ຍີ່ປຸ່ນຮັບຮອງຊຸດກວດອັລໄຊເມີ ດ້ວຍເລືອດຊຸດທຳອິດຂອງໂລກ
ສຳນັກຂ່າວບລູມເບິກລາຍງານວ່າ: ຍີ່ປຸ່ນໃຫ້ການຮັບຮອງໜຶ່ງໃນຊຸດທົດລອງສັນຍານຂອງພະຍາດອັລໄຊເມີດ້ວຍເລືອດຊະນິດທຳອິດຂອງໂລກ ເປີດທາງໄປສູ່ການບົ່ງມະຕິພະຍາດອັລໄຊເມີໄດ້ງ່າຍ ແລະ ໄວຂຶ້ນ.
ຖະແຫລງການຈາກບໍລິສັດຊິສເມັກ ຄອບ (Sysmex Corp.) ລະບຸວ່າ: ຜະລິດຕະພັນຂອງບໍລິສັດໄດ້ຮັບການຮັບຮອງໂດຍກະຊວງສາທາລະນະສຸກຍີ່ປຸ່ນຮຽບຮ້ອຍແລ້ວ ໂດຍຜະລິດຕະພັນນີ້ຈະເຮັດໃຫ້ການວັດແທກອະໄມລອຍ ບີຕາໃນເລືອດ ເຊິ່ງເປັນໂປຣຕີນຜິດປົກກະຕິທີ່ໄປຕິດຢູ່ໃນຈຸລັງປະສາດຂອງສະໝອງ ແລະ ເຮັດໃຫ້ເກີດພະຍາດອັລໄຊເມີ.
ຊິສເມັກລະບຸໃນຖະແຫລງການວ່າ: “ພວກເຮົາວາງແຜນຈະເປີດຕົວຜະລິດຕະພັນອອກສູ່ຕະຫລາດກ່ອນ. ຂະນະດຽວກັນໄດ້ດຳເນີນການດ້ານການຄຸ້ມຄອງໂດຍປະກັນສຸຂະພາບແຫ່ງຊາດຂອງຍີ່ປຸ່ນ”.
ລາຍງານຂອງກະຊວງສາທາລະນະສຸກຍີ່ປຸ່ນລະບຸວ່າ: ຍີ່ປຸ່ນ ເຊິ່ງມີອັດຕາປະຊາກອນຜູ້ສູງອາຍຸສູງທີ່ສຸດໃນໂລກ ມີຄົນເຈັບຈາກພະຍາດສະໝອງເສື່ອມ (Dementia) ປະມານ 6 ລ້ານຄົນ ເຊິ່ງສະພາບສະໝອງເສື່ອມເປັນອາການກວ້າງໆ ເຊິ່ງຄວບຄຸມເຖິງພະຍາດອັລໄຊເມີນຳ.
ຊຸດທົດລອງດ້ວຍເລືອດທີ່ໄດ້ຮັບການພັດທະນາຮ່ວມກັບບໍລິສັດເອໄຊ ໂຄ (Eisai Co.) ນີ້ ຈະຊ່ວຍໃຫ້ແພດໝໍໃນຍີ່ປຸ່ນມີເຄື່ອງມືທີ່ນຳໃຊ້ງ່າຍ, ລາຄາບໍ່ແພງ ແລະ ລ່ວງລ້ຳຄົນເຈັບໜ້ອຍລົງ ໃນການຄັດກອງຄົນເຈັບເພື່ອກວດຫາພະຍາດໄດ້ຢ່າງວ່ອງໄວ ເຊິ່ງປັດຈຸບັນຂະບວນການດັ່ງກ່າວດຳເນີນໂດຍໃຊ້ການເພສສະແກນ (PET Scan), ກວດເອັມອາຣໄອ (MRI) ຫລື ການເຈາະນ້ຳໄຂສັນຫລັງ (spinal tap) ເຊິ່ງມີຄວາມເຈັບປວດ.
ນອກຈາກນີ້, ການທົດລອງທີ່ສະດວກສະບາຍຈະຊ່ວຍໃຫ້ແພດຕັດສິນໃຈໄດ້ວ່າ: ໃຜມີຄຸນສົມບັດເໝາະສົມທີ່ຈະໄດ້ຮັບການປິ່ນປົວຮູບແບບໃໝ່ດ້ວຍຢາເລເຄນແມບ (Lecanemab) ເຊິ່ງໄດ້ຮັບການພັດທະນາໂດຍບໍລິສັດເອໄຊ ແລະ ໄບໂອເຈນ ອິງ (Biogen Inc.) ເຊິ່ງອາດໄດ້ຮັບການອະນຸມັດໃນອາເມລິກາໃນຕົ້ນປີໜ້າ.
