ສສຊ ເຂດ6 ແຂວງຫົວພັນ ສະເໜີໃຫ້ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ພິຈາລະນາການດຳເນີນຄະດີຢູ່ສານຂັ້ນຕົ້ນຢ່າງລະອຽດ

ວັນທີ 27 ທັນວາ 2022 ນີ້, ທ່ານ ຄຳແພງ ວິລະພັນ ສະມາຊິກສະພາແຫ່ງຊາດເຂດເລືອກຕັ້ງທີ 6 ແຂວງຫົວພັນ ໄດ້ມີຄຳເຫັນປະກອບຕໍ່ບົດລາຍງານຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ໃນກອງປະຊຸມສະໄໝາສາມັນເທື່ອທີ 4 ຂອງສະພາແຫ່ງຊາດຊຸດທີ IX ພາຍໃຕ້ການເປັນປະທານຂອງທ່ານ ນາງ ສູນທອນ ໄຊຍະຈັກ ປະທານສະພາແຫ່ງຊາດ.
ທ່ານ ຄຳແພງ ວິລະພັນ ໄດ້ສະເໜີວ່າ: ຕາມກົດໝາຍແລ້ວການດຳເນີນຄະດີສຳຄັນທີ່ສຸດແມ່ນການດຳເນີນຄະດີຢູ່ສານຂັ້ນຕົ້ນ, ແຕ່ໃນສະພາບຄວາມເປັນຈິງແລ້ວກວດກາເບິ່ງບັນດາຄຳຮ້ອງຂໍຄວາມເປັນທຳຂອງປະຊາຊົນທີ່ເຂົ້າມາສູ່ສະພາແຫ່ງຊາດກໍຄືອົງການຕ່າງໆ ພວກເຮົາສາມາດສ່ອງແສງໃຫ້ເຫັນວ່າ ການດຳເນີນຄະດີຂອງສານຂັ້ນຕົ້ນ ອາດຈະແມ່ນຍ້ອນຄວາມສາມາດ ແລະ ວິທີການ, ມາດຕະການຈຳນວນໜຶ່ງຍັງບໍ່ທັນເຂັ້ມງວດ. ສະນັ້ນເຮັດໃຫ້ການດຳເນີນຄະດີສານຂັ້ນຕົ້ນແມ່ນຂອດການເກັບກຳຂໍ້ມູນ ຫລື ການສືບສວນສອບສວນໃນເບື້ອງຕົ້ນຍັງບໍ່ທັນລະອຽດຄົບຖ້ວນເຮັດໃຫ້ການໂຕ້ແຍ້ງຂໍ້ມູນຫລັກຖານຢູ່ໃນສານຂັ້ນຕ້ົນບໍ່ທັນຮັດກຸມ.
ສ່ວນການໄຕ່ສວນຄະດີໃນທີ່ປະຊຸມສານຂັ້ນຕົ້ນໄດ້ກຳນົດລະອຽດແລ້ວຂັ້ນຕອນການໂຕ້ແຍ້ງໄປທີ່ປະຊຸມສານ ຖ້າເຮົາປະຕິບັດກົດໝາຍຄິດວ່າຈະເຮັດໃຫ້ການດຳເນີນຄະດີຄວາມໂປ່ງໃສ ແລະ ຍຸຕິທຳຫລາຍຂຶ້ນ. ໂດຍສະເພາະການດຳເນີນຄະດີຢູ່ໃນສານຂັ້ນລົບລ້າງສິ່ງທີ່ຄວນເອົາໃຈໃສ່ ແມ່ນການຊີ້ແຈງ ການຕອບແກ້ບັນດາຂໍ້ມູນຫລັກຖານ ຫລື ຂໍ້ສະເໜີຂອງຜູ້ຮ້ອງຂໍຄວາມເປັນທຳ ຍັງບໍ່ທັນຊັດເຈນ ເຮັດໃຫ້ຄູ່ຄວາມມີຄວາມຫລົບໄປຫລົບມາ.