ອິນໂດເນເຊຍເລັ່ງໃຊ້ “ງົບຈູງໃຈ” 5 ພັນຕື້ຣູເປຍ ກະຕຸ້ນຍອດຂາຍລົດອີວີໃນປີ 2023
ອິນໂດເນເຊຍອາດຈັດສັນເງິນ 5 ພັນຕື້ຣູເປຍ ຈາກງົບປະມານໃນປີໜ້າ ເພື່ອຈູງໃຈການຊື້ລົດໄຟຟ້າ (ອີວີ) ເຖິງວ່າລາຍລະອຽດຂອງແຜນຈະຢູ່ລະຫວ່າງການສະຫລຸບກໍຕາມ.
ວັນທີ 22 ທັນວາ, ສຳນັກຂ່າວຣອຍເຕີລາຍງານວ່າ: ທ່ານ ອາກຸສ ກູມິວັງ ກາຕາຊາສມິຕາ ລັດຖະມົນຕີກະຊວງອຸດສາຫະກຳອິນໂດເນເຊຍ ກ່າວໃນອາທິດຜ່ານມາວ່າ: ຜູ້ຊື້ຈະໄດ້ຮັບສ່ວນຫລຸດ 80 ລ້ານຣູເປຍ ສຳລັບລົດອີວີທີ່ຜະລິດໂດຍບໍລິສັດທີ່ມີໂຮງງານໃນປະເທດ ລວມທັງສິ່ງຈູງໃຈອື່ນໆສຳລັບລົດໄຮບຣິດ ແລະ ລົດຈັກໄຟຟ້າ ເຊິ່ງລັດຖະບານຈາກາຕາວາງແຜນຈະມອບເງິນສະໜັບສະໜູນໃຫ້ຜູ້ຂາຍ ເພື່ອທົດແທນຄ່າໃຊ້ຈ່າຍ.
ຂະນະທີ່ທ່ານ ແອລັງກາ ຮາຕາໂຕ ຫົວໜ້າລັດຖະມົນຕີເສດຖະກິດຂອງອິນໂດເນເຊຍ ກ່າວໃນການຖະແຫລງຂ່າວວັນທີ 21 ທັນວາຜ່ານມາວ່າ: ທາງການອິນໂດເນເຊຍກຳລັງໃຫ້ລາຍລະອຽດເຖິງການຈັດຫາທີ່ພວກເຂົາສາມາດເຮັດໄດ້ ໂດຍອີງຕາມການຈັດສັນງົບປະມານ. ພ້ອມກ່າວວ່າ: ລັດຖະບານກຳລັງພິຈາລະນາການໃຫ້ເງິນຊ່ວຍເຫລືອການຈຳໜ່າຍລົດເມໄຟຟ້າເຊັ່ນກັນ.
“ພວກເຮົາຫວັງວ່າຈາກສິ່ງຈູງໃຈເຫລົ່ານີ້ ອຸດສາຫະກຳລົດຈັກໄຟຟ້າ ແລະ ລົດຍົນໄຟຟ້າຈະເຕີບໃຫຍ່” ປະທານາທິບໍດີ ໂຈໂກ ວິໂດໂດ ຜູ້ນຳອິນໂດເນເຊຍ ກ່າວໃນການຖະແຫລງຂ່າວດຽວກັນ.
ທັງນີ້, ທ່ານ ແອລັງກາ ກ່າວອີກວ່າ: ອິນໂດເນເຊຍຕັ້ງເປົ້າຍອດຂາຍລົດຍົນທັງໝົດໃນປີ 2025 ໃຫ້ລົດອີວີມີອັດຕາປະມານ 20%, ສ່ວນບໍລິສັດທີ່ລົງທຶນ ຫລື ປະກາດແຜນການລົງທຶນໃນການຜະລິດລົດຍົນໄຟຟ້າໃນອິນໂດເນເຊຍ ໄດ້ແກ່ ບໍລິສັດ ໂຕໂຍຕ້າ ມໍເຕີ, ບໍລິສັດ ມິດຊູບິຊິ ມໍເຕີ ແລະ ບໍລິສັດ ຮຸນໄດ ມໍເຕີ.
ນອກຈາກນີ້, ອິນໂດເນເຊຍຍັງພະຍາຍາມຊັກຊວນບໍລິສັດເທສລາ ໃຫ້ລົງທຶນການຜະລິດບໍ່ພຽງແຕ່ແບັດເຕີຣີລົດອີວີ ແຕ່ລວມທັງລົດຍົນໃນປະເທດນຳອີກ.
