ເຈົ້າໜ້າທີ່ ໄວລຸ້ນມົ້ວສຸມກິນກາເຟ ປະສົມສານເສບຕິດ ແລະ ນໍ້າກະທ່ອມ ມາສຶກສາອົບຮົມ

ໃນວັນທີ 21 ທັນວາ 2022 ຜ່ານມາ, ເຈົ້າໜ້າທີ່ຕຳຫຼວດ ປກສ ເມືອງທ່າແຂກ ໄດ້ນໍາຕົວກຸ່ມມົ້ວສຸມກິນກາເຟທີ່ມີສານເສບຕິດ ແລະ ນໍ້າກະທ່ອມ ຈຳນວນ 5 ຄົນ ຍິງ 2 ຄົນ ມາສຶກສາອົບຮົມກ່າວເຕືອນ, ມີທ່ານ ພັຕ ສີທາ ວົງພັກດີ ຮອງພະແນກຕຳຫຼວດ ປກສ ເມືອງທ່າແຂກ, ມີ ປກສ ກຸ່ມຈອມທອງ, ອຳນາດການປົກຄອງບ້ານໂພນສະໜາມ, ຜູ້ປົກຄອງກຸ່ມໄວລຸ້ນດັ່ງກ່າວເຂົ້າຮ່ວມ.

ທ່ານ ພັຕ ສີທາ ວົງພັກດີ ໄດ້ອະທິບາຍກ່ຽວກັບກົດໝາຍ ແລະ ຜົນຮ້າຍຂອງສານເສບຕິດດັ່ງກ່າວ ເປັນຕົ້ນແມ່ນແຈ້ງການຂອງ ລັດຖະມົນຕີ ກະຊວງປ້ອງກັນຄວາມສະຫງົບ ສະບັບເລກທີ 13/ປກສ, ລົງວັນທີ14 ກັນຍາ 2022 ກ່ຽວກັບ ການເພີ່ມທະວີການຄວບຄຸມ ແລະ ສະກັດກັ້ນການປູກ, ຜະລິດ, ປຸງແຕ່ງ, ຊົມໃຊ້, ຄ້າຂາຍ, ຈຳໜ່າຍ, ຂົນສົ່ງ, ມີໄວ້ຄອບຄອງ, ນຳເຂົ້າ, ສົ່ງອອກ ພືດທີ່ມີສານເສບຕິດປະເພດຕ່າງໆໂດຍບໍ່ຖືກຕ້ອງຕາມກົດໝາຍ.

ສະນັ້ນ, ເພື່ອເປັນການຜັນຂະຫຍາຍບັນດານິຕິກຳ, ຄຳສັ່ງກ່ຽວກັບ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ແລະ ເປັນການເພີ່ມທະວີວຽກງານກວດກາ, ຄວບຄຸມ, ສະກັ້ດກັ້ນ ແລະ ຕ້ານຢາ ເສບຕິດດັ່ງກ່າວ, ເຈົ້າໜ້າທີ່ວິຊາສະເພາະ ຈຶ່ງໄດ້ນໍາຕົວຜູ້ຖືກເຄາະຮ້າຍ ຈໍານວນ 5 ຄົນ ຍິງ 2 ຄົນ ທີ່ມີການເຄື່ອນໄຫວກະທຳຜິດຕໍ່ປະມວນກົດໝາຍອາຍາ ປີ 2017 ໜວດທີ 8 ມາດຕາ 320 ແລະ ມາດຕາ 321 ຂອງກົດໝາຍວ່າດ້ວຍ ຢາເສບຕິດ ມາສຶກສາອົບຮົມກ່າວເຕືອນ ແລະ ການກະທຳຜິດດັ່ງກ່າວ ມັນໄດ້ສ້າງຜົນກະທົບຕໍ່ສຸຂະພາບ, ຊີວິດ, ຊັບສິນ ແລະ ຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍທາງສັງຄົມ.

ພາຍຫລັງສຶກສາອົບຮົມກ່າວເຕືອນພວກກ່ຽວສຳເລັດແລ້ວ, ເຈົ້າໜ້າທີ່ຕຳຫລວດ ປກສ ເມືອງທ່າແຂກ ຍັງໄດ້ສ້າງບົດບັນທຶກກ່າວເຕືອນ ເພື່ອໃຫ້ພວກກ່ຽວມີການປ່ຽນແປງພຶດຕິກຳຂອງຕົນເອງ ແລະ ຖ້າຫາກພວກກ່ຽວຍັງໄດ້ສືບຕໍ່ກະທຳຜິດອີກ ແມ່ນຈະຖືກເຈົ້າໜ້າທີ່ນຳຕົວມາດຳເນີນຄະດີຕາມກົດໝາຍຢ່າງເຂັ້ມງວດ.