ເລຂາທິການສະຫະປະຊາຊາດ ບໍ່ພໍໃຈ ກຸ່ມຕາລີບັນ ລະເມີດສິດທິ ຫ້າມຜູ້ຍິງ ຮຽນຕໍ່ໃນລະດັບມະຫາວິທະຍາໄລ

ສຳນັກຂ່າວຕ່າງປະເທດລາຍງານໃນວັນທີ 20 ທັນວາວ່າ: ທ່ານ ອັນໂຕນິໂອ ກູເຕີເຣສ ເລຂາທິການສະຫະປະຊາຊາດ (UN) ຮູ້ສຶກຕົກໃຈ ຫລັງຈາກໄດ້ຮັບຮູ້ເລື່ອງທີ່ກຸ່ມຕາລີບັນຫ້າມບໍ່ໃຫ້ຜູ້ຍິງເຂົ້າຮັບການສຶກສາຕໍ່ໃນລະດັບມະຫາວິທະຍາໄລ.

ທ່ານ ສະເຕຟານ ດູຈາຣິກ ໂຄສົກເລຂາທິການ UN ກ່າວໃນຖະແຫລງການວ່າ: “ທ່ານເລຂາທິການ UN ກູເຕີເຣສ ຕົກໃຈຢ່າງຍິ່ງກ່ຽວກັບລາຍງານຂ່າວທີ່ລະບຸວ່າ: ກຸ່ມຕາລີບັນໄດ້ອອກຄຳສັ່ງຫ້າມຜູ້ຍິງເຂົ້າຮຽນໃນມະຫາວິທະຍາໄລ ໂດຍທ່ານ ກູເຕີເຣສ ເນັ້ນວ່າ: ການກີດກັນການເຂົ້າເຖິງການສຶກສາບໍ່ພຽງລະເມີດສິດທິຂອງຜູ້ຍິງເທົ່ານັ້ນ, ແຕ່ຍັງສົ່ງຜົນກະທົບຢ່າງໃຫຍ່ຫລວງຕໍ່ອະນາຄົດຂອງປະເທດນຳອີກ”

ຖະແຫລງການລະບຸວ່າ: ທ່ານ ກູເຕີເຣສ ໄດ້ຮຽກຮ້ອງໃຫ້ກຸ່ມຕາລີບັນ ເຊິ່ງເປັນຜູ້ນຳອັບການິດສະຖານ ຮັບປະກັນວ່າຜູ້ຍິງ ແລະ ເດັກນ້ອຍຜູ້ຍິງທຸກຄົນຈະສາມາດເຂົ້າເຖິງການສຶກສາໃນທຸກລະດັບໄດ້ຢ່າງເທົ່າທຽມ.

ນາງ ໂຣຊາ ໂອຕຸນບາເຢວາ ຜູ້ແທນພິເສດປະຈຳສຳນັກງານພາລະກິດຊ່ວຍເຫລືອແຫ່ງ UN ໃນອັບການິດສະຖານ ກ່າວວ່າ: ຮູ້ສຶກເສົ້າໃຈຕໍ່ຂ່າວຕາລີບັນຫ້າມຜູ້ຍິງຮຽນຕໍ່ມະຫາວິທະຍາໄລ ເນື່ອງຈາກຖືເປັນໄພຕໍ່ຜູ້ຍິງ ແລະ ຍັງເປັນໄພຕໍ່ອັບການິດສະຖານນຳອີກ ໂດຍຖ້າຄຳສັ່ງດັ່ງກ່າວເປັນເລື່ອງຈິງ ຖືວ່າເປັນສິ່ງທີ່ໜ້າສະເທືອນໃຈທີ່ສຸດ.