ປກສ ເມືອງຄໍາເກີດ ກັກເປົ້າໝາຍລັກລອບເຄື່ອນຍ້າຍສິ່ງເສບຕິດ ຄັນຊາ 1.669 ກິໂລກຣາມ ມາດຳເນີນຄະດີຕາມລະບຽບກົດໝາຍ

ເຈົ້າໜ້າທີ່ວິຊາສະເພາະ ປກສ ເມືອງຄໍາເກີດ ແຂວງບໍລິຄໍາໄຊ ໃຫ້ຮູ້ວ່າ: ວັນທີ 21 ທັນວາ 2022 ມີພົນລະເມືອງດີແຈ້ງວ່າຈະມີການເຄື່ອນຍ້າຍສິ່ງເສບຕິດປະເພດຄັນຊາ ໂດຍໃຊ້ລົດບັນທຸກເປັນພາຫະນະເຄື່ອນຍ້າຍ, ດັ່ງນັ້ນເຈົ້າໜ້າທີ່ວິຊາສະເພາະ ຈຶ່ງໄດ້ຈັດຕັ້ງກໍາລັງວິຊາສະເພາະສົມທົບກັບກໍາລັງ ປກສ ກຸ່ມບ້ານໜອງກອກ ເພື່ອຕິດຕາມເປົ້າໝາຍ ແລະ ສະກັດກັ້ນ.

ມາຮອດເວລາປະມານ 21:15 ໂມງຂອງວັນດຽວກັນ ຈຶ່ງພົບເຫັນລົດເປົ້າໝາຍກໍາລັງຂັບເຄື່ອນອອກມາດ້ວຍຄວາມໄວຈາກເຂດບ້ານໜອງຊົງ ເມືອງຄໍາເກີດ ແຂວງບໍລິຄໍາໄຊ ມຸ່ງໜ້າອອກມາສູ່ສາຍທາງເລກ 8A ເມື່ອມາຮອດ ເຂດບ້ານໜອງກອກ ເຈົ້າໜ້າທີ່ຈີ່ງໄດ້ສະກັດລົດຄັນດັ່ງກ່າວແຕ່ຄົນຂັບບໍ່ຍອມຈອດລົດ ແລະ ຂັບຜ່ານຈຸດສະກັດກັ້ນຂອງເຈົ້າໜ້າທີ່ມຸ່ງໜ້າໄປທາງເມືອງຄູນຄໍາ ແຂວງຄໍາມ່ວນ, ດັ່ງນັ້ນເຈົ້າໜ້າທີ່ວິຊາສະເພາະ ປກສ ເມືອງຄໍາເກີດ ໄດ້ໄລ່ຕິດຕາມລົດຄັນນດັ່ງກ່າວໄປແຕ່ເຫັນວ່າລົດຄັນດັ່ງກ່າວບໍ່ຍອມຢຸດ ຈຶ່ງປະສານ ຫາເຈົ້າໜ້າທີ່ ປກສ ເມືອງຄູນຄໍາ ແຂວງຄໍາມ່ວນ ເພື່ອສະກັດຊ່ວຍແຕ່ລົດຄັນດັ່ງກ່າວກໍບໍ່ຍອມຈອດ ແລະ ຍັງໄດ້ຂັບຜ່າດ່ານກວດກາຂອງເຈົ້າໜ້າທີ່ ປກສ ເມືອງຄູນຄໍາ ແຂວງຄໍາມ່ວນ ມາຈົນຮອດເຂດບ້ານ ນາຂາມ ເມືອງຄູນຄໍາ ແຂວງຄໍາມ່ວນ ລົດເປົ້າໝາຍໄດ້ຈອດ, ສ່ວນຜູ້ຂັບຂີ່ລົດຄັນດັ່ງກ່າວແມ່ນໄດ້ເອົາຕົວຫລົບໜີເຂົ້າໄປໃນປ່າ.

ດັ່ງນັ້ນ ເຈົ້າໜ້າທີ່ຈຶ່ງກວດກາລົດຄັນດັ່ງກ່າວ ເຊິ່ງເປັນລົດບັນທຸກສີແດງ ປ້າຍທະບຽນ 38H 008.02 ພົບເຫັນສິ່ງເສບຕິດປະເພດຄັນຊາອັດແທ່ງ ຈໍານວນ 26 ເປົາ ໜໍ້າໜັກ 1,347 ກິໂລກຣາມ, ຄັນຊາ ບໍ່ໄດ້ອັດ 18 ເປົາ ນໍ້າໜັກ 322 ກິໂລກຣາມ, ລວມທັງໝົດ 44 ເປົາ ນໍ້າໜັກ 1.669 ກິໂລກຣາມ, ແລ້ວເຈົ້າໜ້າທີ່ວິຊາສະເພາະນໍາເອົາລົດ ແລະ ຂອງກາງຄະດີເຂົ້າມາເກັບຮັກສາໄວ້ທີ່ກອງບັນຊາການ ປກສ ເມືອງຄໍາເກີດ ເພື່ອຊອກຫາຜູ້ທີ່ກະທໍາຜິດຄັ້ງນີ້ມາດໍາເນີນຄະດີຕາມກົດໝາຍ ສ່ວນຄັນຊາ 1.669 ກິໂລກຣາມ ຈະໄດ້ນໍາສົ່ງກອງບັນຊາການ ປກສ ແຂວງບໍລິຄໍາໄຊ ເພື່ອທໍາລາຍຕາມລະບຽບກົດໝາຍໃນຂັ້ນຕໍ່ໄປ.