ເມື່ອກ່ອນການຂຶ້ນຄ່າແຮງຂັ້ນຕໍ່າ ມັກມາພ້ອມກັບການຖີບຕົວຂອງຄ່າຄອງຊີບ ແຕ່ດຽວນີ້ຄ່າຄອງຊີບຖີບຕົວໄປກ່ອນແລ້ວ

ເມື່ອເດືອນສິງຫາ ຜ່ານມານີ້ ລັດຖະບານເຮົາເພິ່ນໄດ້ປະກາດຂຶ້ນຄ່າແຄງງານຂັ້ນຕໍ່າ ຈາກ 1.100.000  ກີບ ມາເປັນ 1.200.000 ລ້ານກີບ ແຕ່ຫຼາຍຄົນກໍຍັງຄິດນຳ ພ້ອມຕັ້ງຄຳຖາມຂຶ້ນວ່າ  ຈະປັບຄ່າແຮງງານ ຫຼື ປັບຄ່າຄອງຊີບລົງ ຈຶ່ງຈະດີກວ່າ?

ມັນເປັນທີ່ຈະແຈ້ງວ່າ ກ່ອນອອກແຈ້ງການສະບັບນີ້ ທາງພາກສ່ວນທີ່ກ່ຽວຂ້ອງ ໂດຍສະເພາະກະຊວງແຮງງານ ແລະສະຫວັດດີການ-ສັງຄົມ, ກຳມະບານລາວ ແລະພາກສ່ວນອື່ນໆ ເພິ່ນກໍໄດ້ປຶກສາຫາລືກັນຫຼາຍລົບຫຼາຍຕ່າວ ແລ້ວເພື່ອໃຫ້ຜູ້ເຮັດວຽກທີ່ໄດ້ຮັບເງິນເດືອນຂັ້ນຕໍ່າ ໂດຍສະເພາະໃນບາງຂະແໜງການ ມີແຮງຈູງໃຈຂຶ້ນແດ່ ເຊິ່ງກໍເປັນບາດກ້າວທີ່ສຳຄັນ ເຖິງຈະມີຄວາມຄິດເຫັນທີ່ແຕກຕ່າງກັນໄປ, ບາງພ່ອງກໍວ່າ “ການຂຶ້ນຄ່າແຮງງການຂັ້ນຕໍ່າແມ່ນເປັນການດີທີ່ຈະປັບປຸງຊີວິດ ຊາວຜູ້ອອກແຮງງານທີ່ກິນເງິນເດືອນຂັ້ນຕໍ່າ” ແຕ່ບາງພ່ອງກໍວ່າ “ການຂຶ້ນຄ່າແຮງງານຂັ້ນຕໍ່ານີ້ ຍິ່ງຈະເຮັດໃຫ້ໄພວ່າງງານໃນລາວເພີ່ມສູງຂຶ້ນ ເພາະນາຍຈ້າງ ມັກຈະເວົ້າເລື້ອຍໆວ່າ ແຮງງານລາວຂາດທັກສະ ແຕ່ຂຶ້ນຄ່າແຮງງານຕຶ່ມອີກ” ແລະ ອື່ນໆ.

ແຕ່ສິ່ງສຳຄັນ ທີ່ປະຊາຊົນໃຫ້ຄວາມສົນໃຈຫຼາຍທີ່ສຸດ ເມື່ອເວົ້າເລື່ອງ ຄ່າແຮງງານຂັ້ນຕໍ່າມາເທື່ອໃດ ກໍຄິດໃສ່ແຕ່ວ່າ ມັນຊິມີປະໂຫຍດຫຍັງຫຼາຍ ໃນການເພີ່ມຄ່າແຮງງານຂັ້ນຕໍ່າຂຶ້ນພຽງເລັກນ້ອຍ ແຕ່ຄ່າຄອງຊີບ ພັດຖີບຕົວສູງຂຶ້ນ!

ໃນປັດຈຸບັນ ອາຫານຢູ່ໃນເມືອງໂດຍສະເພາະ ຢູ່ນະຄອນຫຼວງວຽງຈັນ ຊີ້ນງົວ ໂລລະ 120.000 ກີບ, ຖ້າວ່າພະນັກງານຄົນໜຶ່ງມີ ເງິນເດືອນ ເດືອນລະ 1.200.000 – 2.000.000 ກີບ ໂດຍສະເລ່ຍຄ່າແຮງຂັ້ນຕໍ່າ ລາວໄດ້ມື້ລະ 55.000 -90.000 ກີບ ເຊິ່ງລາວຕ້ອງເຮັດວຽກຮອດ ມື້ເຄິ່ງຈຶ່ງສາມາດ ຊື້ຊີ້ນງົວໂລໜຶ່ງໄດ້, ສະນັ້ນ ຊີ້ນງົວອາດບໍ່ແມ່ນທາງເລືອກທີ່ດີສຳລັບລາວຜູ້ນີ້ ເພາະລາວຍັງມີລາຍຈ່າຍອື່ນໆອີກ ເຊັ່ນຄ່າບັດໂທລະສັບ ແຕ່ຖ້າຈະໄປຊື້ໄຂ່ 1 ແຕະ ໃນລາ 65.000 ກີບ ລາວກໍຕ້ອງເຮັດວຽກ 1 ວັນຈຶ່ງໄດ້ມັນມາເຊັ່ນກັນ ບາງທີ ມັນກໍຍາກໃຈສຳລັບລາວທີ່ຈະໄປງານສັງຄົມ ຫຼື ສົ່ງລູກຮຽນໜັງສື ແລະ ພວກເຮົາກໍເຂົ້າໃຈດີວ່າ 70% ຂອງຜູ້ໄດ້ຮັບຄ່າແຮງງານຂັ້ນຕໍ່ານັ້ນ ແມ່ນແຮງງານນອກລະບົບ, ໝາຍວ່າ ເຂົາເຈົ້າອາດບໍ່ມີສະຫວັດດີການ ທີ່ດີພໍເທົ່າໃດ, ເມື່ອເວລາເຈັບເປັນ ເຂົາເຈົ້າອາດກຸ້ມຕົນເອງທັງໝົດ, ເພາະສະນັ້ນ ຖ້າຂາດການບໍລິຫານທີ່ດີ ກໍຈະກາຍເປັນຄົນມີໜີ້ສິນຖ້ວມຄໍຄັກໆ.

ຫຼາຍຄົນຮັບຮູ້ດີວ່າ ບັນດາປະເທດອ້ອມຂ້າງມີຄ່າຄອງຊີບທີ່ຂ້ອນຂ້າງຕໍ່າກວ່າເຮົາ, ສິ່ງທີ່ຜູ້ຂຽນເຫັນຈະແຈ້ງ ແມ່ນ ລາຄາອາຫານ ທີ່ເປັນປັດໄຈພື້ນຖານທີ່ສຸດສຳລັບເພື່ອການດຳລົງຊີບ ເຊິ່ງເປັນເຫດຜົນວ່າ ຄົນລາວຫຼັ່ງໄຫຼໄປບ້ານເພິ່ນເພື່ອຊື້ອາຫານ, ເຄື່ອງໃຊ້ຕ່າງໆເລື້ອຍໆ.

ການຂຶ້ນຄ່າແຮງງານຂັ້ນຕໍ່າຂອງພວກເຮົາ ເປັນສິ່ງທີ່ສຳຄັນໃນການປັບປຸງຊີວິດການເປັນຢູ່ຂອງປະຊາຊົນ ແຕ່ສິ່ງ ຈຳເປັນແມ່ນການປັບຄ່າຄອງຊີບລົງ ໃຫ້ສົມດຸນກັບລາຍຮັບຂອງປະຊາຊົນສ່ວນໃຫຍ່, ເຊິ່ງກໍເຂົ້າໃຈດີວ່າ ມັນບໍ່ແມ່ນເລື່ອງງ່າຍດາຍພໍປານໃດ ເພາະເຊື່ອມໂຍງກັບຫຼາຍປັດໄຈ ບໍ່ວ່າໂຄງຮ່າງພື້ນຖານຕ່າງໆ, ລະບົບການຜະລິດ, ເງື່ອນໄຂພູມສັນຖານ ແລະອື່ນໆ ແຕ່ມັນກໍຈຳເປັນສຳລັບພວກເຮົາ ທີ່ຈະເຮັດໃຫ້ຄ່າຄອງຊີບ ຕໍ່າລົງກວ່ານີ້ ເຊິ່ງອາດບໍ່ແມ່ນມີຜົນດີສະເພາະຜູ້ໄດ້ຄ່າແຮງງານຂັ້ນຕໍ່າ ແຕ່ອາດມີຜົນດີຕໍ່ລະບົບເສດຖະກິດພວກເຮົາໂດຍລວມ ເຊັ່ນວ່າ ວຽກງານທ່ອງທ່ຽວ ແລະ ອື່ນໆ.