ຄວາມເບື່ອໜ່າຍ ອາດນໍາໄປສູ່ຄວາມຄິດທີ່ສ້າງສັນໃໝ່ໆໄດ້

ເຊື່ອວ່າຫລາຍໆຄົນໃນປັດຈຸບັນສິ່ງທໍາອິດທີ່ຈະເຮັດຫລັງຈາກຕື່ນນອນ ແມ່ນການຈັບໂທລະສັບຂຶ້ນມາເພື່ອເຂົ້າໄປໃນໂລກອອນລາຍແນ່ນອນ ແລະ ເລື່ອງແບບນີ້ ຖ້າບໍ່ລົບກວນໃຜມັນກໍບໍ່ແມ່ນເລື່ອງທີ່ຜິດ

.

ລ້າສຸດນີ້ໄດ້ມີການວິໄຈທີ່ອອກມາບອກວ່າ ການຫລິ້ນ Social Media ທຸກເທື່ອທີ່ເບື່ອມັນກໍອາດຈະເຮັດໃຫ້ເຮົາພາດຫລາຍສິ່ງຫລາຍຢ່າງໄດ້ເຊັ່ນກັນ, ເພາະມັນເຮັດໃຫ້ເຮົາພາດຄວາມເບື່ອທີ່ເອີ້ນວ່າ “Profound boredom” ນັ້ນເອງ

.

ນັກວິທະຍາສາດຈາກມະຫາວິທະຍາໄລບາດ (University of Bath) ແລະ ວິທະຍາໄລທິນິຕີ (Trinity Collage) ໄດ້ແບ່ງຄວາມເບື່ອຂອງຄົນເຮົາອອກເປັນ 2 ປະເພດຄື Superficial boredom ແລະ Profound boredom

.

– Superficial boredom ຫລື ຄວາມເບື່ອແບບຜິວເຜີນ: ເປັນພາວະຄວາມເບື່ອທີ່ພົບເຫັນໄດ້ຫລາຍທີ່ສຸດ ແບບທີ່ເຮົາເຄີຍຮູ້ສຶກເວລາຖ້າໃຜ, ຖ້າລົດ ຫລື ຖ້າເລີກວຽກໃນຊ່ວງ 10 ນາທີສຸດທ້າຍ

– Profound boredom ຫລື ຄວາມເບື່ອແບບເລິກເຊິ່ງ: ຈະເກີດຈາກການໃຊ້ເວລາດົນໆກັບຄວາມເບື່ອ ຫລື ຄວາມສັນໂດດ, ເຊິ່ງຊ່ວງເວລານີ້ຄົນຈະເລີ່ມຄໍາຖາມກ່ຽວກັບຄວາມຮູ້ສຶກຂອງຕົນເອງ ຫລື ການດໍາລົງຢູ່ຂອງພວກເຂົາ

.

ນັກປັດຊະຍາຊື່ດັງຂອງປະເທດເຢຍລະມັນທີ່ຊື່ວ່າ Martin Heidegger ເຄີຍບອກໄວ້ວ່າສາມາດປູທາງໄປສູ່ການເກີດຄວາມຄິດ ແລະ ກິດຈະກໍາທີ່ສ້າງສັນຂຶ້ນມາໄດ້
.

ນັກວິໄຈຍັງພົບອີກວ່າບັນຫາການໃຊ້ສື່ສັງຄົມອອນລາຍນັ້ນ ມັກຈະໄປຫຍຸດຄວາມເບື່ອຂອງຫລາຍຄົນໄວ້, ດູດເວລາ ແລະ ພະລັງງານການໃຊ້ຊີວິດຂອງຄົນເຫລົ່ານັ້ນໄປພ້ອມໆກັນ

.

ດັ່ງນັ້ນ ການເຂົ້າໄປຢູ່ໃນສັງຄົມອນລາຍ ມັນອາດຈະໄປຂັດຂວາງໃຫ້ຫລາຍຄົນບໍ່ເຂົ້າສູ່ສະຖານະຂອງຄວາມເບື່ອໜ່າຍແບບເລິກເຊິ່ງ, ທີ່ສາມາດເຮັດໃຫ້ພວກເຂົາຄົ້ນຫາຄວາມສົນໃຈໃໝ່ໆ ຫລື ແຮງບັນດານໃຈໄດ້ນັ້ນເອງ

ອ້າງອີງ

journals.sagepub.com/doi/10.1177/14705931221138617

http://www.bath.ac.uk/…/social-media-may-prevent-users…/