງວດ.

ດັ່ງນັ້ນ, ຈຶ່ງແຈ້ງມາຍັງ ທຸກພາກສ່ວນ ຈົ່ງຮັບຮູ້ ແລະ ຈັດຕັ້ງປະຕິບັດຕາມແຈ້ງການສະບັບນີ້ ໃຫ້ມີຜົນສັກສິດນັບແຕ່ມື້ລົງລາຍເຊັນເປັນຕົ້ນໄປ.