ຍທຂ ຊີ້ແຈງການຄຸ້ມຄອງ-ຈັດຕັ້ງປະຕິບັດໂຄງການເຫັນວ່າຍັງບໍ່ໄປຕາມຂັ້ນຕອນຂອງກົດໝາຍ
ທ່ານ ວຽງສະຫວັດ ສີພັນດອນ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ) ໄດ້ຊີ້ແຈງໃຫ້ຄວາມກະຈ່າງແຈ້ງຕໍ່ຄຳຊັກຖາມຂອງສະມາຊິກສະພາແຫ່ງຊາດທີ່ຕິດພັນກັບການຄຸ້ມຄອງ ແລະ ການຈັດຕັ້ງປະຕິບັດໂຄງການທີ່ເຫັນວ່າຍັງບໍ່ໄປຕາມຂັ້ນຕອນຂອງກົດໝາຍ ແລະ ບໍ່ສອດຄ່ອງກັບຕົວຈິງຕໍ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ IX ໃນວັນທີ 23 ທັນວາ 2022 ນີ້ວ່າ: ສຳລັບການຄຸ້ມຄອງ ແລະ ຈັດຕັ້ງປະຕິບັດໂຄງການແມ່ນມີ 4 ອົງປະກອບຫຼັກທີ່ຈະຕ້ອງໄດ້ເຮັດວຽກຮ່ວມກັນຕາມພາລະບົດບາດຂອງແຕ່ລະພາກສ່ວນຕາມທີ່ລະບຸໄວ້ໃນກົດໝາຍວ່າດ້ວຍການລົງທຶນຂອງລັດ ສະບັບເລກທີ 72/ສພຊ, ລົງວັນທີ 15 ທັນວາ 2015 ແລະ ກົດໝາຍວ່າດ້ວຍການກໍ່ສ້າງ ສະບັບເລກທີ 05/ສພຊ, ລົງວັນທີ 26 ພະຈິກ 2009 ຄື:
- ເຈົ້າຂອງໂຄງການມີໜ້າທີ່ໃນການຊີ້ນໍາຄະນະຮັບຜິດຊອບໂຄງການໃຫ້ຈັດຕັ້ງປະຕິບັດໂຄງການເປັນໄປຕາມແຜນດຳເນີນງານ ແລະ ຮັບປະກັນຄຸນນະພາບຂອງໂຄງການ.
- ຄະນະຮັບຜິດຊອບໂຄງການ ຊຶ່ງປະກອບມີຕາງໜ້າເຈົ້າຂອງໂຄງການ, ຂະແໜງການເຕັກນິກ, ຂະແໜງການເງິນ, ຂະແໜງແຜນການເຂົ້າຮ່ວມເປັນຄະນະມີໜ້າທີ່ດຳເນີນຕິດຕາມ, ກວດກາ ແລະ ແກ້ໄຂບັນຫາທີ່ເກີດຂຶ້ນໃນໄລຍະການຈັດຕັ້ງປະຕິບັດໂຄງການ.
- ທີ່ປຶກສາໂຄງການຕາງໜ້າໃຫ້ໂຄງການໃນການໃຫ້ຄຳແນະນຳ ແລະ ກວດກາ ເພື່ອໃຫ້ການຈັດຕັ້ງປະຕິບັດໂຄງການຖືກຕ້ອງຕາມເຕັກນິກວິຊາການ.
- ບໍລິສັດຮັບ ເໝົາກໍ່ສ້າງ ແລະ ບໍລິສັດສຳຫຼວດອອກແບບມີໜ້າທີ່ໃນການກໍ່ສ້າງ ແລະ ສຳຫຼວດອອກແບບໃຫ້ໄດ້ຄຸນນະພາບ ແລະ ຖືກຕ້ອງຕາມມາດຕະຖານເຕັກນິກ.
ພວກເຮົາມີກົດໝາຍ, ມີລະບຽບການ, ມີມາດຕະຖານເຕັກນິກ, ມີກົນໄກໃນການຄຸ້ມຄອງ ແລະ ການຈັດຕັ້ງປະຕິບັດໂຄງການຢາກວ່າເກືອບຄົບຖ້ວນແລ້ວ ຖ້າແຕ່ລະພາກສ່ວນເອົາໃຈໃສ່ຈັດຕັ້ງປະຕິບັດວຽກງານຕາມໜ້າທີ່ ແລະ ພາລະບົດບາດຂອງຕົນຢ່າງເຄັ່ງຄັດໂຄງການກໍ່ສ້າງກໍຈະມີຄຸນນະພາບແຕ່ມາເບິ່ງຕົວຈິງແລ້ວແຕ່ລະພາກສ່ວນບໍ່ໄດ້ເຮັດຕາມພາລະບົດບາດຂອງຕົນເຮັດໃຫ້ມີຊ່ອງວ່າງ, ການບັງຄັບໃຊ້ນິຕິກຳຕ່າງໆຍັງບໍ່ທັນເຄັ່ງຄັດ ແລະ ອັນສຳຄັນແມ່ນຈັນຍາບັນຕໍ່ວິຊາຊີບຍັງບໍ່ສູງ ຊຶ່ງຄາດວ່າໃນຕໍ່ໜ້າກະຊວງ ຍທຂ ຈະໄດ້ເອົາໃຈໃສ່ປັບປຸງ ແລະ ສ້າງນິຕິກຳໃຫ້ສອດຄ່ອງກັບສະພາບໃນປັດຈຸບັນເພີ່ມທະວີມາດຕະການກ່ຽວກັບການບັງຄັບໃຊ້ລະບຽບກົດໝາຍໃຫ້ເຄັ່ງຄັດຂຶ້ນ ພ້ອມດຽວກັນນັ້ນກໍໄດ້ມອບໝາຍໃຫ້ບັນດາກົມທີ່ກ່ຽວຂ້ອງຜັນຂະຫຍາຍບັນດານິຕິກຳຕ່າງໆໃຫ້ເປັນນິຕິກຳລຸ່ມກົດໝາຍເພື່ອເປັນເຄື່ອງມືຮັບໃຊ້ໃນການຄຸ້ມຄອງວຽກງານຂະ ແໜງການ, ນອກຈາກນີ້ກະຊວງ ຍທຂ ຈະມີມາດຕະການທີ່ເດັດຂາດຕໍ່ກັບພະນັກງານລັດ, ເວົ້າລວມ, ເວົ້າສະເພາະແມ່ນວິຊາການທີ່ຄຸ້ມຄອງຕິດຕາມໂຄງການທີ່ເຮັດຜິດລະບຽບ.
