ປກສ ເມືອງທ່າແຂກ ສຶກສາອົບຮົມ ກຸ່ມແກ້ງມົ້ວສຸມ ດື່ມກາເຟມ່ວນ ແລະ ນ້ຳກະທ້ອມ

ໃນວັນທີ 21 ທັນວາ 2022 ຜ່ານມາ, ເຈົ້າໜ້າທີ່ຕຳຫລວດ ປກສ ເມືອງທ່າແຂກ ໄດ້ສຶກສາອົບຮົມກຸ່ມແກ້ງມົ້ວສຸມກິນກາເຟທີ່ມີສານເສບຕິດ ແລະ ນໍ້າກະທ້ອມ ຈຳນວນ 5 ຄົນ.

ທ່ານ ພັຕ ສີທາ ວົງພັກດີ ຮອງພະແນກຕຳຫລວດ ປກສ ເມືອງທ່າແຂກ ໃຫ້ຮູ້ວ່າ: ຜົນຮ້າຍຂອງສານເສບຕິດດັ່ງກ່າວນັ້ນ ເຊິ່ງອີງຕາມແຈ້ງການຂອງ ລັດຖະມົນຕີກະຊວງປ້ອງກັນຄວາມສະຫງົບ ສະບັບເລກທີ 13/ປກສ ລົງວັນທີ14 ກັນຍາ 2022 ກ່ຽວກັບການເພີ່ມທະວີການຄວບຄຸມ ແລະ ສະກັດກັ້ນ ການປູກ, ຜະລິດ, ປຸງແຕ່ງ, ຊົມໃຊ້, ຄ້າຂາຍ,ຈຳໜ່າຍຂົນສົ່ງ, ມີໄວ້ຄອບຄອງ, ນຳເຂົ້າ, ສົ່ງອອກ, ພືດທີ່ມີສານເສບຕິດປະເພດຕ່າງໆໂດຍບໍ່ຖືກຕ້ອງຕາມກົດໝາຍ.

ພາຍຫລັງສຶກສາອົບຮົມກ່າວເຕືອນພວກກ່ຽວສຳເລັດແລ້ວ ທາງເຈົ້າໜ້າທີ່ຕຳຫລວດ ປກສ ເມືອງທ່າແຂກ ກໍໄດ້ສ້າງບົດບັນທຶກກ່າວເຕືອນ ເພື່ອໃຫ້ພວກກ່ຽວມີການປ່ຽນແປງພຶດຕິກຳຂອງຕົນເອງ, ຖ້າຫາກພວກກ່ຽວຍັງໄດ້ສືບຕໍ່ກະທຳຜິດຕໍ່ໄປ ແມ່ນຈະຖືກເຈົ້າໜ້າທີ່ນຳຕົວມາດຳເນີນຄະດີຕາມກົດໝາຍຢ່າງເຂັ້ມງວດ.