ປີ 2022 ເມືອງນາຊາຍທອງ ປາກົດການຫຍໍ້ທໍ້ເກີດຂຶ້ນທັງໝົດ 154 ເລື່ອງ ກັກຕົວຜູ້ຖືກຫາ 227 ຄົນ

ພັທ ກົງ ຄະນະລັງສຸກ ຫົວໜ້າກອງບັນຊາການ ປກສ ເມືອງນາຊາຍທອງ  ລາຍງານ ເນື່ອງໃນໂອກາດ ພົຈວ ປອ ບົວພັນ ຟອງມະນີ ຫົວໜ້າກອງບັນຊາການ ປກສ ວັນທີ 21 ທັນວາ 2022 ຜ່ານມາ ວ່າ: ໃນ 1 ປີ ຜ່ານມາ ເມືອງນາຊາຍທອງມີປາກົດການຫຍໍ້ທໍ້ເກີດຂຶ້ນທັງໝົດ 154 ເລື່ອງ, ທຽບໃສ່ ປີ 2021 ເພີ່ມຂຶ້ນ 52 ເລື່ອງ, ບັນຫາພົ້ນເດັ່ນ ແມ່ນການລັກຊັບພົນລະເມືອງ, ລັກລົດຈັກ ເຊິ່ງມີລົດຈັກເສຍ 95 ຄັນ ສ້າງຄວາມເສຍຫາຍທາງດ້ານຊັບສີນຂອງລັດ, ຂອງລວມໝູ່ ແລະ ພົນລະເມືອງມີ: ເງິນກີບ 738.733.000 ກີບ, ເງິນບາດ 153.000 ບາດ, ເງິນຢວນ 1.300 ຢວນ, ເງິນໂດລາ 865 ໂດລາ, ຄຳຮູບປະພັນ 20 ບາດ, ລົດໃຫຍ່ 1 ຄັນ, ປືນສັ້ນ 1 ກະບອກ ພ້ອມລູກປືນ 33 ລູກ, ນ໋ອດທາງລົດໄຟ 440 ຊຸດ, ຈັກຕັດຫຍ້າ 2 ເຄື່ອງ, ໂທລະສັບ 14 ໜ່ວຍ, ຄອມພິວເຕີໂນດບຸກ 1 ໜ່ວຍ, ຕູ້ເຢັນ 1 ໜ່ວຍ, ງົວ 2 ໂຕ, ບັດເຕີມເງິນ 500.000 ກີບ, ແອເຮືອນ 5 ໜ່ວຍ.

ຕໍ່ກັບເຫດການທີ່ເກີດຂຶ້ນແກ້ໄຂໄດ້ 124 ເລື່ອງ, ກັກຕົວຜູ້ຖືກຫາ 227 ຄົນ, ຍິງ 12 ຄົນ, ເກັບກູ້ຂອງກາງຄືນໄດ້ ເງິນກີບ 526.000.000 ກີບ, ຄໍາຮູບປະພັນ 11 ບາດ, ລົດໃຫຍ່ 1 ຄັນ, ລົດຈັກ 5 ຄັນ, ປືນສັ້ນ 4 ກະບອກ, ປືນຍາວດັດແປງ 3 ກະບອກ, ງົວ 1 ໂຕ.

ສໍາລັບບັນຫາຢາເສບຕິດ ສາມາດແກ້ໄຂໄດ້ທັງໝົດ 123 ລາຍ, ກັກຕົວຜູ້ຖືກຫາໄດ້ 251 ຄົນ, ຍິງ 29 ຄົນ, ຢຶດຢາບ້າ 1.055.198 ເມັດ, ຢາໄອ໌ 3 ຖົງນ້ອຍ, ຢາອີ 100 ເມັດ, ຢາເຄ 4,22 Kg, ລົດໃຫຍ່ 2 ຄັນ ແລະ ລົດຈັກ 1 ຄັນ.