ປະເທດເຢຍລະມັນ ເລີ່ມຂົນສົ່ງອາຍແກັສ ຢ່າງເປັນທາງການ

ສຳນັກຂ່າວຕ່າງປະເທດ ລາຍງານວ່າ: ຢູນິເປີຣ (Uniper) ເປັນບໍລິສັດ ຜູ້ນໍາເຂົ້າ ອາຍ-ແກັສ ລາຍໃຫຍ່ສຸດ ຂອງ ເຢຍລະມັນ ເປີດເຜີຍວ່າ: ສະຖານີ ອາຍແກັສ ທຳມະຊາດແຫລວ (LNG) ແຫ່ງທຳອິດ ຂອງ ເຢຍລະມັນ ໄດ້ເລີ່ມເປີດ ດຳເນີນການ (ເມື່ອວັນທີ 21 ທັນວາ ຜ່ານມາ). ກ່ອນໜ້ານັ້ນ ລັດຖະບານ ເຢຍລະມັນ ໄດ້ຖືສັນຍາເຊົ່າ ກຳປັ່ນ ບັນທຸກ ອາຍແກັສ ທຳມະຊາດແຫລວ ລະບຸວ່າ: ກຳປັ່ນ ບັນທຸກ ອາຍແກັສ ທຳມະຊາດ ປະມານ 165.000 ແມັດກ້ອນ ເຂົ້າໄປຈອດທຽບທ່າ ສະຖານີ ແຫ່ງໃໝ່ ຢູ່ໃນເມືອງ ວິລເຮມຮາເຟິນ. ຄາດວ່າ ປະລິມານ ອາຍແກັສທຳມະຊາດແຫລວ ຈະພຽງພໍ ສຳລັບ ການຈັດສັນໃຫ້ 50.000 ຄົວເຮືອນ ຕໍ່ປີ.

ໂດຍທ່ານ ໂອລາຟ ຊໍລ ນາຍົກ ລັດຖະມົນຕີ ເຢຍລະມັນ ໄດ້ເປີດເຜີຍ ການໃຊ້ງານ ສະຖານີ ດັ່ງກ່າວ ຢ່າງເປັນ ທາງການ , ພ້ອມທັງ ຊີ້ແຈງວ່າ ນີ້ເປັນພຽງ ຈຸດເລີ່ມຕົ້ນ ເນື່ອງຈາກ ຈະມີການ ເປີດນຳໃຊ້ສະຖານີ ຮອງຮັບ ການນໍາເຂົ້າ ອາຍແກັສ ທຳມະຊາດແຫລວ ຢູ່ເທິງແຄມຝັ່ງ ທະເລເໜືອ ແລະ ທະເລບໍຕິກ ໃນຕໍ່ໜ້າ. ແຜນການດັ່ງກ່າວ ມີເປົ້າໝາຍ ເຮັດໃຫ້ ເຢຍລະມັນ ມີຄວາມສາມາດ ໃນການນໍາເຂົ້າ ອາຍແກັສ ຫລາຍກວ່າ 3 ໝື່ນລ້ານ ແມັດກ້ອນ ພາຍໃນທ້າຍປີ 2024 ຊຶ່ງ ກວມເອົາ ອັດຕາສ່ວນ ຫລາຍກວ່າ ເຄິ່ງໜຶ່ງ ຂອງ ປະລິມານແກັສ ທີ່ໄຫລຜ່ານທໍ່ສົ່ງ ຈາກ ຣັດເຊຍ ໄປຍັງ ເຢຍລະມັນ