ສສຊ ສະເໜີສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ແກ້ໄຂບັນຫາຄວາມຊັກຊ້າຂອງຄະດີ
December 27, 2022 - 11:25 AM
ສສຊ ປະກອບຄຳເຫັນໃສ່ບາງເນື້ອໃນຮ່າງບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2022 ແລະ ທິດທາງແຜນການ ປີ 2023ຂອງສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ໃນວັນທີ 27 ທັນວາ 2022 ນີ້
ທ່ານນາງມີນາພອນ ຈັນສົມພູ ສະມາຊິກສະພາແຫ່ງຊາດເຂດເລືອກຕັ້ງທີ17 ແຂວງອັດຕະປືສະເໜີໃຫ້ສານປະຊາຊົນສູງສຸດ ແລະ ອົງການໄອຍະການປະຊາຊົນສູງສຸດ ເອົາໃຈໃສ່ ຍົກລະດັບຄວາມຮູ້ຄວາມສາມາດດ້ານວຽກງານວິຊາສະເພາະໃຫ້ຜູ້ພິພາກສາ ແລະພະນັກງານໄອຍະການແຕ່ລະຂັ້ນໃຫ້ຫຼາຍຂຶ້ນຕື່ມອີກ ເພື່ອຮັບປະກັນເຮັດໃຫ້ການຕັດສິນຄະດີຕ່າງໆ ມີຄວາມຖືກຕ້ອງຊັດເຈນ, ຍຸຕິທໍາ ເພາະເນື່ອງຈາກວ່າໄລຍະຜ່ານມາເຫັນວ່າພາກສ່ວນກ່ຽວຂ້ອງຍັງບໍ່ທັນເອົາໃຈໃສ່ເຂົ້າໃນວຽກງານນີ້ດີເທົ່າທີ່ຄວນເຮັດໃຫ້ເກີດຊ່ອງວ່າງໃນການຕັດສິນຄະດີ, ການດໍາເນີນຄະດີມີລັກສະນະຊັກຊ້າ, ແກ່ຍາວ ລົບໄປລົບມາ ແລະ ອື່ນໆ.
ທ່ານຄໍາສິງ ໄຊສົມແພງ ສະມາຊິກສະພາແຫ່ງຊາດເຂດເລືອກຕັ້ງທີ 14 ແຂວງສາລະວັນ ໄດ້ສະເໜີໃຫ້ສານປະຊາຊົນສູງສຸດເພີ່ມທະວີໃນການສັງເກດຕີລາຄາໃຫ້ເລີກເຊິ່ງແລະພາວະວິໄສ ກ່ຽວກັບບົດບາດຂອງຕົນເອງໃນການດໍາເນີນຄະດີ,ການຕັດສີນ ແລະ ພິພາກສາຄະດີຕ່າງໆ ໃຫ້ຫຼາຍຂຶ້ນກວ່າເກົ່າ ເນື່ອງຈາກວ່າໄລຍະຜ່ານມາຍັງເຮັດບໍ່ທັນໄດ້ດີເທົ່າທີ່ຄວນ ເຮັດໃຫ້ການຕັດສິນຄະດີຕ່າງໆເກີດຄວາມຊັກຊ້າ ແລະ ອື່ນໆ.
ທ່ານ ພົນຕີ ສາຍໃຈ ກົມມະສິດ ສະມາຊິກສະພາແຫ່ງຊາດເຂດເລືອກຕັ້ງທີ15 ແຂວງຈໍາປາສັກ ສະເໜີໃຫ້ພາກສ່ວນສານປະຊາຊົນສູງສຸດກວດກາເບິ່ງຄືນກ່ຽວກັບໂຕເລກເງິນສົດທີ່ສານຕັດສິນຢືດຊັບຜູ້ຖືກຫາໄປແລ້ວ ໃນໄລຍະຜ່ານມາເຫັນວ່າຍັງມີບາງໂຕເລກມີຈໍານວນໜ້ອຍເກີນໄປ ລວມເຖິງ ກວດກາຄືນກ່ຽວກັບບາງໂຕເລກການແກ້ໄຂຄະດີອາຍາຢູ່ສານຂັ້ນຕົ້ນ ເຫັນວ່າຍັງບໍ່ທັນສອດຄ່ອງຕາມຄວາມເປັນຈິງເທົ່າທີ່ຄວນ.
ຮ່າງບົດລາຍງານດັ່ງກ່າວ, ສະເໜີໂດຍທ່ານນາງວຽງທອງ ສີພັນດອນ ປະທານສານປະຊາຊົນສູງສຸດ ແລະ ທ່ານໄຊຊະນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດໃນວັນທີ 26 ທັນວາ ຜ່ານມາ, ເພື່ອແນໃສ່ເຮັດໃຫ້2ບົດລາຍງານດັ່ງກ່າວ, ມີເນື້ອໃນຄົບຖ້ວນ ແລະ ຮັດກຸມຂຶ້ນກວ່າເກົ່າ ສາມາດຈັດຕັ້ງປະຕິບັດໄດ້ຢ່າງມີປະສິດທິພາບແລະປະສິດທີຜົນ ພ້ອມທັງສອດຄ່ອງກັບສະພາບເງື່ອນໄຂຕົວຈິງຂອງປະເທດເຮົາ.
