ນະຄອນຫລວງເຂັ້ມງວດ ກວດກາການຊື້-ຂາຍສັດປ່າຫວງຫ້າມ ພ້ອມຢຶດ- ທຳລາຍຖິ້ມ ແລະ ປັບໃໝ

ວັນທີ 23 ທັນວາ 2022 ຜ່ານມານີ້ ກອງກວດກາປ່າໄມ້ ນະຄອນຫຼວງວຽງຈັນ ໄດ້ທໍາລາຍຊິ້ນສ່ວນສັດປ່າທີ່ ຢຶດໄດ້ຈາກແມ່ຄ້າ ທີ່ລັກລອບຄ້າຂາຍຕາມທ້ອງຕະຫຼາດ ໃນນະຄອນຫຼວງວຽງຈັນ, ເຂົ້າຮ່ວມໂດຍ ທ່ານ ພອນ ສະຫວັນ ສູນທະວົງ ຫົວຫນ້າກອງກວດກາປ່າໄມ້ ນະຄອນຫຼວງວຽງຈັນ, ມີຫົວໜ້າ-ຮອງຫົວຫນ້າຂະແໜງ ການທີ່ກ່ຽວຂ້ອງ ພ້ອມດ້ວຍພະນັກງານວິຊາການ ພາຍໃນ ກອງກວດກາປ່າໄມ້ ເຂົ້າຮ່ວມ.

ທ່ານ ພອນສະຫວັນ ສູນທະວົງ ໃຫ້ຮູ້ວ່າ: ໃນໄລຍະຜ່ານມາ, ເຈົ້າຫນ້າທີ່ປ່າໄມ້ ແມ່ນໄດ້ເອົາໃຈໃສ່ ເປັນພິເສດຕໍ່ກັບການສະກັດກັ້ນລັກລອບຊື້-ຂາຍສັດນ້ໍາ ແລະ ສັດປ່າ ຜ່ານການລົງໂຄສະນາເຜີຍແຜ່, ແມ່ນໄດ້ເຮັດ ໃຫ້ປະຊາຊົນຈໍານວນໜຶ່ງທີ່ມີສັດປ່າໄວ້ຄອບຄອງນັ້ນ ມີ ຄວາມຕື່ນຕົວສະໝັກໃຈມອບສັດປ່າໃຫ້ແກ່ລັດ ເປັນປະເພດ ໂຕໝີ, ລີງ, ເສືອແມວ ຈໍານວນ 6 ໂຕ, ໃນນີ້ໄດ້ມອບຕໍ່ ໃຫ້ມູນນິທິອະນຸລັກສັດປ່າລາວ ບ້ານເກີນ ແຂວງວຽງຈັນ ຈໍານວນ 4 ໂຕ, ອີກ 2 ໂຕ ແມ່ນໄດ້ນໍາໄປມອບໃຫ້ສູນ ອະນຸລັກຫມີລາວ ແຂວງຫຼວງພະບາງ ເພື່ອນໍາໄປດູແລຮັກສາຕາມຂັ້ນຕອນຂອງຫຼັກວິຊາການ.

ນອກນັ້ນ, ຍັງໄດ້ລົງກວດກາຕາມແຜນເຄື່ອນໄຫວປະຈໍາເດືອນ, ກວດກາຕາມການລາຍງານຂອງພົນລະເມືອງດີເປັນຕົ້ນແມ່ນໄດ້ກວດກາຕາມສະຖານີລົດໂດຍສານ, ກວດກາຕາມໂຮງແຮມ, ຕາມຮ້ານອາຫານ, ຕາມຕະຫຼາດທີ່ເປັນເປົ້າໝາຍ ເຊັ່ນ: ຕະຫຼາດນາງາ ເມືອງ ນາຊາຍທອງ, ຕະຫຼາດລາວອົດຊີ ເມືອງສີໂຄດຕະບອງ, ຕະຫຼາດດົງຫນາກຄາຍ, ຕະຫຼາດຂຸດສາມບາດ ເມືອງໄຊ ທານີ ແລະ ຕະຫຼາດອື່ນໆ ພາຍໃນຕົວເມືອງ ໄດ້ທັງຫມົດ 43 ຄັ້ງ. ໃນນີ້, ໄດ້ພົບເຫັນສັດປ່າ ແລະ ຊິ້ນສ່ວນທີ່ວາງ ຂາຍ ຈໍານວນ 11 ຄັ້ງ ລວມທັງຫມົດມີ 299 ຊິ້ນສ່ວນ/ໂຕ, ນໍ້າໜັກ 126,6 ກິໂລ ຄື:

• ຊິ້ນສ່ວນ ແລະ ສັດທີ່ຕາຍ ມີ: ໄກ່ຂົວ, ບ່າງລົ້ວ, ເຫງັນແມວ, ກະຮອກ
• ປະເພດນົກ ແລະ ຊີ້ນໝູປ່າ, ຊີ້ນປານ ຈໍານວນ 247 ຊິ້ນ ສ່ວນ/ໂຕ, ນໍ້າໜັກ 81,2 ກິໂລ ແມ່ນຈະໄດ້ຈັດພິທີທໍາລາຍຖິ້ມ, ສ່ວນສັດມີຊີວິດ ມີ: ເຫງັນຫາງຂໍ, ເຕົ່າ, ນົກ ຈໍານວນ 52 ໂຕ, ນ້ໍາໜັກ 45,4 ກິໂລ ແມ່ນໄດ້ປ່ອຍຄືນສູ່ທໍາມະຊາດແລ້ວ ຈໍານວນ 4 ຄັ້ງ ຢູ່ເຂດອຸທິຍານແຫ່ງຊາດ ພູເຂົາຄວາຍ ແລະ ວັງສະຫງວນ ບ້ານນາເລີດ ເມືອງປາກງື່ມ ນະຄອນຫຼວງວຽງຈັນ.

ພ້ອມນັ້ນ, ກໍໄດ້ສົມທົບກັບຈັດສັນຕະຫຼາດສຶກສາອົບຮົມພ້ອມກັນເຮັດບົດບັນທຶກກ່າວເຕືອນ, ບັນດາຊາວຄ້າຂາຍຢູ່ພາຍໃນຕະຫຼາດ ເພື່ອບໍ່ໃຫ້ຊື້-ຂາຍ ແລະ ນໍາເອົາສັດນໍ້າ ແລະ ສັດປ່າທີ່ຜິດກົດໝາຍ ມາວາງ ຂາຍຕາມຕະຫຼາດດັ່ງກ່າວ ໄດ້ທັງຫມົດ 4 ຄັ້ງ ມີ 11 ຮ້ານ.

ໂອກາດດັ່ງກ່າວ, ທ່ານຫົວຫນ້າກອງກວດກາປ່າໄມ້ ກໍໄດ້ຮຽກຮ້ອງມາຍັງພະນັກງານ, ທະຫານ, ຕໍາຫຼວດ ຕະຫຼອດຮອດປະຊາຊົນບັນດາເຜົ່າ ຈົ່ງຊ່ວຍກັນເປັນ ເຈົ້າການສະກັດກັ້ນ ແລະ ຢຸດເຊົາການບຸກລຸກທໍາລາຍ ປ່າໄມ້, ທີ່ດິນປ່າໄມ້, ຢຸດການລ່າ, ການຊື້-ຂາຍສັດປ່າ ແລະ ຊິ້ນສ່ວນສັດປ່າ ທີ່ຜິດຕໍ່ລະບຽບກົດໝາຍ, ນໍາເອົາ ລະບຽບກົດໝາຍໄປເຜີຍແຜ່ໃຫ້ລູກຫຼານ ແລະ ພີ່ນ້ອງ ທຸກຄົນໄດ້ຮັບຮູ້ ແລະ ເຂົ້າໃຈຕໍ່ລະບຽບກົດໝາຍ, ຈົ່ງພ້ອມກັນຊ່ວຍເປັນເຈົ້າການໃນການຄຸ້ມຄອງປົກປັກ ຮັກສາ ແລະ ອະນຸລັກຊັບພະຍາກອນປ່າໄມ້, ສັດນໍ້າ ແລະ ສັດປ່າໃຫ້ຍືນຍົງຢູ່ຕະຫຼອດໄປ.