ຫງາຍເງີບ ກິນອີ່ມເຊັກບິນ 7,3 ລ້ານກວ່າກີບ ບໍ່ວ່າຈະເປັນຄວາມຈິງ ຫລື ເປັນການສ້າງກະແສ ລ້ວນແຕ່ເປັນໄປໃນທາງລົບ
ວັນທີ 26 ທັນວາ 2022 ນີ້ມີກະແສຮືຮາໃນໂລກອອນລາຍ ຕໍ່ກໍລະນີມີຜູ້ໂພສບິນລາຍການອາຫານ ຢູ່ງານບຸນກິນຈຽງແຂວງຊຽງຂວາງ ໃນວັນທີ 25 ທັນວາ ຜ່ານມາ ເປັນບິນທີ່ມີລາຄາໂພດແພງຈົນຜູ້ໄດ້ເຫັນຕ້ອງຮ້ອງກາກອອກມາທັນທີ.
ໃນບິນດັ່ງກ່າວ ມີ ມີ 8 ລາຍການ ຄື: ໄກ່ ໂຕ່ລະ 5 ແສນກີບ, ປາ ໂຕລະ 2 ແສນກີບ, ເຂົ້າໜຶ້ງສຸກ 70 ພັນກີບ, ປີ້ງ (ບໍ່ຮູ້ວ່າປີ້ງຫຍັງ) 3 ແສນກີບ, ເຂົ້າຫລາມ 60 ພັນກີບ, ຕຳ 60 ພັນກີບ, ເບຍ 40 ພັນກີບ ແລະ ນໍ້າດື່ມ 15 ພັນກີບ ເຊິ່ງເມື່ອລວມໆກັນເປັນເງິນ 7.345.000 ກີບ.
ເມື່ອຊາວເນັດເຫັນແນວນັ້ນກໍຕົກໃຈວ່າສິນຄ້າແຕ່ລະຢ່າງແພງເກີນໄປ ຕົວຢ່າງໄກ່ ໂຕລະ 5 ແສນກີບ, ປາໂຕລະ 12 ແສນກີບ ແຕ່ກໍບໍ່ຮູ້ວ່ານໍ້າໜັກແຕ່ລະໂຕເທົ່າໃດ ເຊິ່ງບາງຄົນແຊວວ່າ ອາດແມ່ນໄກ່ຕີກໍເປັນໄດ້ ຫລື ປາແຊວມອນ, ບາງຄົນກໍມອງວ່າ ອາດເປັນພຽງການສ້າງກະແສ ຫລື ແນວໃດ ?
ຄວາມຈິງ ເລື່ອງແບບນີ້ບໍ່ໄດ້ເກີດຂຶ້ນມາໃນມື້ໜຶ່ງຍາມດຽວ ເຮົາມັກເຫັນເຫດການແບບນີ້ຢູ່ເປັນປະຈຳ ໂດຍສະເພາະໃນງານເທສະການຕ່າງໆ ແຕ່ສິ່ງສຳຄັນ ລູກຄ້າຜູ້ໃຊ້ບໍລິການຕ້ອງເຊັກລາຄາກ່ອນ ແລະ ຜູ້ຂາຍຕ້ອງແຈ້ງລາຄາກັບລູກຄ້າກ່ອນ ເພື່ອບໍ່ໃຫ້ມີການໄດ້ປຽບເສຍປຽບ ຫລື ເປັນການສວຍໂອກາດ.
ຈາກຄວາມຄິດເຫັນສັງຄົມເຮົາສາມາດມອງເລື່ອງນີ້ເປັນປະເດັນ ຄື: 1 ຖ້າຫາກເລື່ອງນີ້ເປັນການສ້າງກະແສ ຜູ້ໂພສໃບບິນຕ້ອງຊີ້ແຈງຕໍ່ສັງຄົມວ່າເຮັດໄປເພື່ອຫຍັງ, ມີຈຸດປະສົງແນວໃດ ແລະ 2. ຖ້າຫາກເປັນເລື່ອງຈິງ ແມ່ຄ້າຕ້ອງຊີ້ແຈງຕໍ່ສັງຄົມວ່າ ສິນຄ້ານັ້ນແພງຍ້ອນຫຍັງ, ບວກຄ່າຫຍັງເຂົ້າໄປແດ່, ເປັນລາຄາທີ່ໄດ້ຜ່ານກຳມະການຈັດງານແລ້ວບໍ່, ກ່ອນລູກຄ້າຈະເຂົ້າຮ້ານໄດ້ນຳສະເໜີລາຄາແລ້ວ ຫລືບໍ່, ລູກຄ້າໄດ້ຖາມລາຄາກ່ອນ ຫລືບໍ່ ແລະ ອື່ນໆ.
ເຖິງຢ່າງໃດກໍຕາມ ບໍ່ວ່າຈະເປັນການສ້າງກະແສ ຫລື ເລື່ອງຈິງ ກະແສນີ້ກໍລ້ວນແຕ່ເປັນໄປທາງລົບ, ເປັນກະແສທີ່ບໍ່ດີເທົ່າທີ່ຄວນ ເພາະພວກເຫັນຂະບວນການສ້າງຄວາມເສຍຫາຍດ້ານການບໍລິການ, ການບໍລິໂພກ ແລະ ການຊື້ຂາຍເກີນລາຄາ ເຮັດໃຫ້ສັງຄົມ ເບິ່ງໃນທາງທີ່ບໍ່ດີ ເຊິ່ງພາກສ່ວນກ່ຽວຂ້ອງຕ້ອງລົງຕິດຕາມກວດກາ ແລະ ນຳເອົາທັງສອງຝ່າຍມາຊີ້ແຈງຕໍ່ສັງຄົມໃຫ້ໄດ້.
ຫາກມີຄວາມຄືບໜ້າທີມຂ່າວຈະນຳມາສະເໜີໃຫ້ທ່ານໄດ້ຮັບຊາບຕື່ມ.
