ແຟນບານ ຝຣັ່ງ 2 ແສນຄົນລົງຊື່ຮຽກຮ້ອງ ຟີຟາ ຂໍເຕະໃຫມ່ນັດຊີງບານໂລກ 2022 ຫລັງຄາໃຈ 2 ຈັງຫວະ
ແຟນບານຝຣັ່ງພາກັນລົງຊື່ກວ່າ 200,000 ຄົນ ເພື່ອຮຽກຮ້ອງໃຫ້ສະຫະພັນບານເຕະນາໆຊາດ (FIFA) ຈັດນັດຊີງ ບານໂລກ 2022 ລະຫວ່າງ ອາເຈນຕີນາ ແລະ ຝຣັ່ງ ອີກເທື່ອຫນຶ່ງ.
ຫລັງຈາກ ອາເຈນຕີນາ ຄວ້າແຊ໊ມບານໂລກສະໄຫມທີ 3 ດ້ວຍການເອົາຊະນະລູກໂທດ ຝຣັ່ງ 4-2 ຫລັງສະເຫມີໃນເວລາ 120 ນາທີ ຢ່າງດຸເດືອດ ແຕ່ ແຟນບານຝຣັ່ງ ຍັງຄາໃຈໂດຍຮ່ວມກັນລົງຊື່ກວ່າ 200,000 ລາຍຊື່ ເພື່ອຮຽກຮ້ອງໃຫ້ ຟີຟາ ຈັດນັດຊີງບານໂລກ 2022 ອີກເທື່ອຫນຶ່ງ ເນື່ອງຈາກແຟນບານຝຣັ່ງເບິ່ງວ່າ ການຕັດສິນໃນເກມດັ່ງກ່າວມີບັນ ໂດຍເບິ່ງວ່າຜູ້ຕັດສິນ ຊີມອນ ມາຊີນຽກ ຜູ້ຕັດສິນຊາວໂປແລນບໍ່ຄວນໃຫ້ລູກໂທດໃນຈັງຫວະທີ່ ອຸສມານ ເດມເບເລ ເຮັດບານໄຫມ ອັງເຄລ ດິ ມາເຣຍ ແລະ ຈັງຫວະ ຄີລຽນ ເອັມບັບເປ ຄວນຈະໄດ້ລູກໂທດຈາກການຖືກ ຄຣິສຕຽນ ໂຣເມໂຣ ກອງຫລັງ ອາເຈນຕີນາເຮັດບານໄຫມ.
ນອກຈາກນີ້ ຍັງລະບຸວ່າໃນຈັງຫວະທີ່ ລີໂອເນລ ເມສຊີ ຍິງປະຕູຂຶ້ນນຳ 3-2 ມີນັກເຕະສຳຮອງຂອງອາເຈນຕີນາ ຫວັງຜົນຫລາຍ ຈົນເດີນເຂົ້າໄປໃນສະໜາມ ເຊ່ິງຖືວ່າຜິດກະຕິກາ.
