ຄະນະປະຈຳສະພາແຫ່ງຊາດ ເນັ້ນໃຫ້ສານປະຊາຊົນສູງສຸດເອົາໃຈໃສ່ 4 ບັນຫາສຳຄັນ
ວັນທີ 26 ທັນວາ 2022, ທ່ານ ຄໍາແພງ ວິລະພັນ ປະທານກໍາມາທິການຍຸຕິທໍາ ຕາງໜ້າຄະນະປະຈໍາສະພາແຫ່ງຊາດ ປະກອບຄໍາເຫັນຕໍ່ບົດລາຍງານ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2022 ເເລະ ເເຜນການປະຈໍາປີ 2023 ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX, ໂດຍການເປັນປະທານກອງປະຊຸມຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ.
ທ່ານ ຄໍາແພງ ວິລະພັນ ກ່າວຂໍສະແດງຄວາມຊົມເຊີຍຕໍ່ສານປະຊາຊົນສູງສຸດ ທີ່ໄດ້ຕັ້ງໜ້າຈັດຕັ້ງປະຕິບັດແຜນວຽກຈຸດສຸມປະຈໍາປີ 2022 ຂອງຕົນຕາມທີ່ໄດ້ກໍານົດໄວ້ໃນມະຕິຂອງກອງປະຊຸມສະໄໝສາມັນເທື່ອທີ 2 ຂອງສະ ພາແຫ່ງຊາດ ຊຸດທີ IX ສະບັບເລກທີ 26/ສພຊ, ລົງວັນທີ 16 ພະຈິກ 2021 ດ້ວຍຄວາມຮັບຜິດຊອບສູງ ແລະ ມີຜົນສໍາເລັດໃນຫລາຍດ້ານເປັນຕົ້ນ: ໄດ້ເອົາໃຈໃສ່ຍົກສູງຄຸນນະພາບການດໍາເນີນຄະດີຂອງສານຂັ້ນຕົ້ນ, ຂັ້ນອຸທອນ ແລະ ຂັ້ນ ລົບລ້າງໃຫ້ດີຂຶ້ນເປັນກ້າວໆ ຊຶ່ງສະແດງອອກຄື: ສານຂັ້ນຕົ້ນ ໄດ້ແກ້ໄຂຄະດີຈໍານວນ 5.879 ເລື່ອງ, ຄູ່ຄວາມໃຊ້ສິດຂໍອຸທອນຕາມກົດໝາຍ 543 ເລື່ອງ ເທົ່າກັບ 9,23% ທຽບໃສ່ແຜນການປີ 2022 ອັດຕາການຂໍອຸທອນບໍ່ໃຫ້ເກີນ 15%, ຄູ່ຄວາມເຫັນດີຕໍ່ຄໍາຕັດສິນຂອງສານ 5.336 ເລື່ອງ ກວມອັດຕາສ່ວນ 90,76%; ໄດ້ຍົກລະດັບຄວາມຮູ້ຄວາມສາມາດທາງດ້ານການເມືອງແນວຄິດ-ທິດສະດີ ແລະ ວິຊາສະເພາະໃຫ້ແກ່ສະມາຊິກພັກ, ພະນັກງານ-ລັດຖະກອນ ໂດຍສະເພາະແມ່ນຜູ້ພິພາກສາ ແລະ ຈ່າສານ ໄດ້ຮັບການຍົກສູງຈັນຍາບັນ, ຈັນຍາທໍາ ແລະ ປະຕິບັດເຂັ້ມງວດຂໍ້ຫ້າມຂອງຜູ້ພິພາກສາ, ພະນັກງານສານປະຊາຊົນ ແລະ ສານທະຫານ; ແຕ່ເຖິງຢ່າງໃດກໍຕາມຜ່ານການຮັບຟັງການລາຍງານຂອງທ່ານປະທານສານປະຊາຊົນສູງສຸດ ແລະ ການເຄື່ອນໄຫວຕິດຕາມກວດກາ ຄະນະປະຈໍາສະພາແຫ່ງຊາດເຫັນວ່າຍັງມີບາງບັນຫາທີ່ຄວນເອົາໃຈໃສ່ຕື່ມ ດັ່ງນີ້:
1). ການພິຈາລະນາຄະດີທີ່ເຂົ້າມາສານຈໍານວນໜຶ່ງຍັງຊັກຊ້າ, ບໍ່ຖືກຕ້ອງຕາມກໍານົດເວລາທີ່ກົດໝາຍກໍານົດ; ການເກັບກໍາຂໍ້ມູນບໍ່ທັນຄົບຖ້ວນ ແລະ ພາວະວິໄສ, ການຊັ່ງຊາ, ຕີລາຄາ, ວິເຄາະ, ວິໄຈຂໍ້ມູນຫລັກຖານ ຈໍານວນໜຶ່ງ ບໍ່ຖືກຕ້ອງຕາມເຫດການຕົວຈິງ; ການກໍານົດເຫດການປະເດັນຂໍ້ຂັດແຍ່ງຍັງຄຸມເຄືອ ພາໃຫ້ການດໍາເນີນຄະດີບໍ່ຮອບດ້ານ, ຄົບຖ້ວນ ແລະ ພາວະວິໄສ; ການຮຽກເອົາບຸກຄົນທີ່ສາມ ແລະ ຜູ້ກ່ຽວຂ້ອງກັບຄະດີ ເຂົ້າຮ່ວມໃນການດໍາເນີນຄະດີ ແລະ ການເປີດການໂຕ້ຖຽງໃນທີ່ປະຊຸມສານຍັງເຮັດໄດ້ໜ້ອຍ; ການຂຽນຄໍາຕັດສິນ, ຄໍາພິພາກສາຄະດີບາງເລື່ອງຍັງບໍ່ທັນຊີ້ແຈງ, ຕອບຖືກປະເດັນຂໍ້ຂັດແຍ່ງເປັນສາຍເຫດໜຶ່ງທີ່ພາໃຫ້ຄູ່ຄວາມມີການຂໍອຸທອນ, ຂໍລົບລ້າງຄະດີ ແລະ ການແກ້ໄຂຄະດີຈໍານວນໜຶ່ງ ຍັງຫລົບໄປຫລົບມາຫລາຍຄັ້ງ, ການແກ້ໄຂຄະດີຂອງສານປະຊາຊົນ ໃນປີ 2022 ປະຕິບັດໄດ້ພຽງແຕ່ 66,18% ບໍ່ບັນລຸຄາດໝາຍທີ່ກໍານົດໄວ້ໃນມະຕິຂອງສະພາແຫ່ງຊາດ (85%);
2). ການຄົ້ນຄວ້າຄະດີຂອງສານຂັ້ນອຸທອນຍັງບໍ່ທັນຄົບຖ້ວນ ແລະ ຮອບດ້ານແທ້ພາຍຫລັງໄດ້ພິພາກສາແລ້ວຄູ່ຄວາມຂໍລົບລ້າງກວມເຖິງ 54,46% ຊຶ່ງເຫັນວ່າເປັນອັດຕາສ່ວນສູງ; ການປະຕິບັດສິດ ແລະ ໜ້າທີ່ຂອງສານປະຊາຊົນຂັ້ນລົບລ້າງທີ່ພິພາກສາທາງດ້ານກົດໝາຍຍັງມີກໍລະນີບໍ່ທັນຮັບປະກັນຄວາມຖືກຕ້ອງຕາມກົດໝາຍ ແລະ ຄວາມເປັນຈິງ, ການຕິດຕາມກວດກາຄໍາຕັດສິນຂອງສານຂັ້ນຕົ້ນ ແລະ ການພິພາກສາຄະດີຂອງສານຂັ້ນ ອຸທອນ ຍັງບໍ່ທັນເຂັ້ມງວດ ເປັນຊ່ອງຫວ່າງເຮັດໃຫ້ຄູ່ຄວາມມີການສະເຫນີຂໍຮື້ຟື້ນຄະດີ ແລະ ຮ້ອງຂໍຄວາມເປັນ ທໍາມາຍັງສະພາແຫ່ງຊາດ ແລະ ອົງການລັດຂັ້ນຕ່າງໆ;
3). ການປະເມີນຜູ້ພິພາກສາດີ-ເກັ່ງ ຍັງບໍ່ໄປຕາມແຜນການທີ່ວາງໄວ້, ການຕິດຕາມກວດກາການປະຕິບັດໜ້າທີ່ຂອງຜູ້ພິພາກສາ ແລະ ຈ່າສານ ບໍ່ທັນເຂັ້ມງວດ ແລະ ແທດເຖິງ ເຮັດໃຫ້ການຄົ້ນຄວ້າເລື່ອນຊັ້ນ, ຂັ້ນ, ການບັນຈຸ, ສັບຊ້ອນຜູ້ພິພາກສາ ແລະ ບຸກຄະລາກອນຂອງສານປະຊາຊົນຢູ່ຂັ້ນທ້ອງຖິ່ນຈໍານວນໜຶ່ງບໍ່ທັນຕອບສະໜອງໄດ້ຕາມຄວາມຮຽກຮ້ອງຕ້ອງການເປັນຕົ້ນ ຢູ່ສານປະຊາຊົນເຂດ; ພະນັກງານ ແລະ ຜູ້ພິພາກສາຈໍານວນໜຶ່ງຈັນຍາບັນ, ຈັນຍາທໍາ ແລະ ຄຸນທາດການເມືອງບໍ່ທັນສູງຍັງມີການລະເມີດກົດໝາຍ;
4). ການສ້າງ, ປັບປຸງກົດໝາຍ ແລະ ການຜັນຂະຫຍາຍມາດຕາຂອງກົດໝາຍອອກເປັນນິຕິກໍາໃຕ້ກົດໝາຍຍັງເຮັດໄດ້ໜ້ອຍ ແລະ ຊັກຊ້າເປັນຕົ້ນ: ລະບຽບການຄຸ້ມຄອງຜູ້ພິພາກສາ ທີ່ໄດ້ກໍານົດໄວ້ໃນ ມາດຕາ 36 ຂອງ ກົດໝາຍວ່າດ້ວຍຜູ້ພິພາກສາ, ມາດຕະຖານຂອງຈ່າສານ, ການກໍານົດດັດສະນີຂັ້ນເງິນເດືອນສະເພາະ ຂອງຜູ້ພິພາກສາ, ຜູ້ຊ່ວຍຜູ້ພິພາກສາ ເເລະ ຈ່າສານ ທີ່ໄດ້ກໍານົດໄວ້ໃນກົດໝາຍວ່າດ້ວຍສານປະຊາຊົນ ຍັງບໍ່ທັນຜັນຂະ ຫຍາຍອອກເປັນລະບຽບການສະເພາະເທືອ.
