ຟີລິບປິນກຽມໃຫ້ສິງກະໂປ ຊ່ວຍແກ້ບັນຫາການຈະລາຈອນ
https://twitter.com/YahooPH/status/902731372892127232
ສິງກະໂປກຽມເຂົ້າມາຊ່ວຍເຫລືອຟີລິບປິນໃນການແກ້ໄຂບັນຫາການຈະລາຈອນ ຕາມຂໍ້ຕົກລົງຮ່ວມກັນລະຫວ່າງສອງປະເທດ.
ສຳນັກຂ່າວຕ່າງປະເທດລາຍງານຈາກນະຄອນຫລວງມະນິລາ ປະເທດຟີລິບປິນ ໃນວັນທີ 30 ສິງຫານີ້ວ່າ: ທ່ານ ທິມ ອໍບອສ ລັດຖະມົນຕີກະຊວງຄົມມະນາຄົມຂອງຟີລິບປິນ ຖະແຫລງໃນວັນທີ 29 ສິງຫາວ່າ: ລັດຖະບານມະນິລາກຽມລົງນາມຂໍ້ຕົກລົງດ້ານການຄົມມະນາຄົມຮ່ວມກັບກະຊວງຄົມມະນາຄົມຂອງສິງກະໂປ ພາຍໃນໄລຍະເວລາ 12 ເດືອນຕໍ່ໜ້າ ໃນການໃຫ້ລັດຖະບານສິງກະໂປເຂົ້າມາບັນເທົາຄວາມກັງວົນຂອງລະບົບຈະລາຈອນຢູ່ຟີລິບປິນ ເຊິ່ງໃນເບື້ອງຕົ້ນຈະເປັນການປະຕິຮູບລະບົບຂົນສົ່ງມວນຊົນໃນເຂດໃຈກາງນະຄອນຫລວງມະນິລາ ກ່ອນຂະຫຍາຍອອກໄປເປັນທົ່ວປະເທດ ໂດຍຈະເປັນການແກ້ໄຂແບບດຽວກັບທີ່ສິງກະໂປໃຊ້ໃນປະເທດຕົວເອງເຊັ່ນ: ການຕິດຕັ້ງເຄື່ອງເກັບຄ່າໂດຍສານ ແລະ ຈ່າຍປີ້ແບບອັດຕະໂນມັດ.
ທັງນີ້, ຂໍ້ມູນຈາກກະຊວງເສດຖະກິດຂອງຟີລິບປິນລະບຸວ່າ: ບັນຫາຈະລາຈອນໃນປະເທດຢູ່ໃນລະດັບວິກິດເຖິງຂັ້ນສ້າງຄວາມເສຍຫາຍທາງເສດຖະກິດໃຫ້ແກ່ປະເທດວັນລະບໍ່ໜ້ອຍກວ່າ 47 ລ້ານໂດລາສະຫະລັດ ຈາກການເປັນໜຶ່ງໃນປະເທດທີ່ມີການຈະລາຈອນຕິດຂັດຮຸນແຮງທີ່ສຸດໃນໂລກ.
