ພາຍຸລະດູໜາວພັດຖະຫລົ່ມອາເມລິກາຢ່າງໜັກ ມີຜູ້ເສຍຊີວິດແລ້ວຢ່າງໜ້ອຍ 60 ຄົນ ຖ້ຽວບິນຖືກຍົກເລີກວັນລະຫລາຍພັນຖ້ຽວ

ທາງການອາເມລິກາລາຍງານຜົນກະທົບຈາກພາຍຸລະດູໜາວທີ່ພັດຖະຫລົ່ມຫລາຍລັດທົ່ວປະເທດ ສົ່ງຜົນໃຫ້ມີຜູ້ເສຍຊີວິດແລ້ວຢ່າງໜ້ອຍ 62 ຄົນ ເຊິ່ງຢູ່ເມືອງບັບຟາໂລ ລັດນິວຢອກ ທີ່ໄດ້ຮັບຜົນກະທົບໜັກທີ່ສຸດ ພົບຜູ້ເສຍຊີວິດເພີ່ມເປັນ 28 ຄົນ ແລະ ຍັງເກີດໄຟຟ້າມອດກະທົບຊາວເມືອງ 4.000 ກວ່າຄົນ.

ໂດຍຫລາຍວັນຜ່ານມາ, ເຈົ້າໜ້າທີ່ກູ້ໄພທ້ອງຖິ່ນຍັງພະຍາຍາມຄົ້ນຫາ ແລະ ຊ່ວຍເຫລືອຜູ້ລອດຊີວິດຢ່າງຕໍ່ເນື່ອງ. ຂະນະທີ່ຜູ້ເສຍຊີວິດຫລາຍຄົນຖືກພົບພາຍໃນລົດ ແລະ ກອງຫິມະໃນຫລາຍຈຸດ.

ຂະນະທີ່ທາງການເມືອງບັບຟາໂລໄດ້ລະດົມກໍາລັງຕໍາຫລວດ 100 ກວ່າຄົນ ເຂົ້າຄວບຄຸມການຈະລາຈອນພາຍໃນເມືອງ ເຊິ່ງຖະໜົນຫລາຍເສັ້ນຍັງຖືກປິດ ແລະ ຫ້າມການຂັບຂີ່ລົດ ເພື່ອປ້ອງກັນອັນຕະລາຍ ເນື່ອງຈາກມີຫິມະປົກຄຸມໜາ. ນອກຈາກນີ້ ຍັງມີລາຍງານການສວຍໂອກາດຂີ້ລັກງັດແງະ ແລະ ທຸບທຳລາຍສິ່ງຂອງໃນຮ້ານຄ້າຫລາຍແຫ່ງຂອງເມືອງ ເຊິ່ງຕຳຫລວດສາມາດຈັບຜູ້ກໍ່ເຫດໄດ້ແລ້ວ 4 ຄົນ.

ຜົນກະທົບຈາກພາຍຸລະດູໜາວຂະໜາດໃຫຍ່ທີ່ພັດປົກຄຸມອາເມລິກາເໜືອ ຄວບຄຸມການາດາຈົນເຖິງຕອນໃຕ້ຂອງອາເມລິກາ ສົ່ງຜົນໃຫ້ມີການຍົກເລີກຖ້ຽວບິນຫລາຍພັນຖ້ຽວໃນແຕ່ລະວັນ ໂດຍໃນເຊົ້າວັນທີ 27 ທັນວາ ຕາມເວລາທ້ອງຖິ່ນ ພົບວ່າມີຖ້ຽວບິນຍົກເລີກ 4.800 ກວ່າຖ້ຽວ ເຮັດໃຫ້ຜູ້ໂດຍສານຫລາຍໝື່ນຄົນຕົກຄ້າງຢູ່ໃນສະໜາມບິນຕ່າງໆທົ່ວປະເທດ.

ເຖິງຢ່າງໃດກໍຕາມ, ສະພາບອາກາດທີ່ໜາວເຢັນ ແລະ ເຕັມໄປດ້ວຍສີຂາວຂອງຫິມະ ຄາດວ່າຈະດີຂຶ້ນຫລັງຈາກທີ່ມີລາຍງານຫິມະຕົກໜ້ອຍລົງໃນວັນທີ 27 ທັນວາ ແລະ ລະດັບອຸນຫະພູມອຸ່ນຂຶ້ນເລັກໜ້ອຍ, ແຕ່ທາງການເຕືອນວ່າ: ອຸນຫະພູມທີ່ອຸ່ນຂຶ້ນອາດນຳມາເຊິ່ງບັນຫາອື່ນໆເຊັ່ນ: ນໍ້າຖ້ວມທີ່ເກີດຈາກການລະລາຍຂອງຫິມະຈຳນວນຫລາຍ.

ກ່ອນໜ້ານີ້, ປະທານາທິບໍດີ ໂຈ ໄບເດນ ຂອງອາເມລິກາ ໄດ້ອະນຸມັດການປະກາດສະຖານະການສຸກເສີນ ເພື່ອເປີດທາງໃຫ້ລັດຖະບານກາງສະໜັບສະໜູນການຊ່ວຍເຫລືອລັດນິວຢອກ ໂດຍທ່ານ ໄບເດນ ໄດ້ກ່າວສະແດງຄວາມເສຍໃຈຕໍ່ຜູ້ທີ່ສູນເສຍບຸກຄົນອັນເປັນທີ່ຮັກຈາກເຫດການໄພພິບັດໃນຄັ້ງນີ້.

ອ້າງອີງ:

https://www.bbc.com/news/world-us-canada-64099642