ປະຊາຊົນແຂວງໄຊສົມບູນ ຮຽກຮ້ອງໃຫ້ລັດຖະບານເລັ່ງແກ້ໄຂ 7 ບັນຫາ

ທ່ານ ທັນຕາ ກອງຜາລີ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 18 ແຂວງໄຊສົມບູນ  ໃຫ້ສຳພາດຕໍ່ສື່ມວນຊົໃນໂອກາດເຂົ້າຮ່ວມກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ວ່າ: ຜ່ານການລົງພົບປະຜູ້ມີສິດເລືອກຕັ້ງ ແລະ ຕິດຕາມກວດກາເຫັນວ່າບັນຫາພົ້ນເດັ່ນທີ່ປະຊາຊົນມີຄວາມເປັນຫ່ວງ ແລະ ນຳສະເໜີໃຫ້ຂັ້ນເທິງແກ້ໄຂ 7 ບັນຫາຄື:

1. ໂຮງຮຽນ ແລະ ສຸກສາລາຂອງບັນດາບ້ານຈຸດສຸມຕ່າງໆຊຶ່ງບາງບ້ານຍັງບໍ່ທັນມີ ແລະ ຈໍານວນທີ່ມີກໍຍັງບໍ່ທັນພຽງພໍກັບຄວາມຮຽກຮ້ອງຕ້ອງການ.
2. ການກໍ່ສ້າງພື້ນຖານໂຄງລ່າງເປັນຕົ້ນຖະໜົນຫົນທາງເຊື່ອມຈອດບັນດາບ້ານຕ່າງໆທີ່ບໍ່ທັນມີ ແລະ ອີກສ່ວນໜຶ່ງແມ່ນເປ່ເພຈາກການຂົ່ນສົ່ງແຮ່ທາດ.
3. ບັນຫາໄຟຟ້າ, ນໍ້າປະປາ, ນ້ຳລິນ, ນໍ້າສະອາດຍັງບໍ່ພຽງພໍ ແລະ ຈຳນວນໜຶ່ງກໍ່ສ້າງແລ້ວ ແຕ່ເປ່ເພ ບໍ່ສະດວກໃນການນຳໃຊ້.
4. ບັນຫາການແບ່ງດິນແບ່ງປ່າກຳນົດເຂດດິນທຳການຜະລິດ, ປ່າຊົມໃຊ້ ແລະ ປ່າຫວງຫ້າມ ຍັງບໍ່ຈະແຈ້ງ ປະຊາຊົນຍັງບຸກລຸກຖາງປ່າຈຳນວນຫຼາຍ.
5. ຜູ້ປະກອບການໃນຂົງເຂດການຜະລິດ-ທຸລະກິດທີ່ໄປລົງທຶນຢູ່ແຂວງໄຊສົມບູນບໍ່ຫຼາຍ ເຮັດໃຫ້ບັນຫາລູກຫຼານທີ່ຮຽນຈົບມາແລ້ວບໍ່ມີວຽກຮອງຮັບ.
6. ບັນຫາການຂາດແຄນວິຊາການຊ່ວຍຊຸກຍູ້ການຜະລິດ, ຍົກຄຸນນະພາບ ແລະ ມາດຕະ ຖານການຜະລິດ ແລະ ບໍລິການລວມທັງການຊອກຕະຫຼາດຈຳໜ່າຍໃຫ້ແກ່ຜົນຜະລິດກະສິກຳທີ່ຕົກຕ່ຳໃນປັດຈຸບັນ.
7. ຜົນກະທົບຈາກບັນຫາເງິນເຟີ້, ນ້ຳມັນເຊື້ອໄຟ, ຄ່າຄອງຊີບສູງ ແລະ ຜົນກະທົບຈາກປະ ກົດການຫຍໍ້ທໍ້ໃນສັງຄົມເຊັ່ນ: ບັນຫາຢາເສບຕິດໂດຍສະເພາະສູນດັດສ້າງຜູ້ຕິດຢາເສບຕິດ ບໍ່ພຽງພໍ, ຜູ້ທີ່ໄດ້ຮັບການປ່ອຍຕົວແຕ່ຍັງບໍ່ສາມາດຢຸດເຊົາຢາເສບຕິດໄດ້ຢ່າງຖາວອນ ແລະ ບັນຫາອື່ນໆ.

ຕໍ່ບັນຫາດັ່ງກ່າວ, ໃນໄລຍະຜ່ານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງກໍໄດ້ຊຸກຍູ້ໃຫ້ອົງການປົກຄອງແຂວງດຳເນີນການແກ້ໄຂຕາມຄວາມສາມາດ, ກຳລັງແຮງ ແລະ ຊັບພະຍາກອນທີ່ມີໃນປັດຈຸບັນ.

ແຕ່ເນື່ອງຈາກແຂວງໄຊສົມບູນເປັນແຂວງທີ່ຫຍຸ້ງຍາກ ຂ້າພະເຈົ້າສະເໜີໃຫ້ພາກສ່ວນກ່ຽວຂ້ອງຂອງລັດຖະບານສຸມທຶນຮອນ ແລະ ຊັບພະຍາກອນໃນຂະແໜງການຂອງຕົນລົງຊຸກຍູ້ ແກ້ໄຂບັນຫາຢ່າງຈິງຈັງເພື່ອເຮັດໃຫ້ແຂວງໄຊສົມບູນທີ່ຍັງເປັນແຂວງທີ່ຫຍຸ້ງຍາກໄດ້ຮັບການພັດທະນາທຽມທັນກັບແຂວງອື່ນໆ.

ຂ່າວ: ປະຊາຊົນ