ງານເທສະການອາຫານລາວ ກ້າວສູ່ສາກົນ ປະຈຳປີ 2023 ຈະຈັດຂຶ້ນວັນທີ 24-28 ມັງກອນ 2023 ທີ່ເດີ່ນສວນເຈົ້າອານຸວົງແຄມຂອງ

ພິທີຖະແຫລງຂ່າວງານເທສະການອາຫານລາວປະຈຳປີ 2023 ພາຍໃຕ້ຄຳຂວັນ: “ເທດສະການອາຫານລາວກ້າວສູ່ສາກົນ (Promoting Lao to International recognition)”, ໄດ້ຈັດຂຶ້ນໃນວັນທີ 26 ທັນວາ 2022 ນີ້ ໂດຍສູນກາງສະຫະພັນແມ່ຍິງລາວ ແລະ ສະມາຄົມນັກທຸລາວກິດແມ່ຍິງ, ໂດຍການເຂົ້າຮ່ວມຂອງທ່ານ ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ທ່ານ ນາງ ລາວັນ ສຸດທິສານ ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ແລະ ທ່ານ ດາວວັນ ພະຈັນທະວົງ ຮອງປະທານ ສະພາການຄ້າ ແລະ ອຸດສາຫະກຳແກ່ງຊາດ ພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ປະທານຄະນະບໍລິຫານງານສະມາຄົມນັກທຸລະກິດແມ່ຍິງ ທັງເປັນປະທານກຳມະການຈັດງານເທສະການອາຫານລາວປະຈຳປີ 2023 ກ່າວວ່າ: ງານເທສະການອາຫານລາວ ແມ່ນໄດ້ຈັດຂຶ້ນໃນທຸກໆປີຜ່ານມາ, ເຊິ່ງໃນປີນີ້ເປັນຄັ້ງທີ 19 ຂອງປີ 2023 ທີ່ຈະເປີດງານຢ່າງເປັນທາງການໃນວັນທີ 24-28 ມັງກອນ 2023 ເປັນເວລາ 5 ວັນ ທີ່ເດີ່ນສວນເຈົ້າອານຸວົງແຄມຂອງ ນະຄອນຫລວງວຽງຈັນ, ເພື່ອສືບຕໍ່ຊຸກຍູ້-ສົ່ງເສີມແມ່ຍິງຜູ້ຜະລິດ, ຜູ້ປູກຝັງ, ລ້ຽງສັດ, ຮ້ານອາຫານ, ຮ້ານຂາຍຍ່ອຍສິນຄ້າກະສິກໍາ ຈາກ 18 ແຂວງທ້ອງຖິ່ນຕ່າງໆ ລວມທັງນະຄອນຫລວງວຽງຈັນໄດ້ມາວາງສະແດງ ແລະ ຂາຍຜະລິດຕະພັນຂອງແຕ່ລະແຂວງ ພ້ອມທັງອໍານວຍຄວາມສະດວກໃຫ້ຜູ້ປະກອບການແມ່ຍິງໄດ້ສ້າງເຄືອຂ່າຍການຄ້າຢ່າງກວ້າງຂວາງ ເພື່ອໂຄສະນາ ກ້າວສູ່ຕະຫລາດສາກົນໃຫ້ນັບມື້ຫລາຍຂຶ້ນ ແລະ ເຂົ້າສູ່ຕະຫລາດ E-Commerce ເທື່ອລະກ້າວ. ນອກນີ້ກໍເພື່ອສົ່ງເສີມວັດທະນະທໍາ, ຫັດຖະກໍາລາວເຊິ່ງຢູ່ຄູ່ກັບວັດທະນະທໍາທາງດ້ານອາຫານລາວໃຫ້ມີການ ພັດທະນາຂຶ້ນໄປເລື້ອຍໆ.

ໃນງານປີ 2023 ທີ່ຈະເຖິງນີ້ມີຮ້ານອາຫານລາວ, ອາຫານປະຍຸກ ແລະ ອາຫານນານາຊາດມາວາງຂາຍເຖິງ 180 ຮ້ານ, ໃນນັ້ນ ອາຫານເອກະລັກຈາກທຸກແຂວງໃນທົ່ວປະເທດ ແລະ ຈາກຜູ້ສະໜັບສະໜູນງານລວມ 162 ຮ້ານ, ຂາຍເຄື່ອງຫັດຖະກໍາ ແລະ ກະສິກໍາ 18 ຮ້ານ. ເຊິ່ງທັງນີ້ແມ່ນໄດ້ວາງຄາດໝາຍວ່າຈະມີເງິນໜູນໃນງານປີ 2023 ນີ້ ປະມານ 3-4 ຕື້ກີບ.

ສຳລັບກິດຈະກໍາໃນງານຈະມີການສະແດງສີລະປະ ແລະ ເດີນແບບອາພອນເພດຊົງລາວໃນຕອນແລງວັນທີ 24 ແລະ 28 ມັງກອນ 2023; ຈັດໃຫ້ມີການໂຄສະນາຜະລິດຕະພັນຂອງບໍລິສັດ ແລະ ພາກສ່ວນທີ່ສະໜັບສະໜູນງານເທດສະການອາຫານເທິງເວທີເປັນປະຈໍາທຸກວັນ ແລະ ຈັດໃຫ້ມີການໄລ້ສົດການຂາຍອາຫານເຊິ່ງເປັນອາຫານຍອດນິຍົມ ຂອງແຕ່ລະແຂວງ; ຈັດການແຂ່ງຂັນປຸງແຕ່ງເຂົ້າສັງຂະຫຍາແບບດັ້ງເດີມຂອງລາວເຮົາ; ຈັດໃຫ້ມີໂຕະຕັ່ງໄວ້ຄອຍບໍລິການແຂກຜູ້ເຂົ້າມາທ່ຽວງານນັ່ງກິນອາຫານໄວ້ໃນຜາມກາງຂອງງານ; ທຸກແລງຈະມີນັກຮ້ອງຮັບເຊີນເພື່ອສ້າງບັນຍາກາດ; ມີຕາງໜ້າຜູ້ສະໜັບສະໜູນນໍາພາມວນຊົນຫລິ້ນເກມ ເພື່ອແຈກລາງວັນຈາກຄະນະຈັດງານ.

ໂອກາດນີ້, ທ່ານຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ມີຄຳເຫັນວ່າ: ວຽກງານອາຫານ ແລະ ເຄື່ອງດື່ມ ແມ່ນວຽກງານໜຶ່ງທີ່ພັກ ແລະ ລັດຖະບານ ໄດ້ເອົາໃຈໃສ່ໃນການຊຸກຍູ້ສົ່ງເສີມເລື້ອຍໆມາ ແລະ ໃຫ້ຄວາມສໍາຄັນໃນການສົ່ງເສີມສິນຄ້າລາວ ແລະ ອາຫານລາວ ເຂົ້າສູ່ຕະຫລາດພາຍໃນ ແລະ ຕ່າງປະເທດ, ໂດຍເມື່ອບໍ່ດົນມານີ້ກໍໄດ້ມີພໍ່ຄົວຊື່ດັງລະດັບໂລກ ທ່ານ Gordon Ramsay ໄດ້ຍົກຍ້ອງໃຫ້ປະເທດລາວ ເປັນຈຸດມຸ່ງໝາຍທາງດ້ານອາຫານອັນດັບຕົ້ນໆຂອງໂລກ, ເຊິ່ງເພິ່ນກໍໄດ້ມາທ່ອງທ່ຽວໃນປະເທດລາວ ແລະ ໄດ້ມີໂອກາດເດີນທາງໄປແຂວງຕ່າງໆ, ສໍາພັດການໃຊ້ຊີວິດຢູ່ເຂດຊານເມືອງ ແລະ ໄດ້ຍົກຍ້ອງວ່າປະເທດລາວງົດງາມຫລາຍ. ພ້ອມດຽວກັນ, ທ່ານໄດ້ກ່າວຄໍາໜຶ່ງກ່ຽວກັບອາຫານລາວວ່າ: “ອາຫານລາວແຊບເກີນຄໍາບັນຍາຍ” (Lao Food is off the chartsl) ສະແດງໃຫ້ເຫັນວ່າອາຫານລາວເປັນທີ່ຍອມຮັບ ແລະ ເປັນທີ່ຮູ້ຈັກກັນຢ່າງກວ້າງຂວາງໃນຕ່າງປະເທດ ແລະ ເຊື່ອໝັ້ນວ່າໃນງານເທດສະການອາຫານລາວທີ່ໃກ້ຈະຈັດຂຶ້ນໃນມໍ່ໆນີ້ຈະເປັນເວທີອັນສໍາຄັນທີ່ຊ່ວຍຊຸກຍູ້ການພັດທະນາຂະແໜງການອາຫານລາວ, ໂດຍສະເພາະການອອກແບບ ແລະ ການຕົບແຕ່ງອາຫານພື້ນເມືອງລາວເຮົາທີ່ມີເອກະລັກ, ມີຄວາມແຊບ ແລະ ດີຕໍ່ສຸຂະພາບຢູ່ແລ້ວໃຫ້ກາຍເປັນເມນູທີ່ມີຄວາມໂດດເດັ່ນ, ການຕົບແຕ່ງສວຍງາມຍິ່ງຂຶ້ນ, ຖືກຕາຕ້ອງໃຈຄົນຕ່າງປະເທດ, ມີການພັດທະນາຍີ່ຫໍ້ ແລະ ສ້າງຊື່ສຽງໂດ່ງດັງໃຫ້ແກ່ອາຫານລາວໃນເວທີສາກົນເທື່ອລະກ້າວ.