ຄະນະອະນຸກຳມະການເຕັກນິກຊາຍແດນຮ່ວມ ລາວ-ໄທ ພົບປະກັນຄັ້ງທີ 15 ແລະ ແກ້ໄຂບໍລະເວນເສັ້ນຊາຍແດນຄົງຄ້າງ

ກອງປະຊຸມຄະນະອະນຸກຳມະການເຕັກນິກຊາຍແດນຮ່ວມລາວ-ໄທ ຄັ້ງທີ 15 ຈັດຂຶ້ນລະຫວ່າງວັນທີ 15-18 ທັນວາ 2022 ທີ່ນະຄອນຫລວງພະບາງ, ຝ່າຍລາວນຳໂດຍ ທ່ານ ອານຸສິນ ຂັດຕິຍະລາດ ຫົວໜ້າຫ້ອງການ ຄະນະກໍາມະການຊາຍແດນແຫ່ງຊາດ ກະຊວງການຕ່າງປະເທດ, ປະທານຄະນະອະນຸກໍາມະການເຕັກນິກຊາຍແດນຮ່ວມລາວ-ໄທ ແລະ ຝ່າຍໄທ ນຳໂດຍ ທ່ານ ພົນໂທ ໄຊຍະສິດ ປຣິນຍານຸພາບ ເຈົ້າກົມແຜນທີ່ທະຫານ ກອງບັນຊາການກອງທັບໄທ, ປະທານຄະນະອະນຸກໍາມະການເຕັກນິກຊາຍແດນຮ່ວມໄທ-ລາວ ພ້ອມດ້ວຍຜູ້ຕາງໜ້າຈາກຂະແໜງການທີ່ກ່ຽວຂ້ອງຂອງສູນກາງເຂົ້າຮ່ວມ.

ກອງປະຊຸມຄັ້ງນີ້, ໄດ້ທົບທວນຄືນການຈັດຕັ້ງປະຕິບັດບົດບັນທຶກກອງປະຊຸມຄະນະອະນຸກຳມະການເຕັກຮ່ວມລາວ-ໄທ ຄັ້ງທີ 14 ກ່ຽວກັບວຽກງານການສຳຫລວດ ແລະ ປັກຫລັກໝາຍຊາຍແດນ ລະຫວ່າງສາທາລະນະລັດ ປະຊາທິປະໄຕປະຊາຊົນລາວ ກັບຣາຊະອານາຈັກໄທ ໂດຍໄດ້ຮັບຮອງເອົາບົດບັນທຶກກອງປະຊຸມຄະນະຜູ້ອໍານວຍການໂຄງການຊາຍແດນຮ່ວມລາວ-ໄທ ຄັ້ງທີ 16, ສະບັບວັນທີ 10 ກັນຍາ 2022 ທີ່ນະຄອນປາກເຊ ກ່ຽວກັບຜົນການສຳຫລວດ ແລະ ປັກຫລັກໝາຍຊາຍແດນຮ່ວມ ລະຫວ່າງ ລາວ-ໄທ ແລະ ການແກ້ໄຂບັນຫາຫລັກໝາຍຊາຍແດນທີ່ຄົງຄ້າງ ແຕ່ວັນທີ 1 ສິງຫາ 1997 ເຖິງວັນທີ 30 ສິງຫາ 2022, ຊຶ່ງສອງຝ່າຍໄດ້ຮ່ວມກັນເດີນສໍາຫລວດກວດກາສັນປັນນໍ້າທີ່ຕໍ່ເນື່ອງທີ່ເປັນທິດເນັ່ງຂອງເສັ້ນຊາຍແດນ ແລະ ກໍ່ສ້າງຫລັກໝາຍຊາຍແດນເພີ່ມເຕີມຈຳນວນໜຶ່ງ.

ພ້ອມນັ້ນ, ສອງຝ່າຍກໍໄດ້ຮ່ວມກັນວາງແຜນການດໍາເນີນວຽກງານທາງດ້ານເຕັກນິກບໍລິເວນຊາຍແດນທີ່ຍັງບໍ່ທັນສຳເລັດ ການປັກຫລັກໝາຍຊາຍແດນລະຫວ່າງສອງປະເທດ ເພື່ອນໍາສະເໜີຕໍ່ກອງປະຊຸມຄະນະເຈົ້າໜ້າທີ່ອະວຸໂສ ພາຍໃຕ້ຄະນະກຳມາທິການຊາຍແດນຮ່ວມລາວ-ໄທ ພິຈາລະນາວິທີການແກ້ໄຂໃນຂັ້ນຕໍ່ໄປ. ທັງຖືເປັນບາດກ້າວໜຶ່ງຂອງການຮ່ວມມືໃນລະດັບຂັ້ນອະນຸກໍາມະການເຕັກນິກຊາຍແດນຂອງສອງປະເທດ ເພື່ອປຶກສາຫາລືສະເໜີຕໍ່ຂັ້ນເທິງຂອງຕົນພິຈາລະນາວິທີການໃນການແກ້ໄຂບໍລະເວນເສັ້ນຊາຍແດນຄົງຄ້າງລະຫວ່າງສອງປະເທດຮ່ວມກັນ.