UNSC ປະນາມກຸ່ມຕາລີບັນ ຫລັງອອກນະໂຍບາຍ ຈຳກັດສິດໃນອັບການິດສະຖານ
ສະພາຄວາມໝັ້ນຄົງແຫ່ງ ສະຫະປະຊາຊາດ (UNSC) ໄດ້ອອກມາປະນາມຄຳສັ່ງຂອງລັດຖະບານຕາລີບັນຫ້າມບໍ່ໃຫ້ຜູ້ຍິງໃນອັບການິດສະຖານເຂົ້າຮຽນໃນມະຫາວິທະຍາໄລ ຫລື ເຮັດວຽກໃຫ້ກຸ່ມຊ່ວຍເຫລືອດ້ານມະນຸດສະທຳ, ພ້ອມຮຽກຮ້ອງຕາລີບັນເປີດໂອກາດໃຫ້ຜູ້ຍິງ ແລະ ເດັກຍິງໃນອັບການິດສະຖານໄດ້ມີສ່ວນຮ່ວມໃນກິດຈະກຳທາງສັງຄົມຢ່າງເຕັມສ່ວນ ແລະ ເທົ່າທຽມກັບເພດຊາຍ.
ການເຄື່ອນໄຫວດັ່ງກ່າວມີຂຶ້ນຫລັງວັນທີ 20 ທັນວາ ກະຊວງສຶກສາທິການລະດັບອຸດົມສຶກສາຂອງອັບການິດສະຖານໄດ້ສັ່ງໂຈະບໍ່ໃຫ້ນັກສຶກສາຍິງເຂົ້າຮຽນໃນລະດັບມະຫາວິທະຍາໄລໂດຍບໍ່ມີກຳນົດ, ຂະນະທີ່ເດັກຍິງຖືກສັ່ງຫ້າມບໍ່ໃຫ້ເຂົ້າຮຽນໃນລະດັບມັດທະຍົມປາຍນັບແຕ່ກາງເດືອນມີນາ.
ສ່ວນວັນທີ 24 ຜ່ານມາ, ລັດຖະບານຕາລີບັນໄດ້ອອກຄໍາສັ່ງໃຫ້ອົງການນອກພາກລັດ (NGO) ທັງຢູ່ໃນທ້ອງຖິ່ນ ແລະ ຈາກຕ່າງປະເທດຫ້າມບໍ່ໃຫ້ຜູ້ຍິງເຂົ້າຮ່ວມເຮັດວຽກນຳ ໂດຍອົງກອນໃຫ້ການຊ່ວຍເຫລືອລະດັບໂລກ 4 ແຫ່ງທີ່ພະຍາຍາມຊ່ວຍເຫລືອຊາວອັບການິດສະຖານຫລາຍລ້ານຄົນລະບຸໃນວັນທີ 25 ທັນວາວ່າ: ພວກເຂົາຕ້ອງໂຈະການດຳເນີນງານ ເພາະບໍ່ສາມາດສືບຕໍ່ພາລະກິດໄດ້ ຖ້າບໍ່ມີເຈົ້າໜ້າທີ່ຍິງ.
ສະມາຊິກ UNSC ທັງ 15 ປະເທດ ອອກຖະແຫລງການຮ່ວມກັນວ່າ: ການຫ້າມຜູ້ຍິງ ແລະ ເດັກຍິງເຂົ້າຮຽນໃນລະດັບມັດທະຍົມປາຍ ແລະ ມະຫາວິທະຍາໄລໃນອັບການິດສະຖານ “ບັນທອນການເຄົາລົບຕໍ່ສິດທິມະນຸດ ແລະ ເສລີພາບຂັ້ນພື້ນຖານ”. ຂະນະທີ່ ການສັ່ງຫ້າມຜູ້ຍິງເຮັດວຽກໃນອົງກອນຊ່ວຍເຫລືອນັ້ນຈະສົ່ງຜົນກະທົບຕໍ່ການສົ່ງມອບການຊ່ວຍເຫລືອດ້ານມະນຸດສະທຳໃນປະເທດຈຳນວນຫລາຍ.
ທ່ານ ອັນໂຕນິໂອ ກູເຕີເຣສ ເລຂາທິການອົງການສະຫະປະຊາຊາດ (UN) ໄດ້ກ່າວວ່າ: ການຈຳກັດສິດຜູ້ຍິງໃນອັບການິດສະຖານເປັນການລະເມີດສິດທິມະນຸດທີ່ບໍ່ຖືກຕ້ອງ ແລະ ຄໍາສັ່ງດັ່ງກ່າວຈະຕ້ອງຖືກຍົກເລີກ ໂດຍລະບຸວ່າ: “ການກະທຳທີ່ກີດກັນ ແລະ ປິດປາກຜູ້ຍິງ ແລະ ເດັກຍິງກໍ່ໃຫ້ເກີດຄວາມທຸກທໍລະມານຢ່າງໃຫຍ່ຫລວງ ແລະ ສ້າງຜົນກະທົບຕໍ່ປະສິດທິພາບຂອງຊາວອັບການິດສະຖານ”.
ກຸ່ມຕາລີບັນເຂົ້າປົກຄອງອັບການິດສະຖານອີກເທື່ອໜຶ່ງໃນເດືອນສິງຫາ 2021 ຫລັງອາເມລິກາປະກາດຖອນກຳລັງທະຫານອອກຈາກນະຄອນຫລວງກາບູນ ອັນເປັນການສິ້ນສຸດປະຕິບັດການທາງທະຫານທີ່ຍາວນານເຖິງ 20 ປີ ນັບແຕ່ເລີ່ມຕົ້ນຂຶ້ນຫລັງເຫດການ 9/11 ເມື່ອປີ 2001 ໂດຍຫລັງຈາກຕາລີບັນກັບມາຄອງອຳນາດອີກ ລັດຖະບານກໍໄດ້ອອກນະໂຍບາຍທີ່ມີລັກສະນະບັນທອນສິດຜູ້ຍິງເຊັ່ນ: ຫ້ອງຮຽນ ແລະ ທາງຍ່າງຕ້ອງມີການແຍກຊາຍ-ຍິງ ແລະ ຕ້ອງໃຫ້ຄູຜູ້ຍິງ ຫລື ຊາຍສູງອາຍຸສູນນັກຮຽນຍິງເທົ່ານັ້ນ. ຂະນະທີ່ໃນເດືອນມີນາຜ່ານມາ, ລັດຖະບານຕາລີບັນພິກປີ້ນຄຳເວົ້າທີ່ເຄີຍບອກໄວ້ວ່າ: ຈະໃຫ້ໂຮງຮຽນຍິງລະດັບຊັ້ນມັດທະຍົມປາຍເປີດການຮຽນໄດ້ອີກເທື່ອໜຶ່ງ ສົ່ງຜົນໃຫ້ຕອນນີ້ເດັກຍິງຫລາຍຄົນບໍ່ໄດ້ຮຽນຕໍ່.
ອ້າງອີງ:
- https://www.reuters.com/world/asia-pacific/un-official-meets-taliban-urges-reverse-ngo-female-worker-ban-2022-12-26/
- https://www.reuters.com/world/asia-pacific/un-security-council-denounces-taliban-bans-women-afghanistan-2022-12-27/
- https://www.bbc.com/news/world-asia-64106226
