ເຕືອນໄພສັງຄົມ ! ມີຜູ້ອ້າງຕົນເປັນນ້ອງສາວ ເຈົ້າຂອງບໍລິສັດຈັດຫາງານ ເພື່ອຫລອກລວງ ເອົາເງິນ ມີຜູ້ເສຍຫາຍຈຳນວນຫລາຍ
ວັນທີ 23 ທັນວາ 2022 ຜ່ານມານີ້ ທ່ານບຸນທ່ຽ ງລັດຕະນະວົງ ປະທານບໍລິສັດ ໄອຈ໋ອບ ຈັດຫາງານ ອອກມາໂພສໃນເຟສສ່ວນຕົວວ່າ: ເຕືອນໄພ ລະວັງຖືກຫລອກລວງໃຫ້ເສຍເງິນ! ມີຫລາຍຄົນຮ້ອງຮຽນມາ ຈຶ່ງຈຳເປັນຕ້ອງເອົາມາລົງ ເພື່ອບໍ່ໃຫ້ມີຄົນເສຍຫາຍ ເນື່ອງຈາກວ່ານາງນີ້ (ຊື່ສຸກ) ໄດ້ເຄື່ອນໄຫວຫລອກລວງຜູ້ຄົນດ້ວຍການຮຽກເອົາເງິນໂດຍອ້າງວ່າເປັນນ້ອງສາວຂ້ອຍ ອ້າງວ່າສາມາດຊ່ວຍຈັດຄົນໄປເຮັດວຽກຢູ່ເກົາຫລີໄດ້.
ຂໍແຈ້ງໃຫ້ຊາບວ່າ ຂ້ອຍບໍ່ມີນ້ອງສາວ ມີແຕ່ນ້ອງຊາຍ, ຂ້ອຍບໍ່ຮູ້ຈັກກັບຄົນໆນີ້ ແລະ ຂໍບອກໃຫ້ຊາບວ່າການຈັດແຮງງານໄປເຮັດວຽກຢູ່ເກົາຫລີນັ້ນ ທາງກະຊວງແຮງງານຫ້າມບໍ່ໃຫ້ເກັບເງິນຈາກແຮງງານລ່ວງໜ້າ. ຖ້າມີການຮຽກເກັບເງິນລ່ວງໜ້າ ຫລື ມີຂໍ້ສົງໄສ ສາມາດຕິດຕໍ່ສອບຖາມນຳກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມ ຫລື ສອບຖາມຂ້ອຍໄດ້ 020 5555 2424 ບຸນທ່ຽງ.
ວັນທີ 24 ທັນວາ ທ່ານບຸນທ່ຽງໂພສຕື່ວ່າ: ຝາກເຖິງຜູ້ໃດທີ່ໄດ້ຈ່າຍເງິນໃຫ້ລາວ ໃຫ້ທວງເງິນຄືນດ່ວນ ເພາະອີກບໍ່ດົນລາວຈະບໍ່ສາມາດສົ່ງເງິນຄືນໄດ້ ຫລັງຈາກທີ່ຂ້ອຍລົງປະກາດໄປ ມີປະຊາຊົນປະສານເຂົ້າມາຈຳນວນຫລາຍ ປະມານເກືອບ 100 ຄົນ ຈຶ່ງມີຄວາມເປັນຫ່ວງວ່າລາວຈະໄປສ້າງຄວາມເສຍຫາຍໃຫ້ອີກຫລາຍຄົນ.
ຂໍໂທດທີ່ຂ້ອຍຕ້ອງມາຫຍຸ້ງນຳເລື່ອງແບບນີ້ ຍ້ອນຖືກແອບອ້າງ ແລະ ລາວໄປສ້າງຄວາມເສຍຫາຍໃຫ້ປະຊາຊົນ ຈຶ່ງນິ້ງເສີຍບໍ່ໄດ້
ຫລ້າສຸດ ວັນທີ 26 ທັນວາ 2022 ນີ້ ທ່ານບຸນທ່ຽງ ລັດຕະນະວົງ ໃຫ້ສຳພາດຕໍ່ໜັງສືພິມລາວພັດທະນາ ຕື່ມວ່າ:
ປັດຈຸບັນໄດ້ຮັບຂໍ້ມູນຈາກຜູ້ເສຍຫາຍໃນກໍລະນີດັ່ງກ່າວນີ້ເກືອບ 100 ຄົນແລ້ວ ເຊັ່ນ ຈາກສະຫວັນນະເຂດ, ແຂວງວຽງຈັນ ແລະ ນະຄອນຫລວງວຽງຈັນ ຈາກຂໍ້ມູນທີ່ໄດ້ຮັບເຫັນວ່າຜູ້ເສຍຫາຍໄດ້ຈ່າຍເງິນລ່ວງໜ້າໃຫ້ຜູ້ແອບອ້າງໄປແລ້ວ 12-18 ລ້ານກີບ/ຄົນ. ສຳລັບ ຜູ້ທີ່ຖືກຫລອກລວງ ຫາກມີຈຸດປະສົງຢາກໄດ້ເງິນຄືນ ແມ່ນໃຫ້ນຳຂໍ້ມູນຄວາມເສຍຫາຍຂອງຕົນໄປແຈ້ງຄວາມຕໍ່ເຈົ້າໜ້າທີ່ຂັ້ນທ້ອງຖິ່ນ, ນະຄອນຫລວງວຽງຈັນ ຫລື ນຳເອົາຫລັກຖານດັ່ງກ່າວມາຫາເບີ 020 5555 2424 ເພື່ອລວບລວມເປັນຫລັກໃນການຮ້ອງຟ້ອງຕາມຂະບວນກົດໝາຍຕໍ່ໄປ.
ອີກອັນໜຶ່ງ ປັດຈຸບັນ ກົມຈັດຫາງານ ໄດ້ເປັນຜູ້ ສະໝັກຜູ້ຈະໄປຕ່າງປະເທດໂດຍກົງ ບໍ່ໃຫ້ໄປສະໝັກຜ່ານບໍລິສັດຈັດຫາງານຕ່າງໆ ທັງນີ້ເພື່ອປ້ອງກັນບັນຫາການຫລອກລວງ ແລະ ການແອບອ້າງເພື່ອຫລອກລວງຄືດັ່ງຜ່ານມາ.
