ຈິດໃຈດີ, ອາລົມດີ ປ້ອງກັນພະຍາດຫລອດເລືອດສະໝອງ

ພະຍາດຫລອດເລືອດສະໝອງເປັນສາເຫດໜຶ່ງຂອງການເປັນອຳມະພຶກ – ອຳມະພາດ ເຊິ່ງລ້ວນແຕ່ມີຕົ້ນເຫດມາຈາກອາລົມ ຂອງຄົນນຳສ່ວນໜຶ່ງ, ຄົນທີ່ມີອາລົມດີ ມັກຈະເບິ່ງສົດໃສມີຊີວິດຊີວາ, ຄົນທີ່ຢູ່ອ້ອມຂ້າງກໍຮູ້ສຶກເຢັນໃຈ, ສະບາຍໃຈໄປນຳ, ຄົນໃນຄອບຄົວກໍຢູ່ດ້ວຍກັນຢ່າງມີຄວາມສຸກ, ມີແຕ່ຄົນຢາກເຂົ້າມາລົມນຳ. ໃນທາງກົງກັນຂ້າມ ຫາກເປັນຄົນທີ່ໂມໂຫໂທໂສ, ໝຸດໝັດອາລົມຮ້າຍ, ມັກຈົ່ມກໍຄົງບໍ່ມີໃຜຢາກເຂົ້າຫາແນ່ນອນ. ການອາລົມດີຂອງຄົນເຮົານັ້ນບໍ່ໄດ້ສົ່ງຜົນຕໍ່ຄົນອ້ອມຂ້າງຫລືໜ້າທີ່ວຽກງານເທົ່ານັ້ນ ແຕ່ຍັງສົ່ງຜົນຕໍ່ສຸຂະພາບນຳອີກ, ຜູ້ທີ່ມັກມີອາລົມຮ້າຍໆ ຈຶ່ງເຮັດໃຫ້ຮ່າງກາຍອ່ອນແອ ແລະ ເປັນພະຍາດໄດ້ຫລາຍ.

– ຜູ້ທີ່ມີອາລົມດ້ານລົບມັກມີຄວາມເຄັ່ງຄຽດສູງ, ມີຄວາມຄາດຫວັງສູງ, ບໍ່ພໍໃຈກັບສິ່ງອ້ອມໂຕ, ໝຸດໝັດ, ໂມໂຫຮ້າຍໄດ້ງ່າຍ ລວມໄປເຖິງມັກມີອາລົມອາຄາດ, ມີຄວາມພະຍາຍາມແຮງກ້ານຳອີກ ທັງໝົດນີ້ເຮັດໃຫ້ເກີດພະຍາດຫລອດເລືອດສະໝອງ ຫລື ສະໂຕຣກໄດ້ຫລາຍທີ່ສຸດ.

– ຄົນທີ່ວິຕົກກັງວົນເລື້ອຍໆມັກຢ້ານຄວາມຜິດພາດ, ຮ້ອນໃຈ ແລະ ວຸ້ນວາຍໃຈກັບສິ່ງທີ່ຍັງມາບໍ່ເຖິງ, ບໍ່ຢູ່ກັບປະຈຸບັນ, ເປັນຄົນບໍ່ຄ່ອຍເບິ່ງແຍງຕົນເອງ, ກິນນອນບໍ່ຖືກສຸຂະອະນາໄມ, ມັກສູບຢາ, ຂາດຄວາມໝັ້ນໃຈ ແລະ ອອກກຳລັງກາຍໜ້ອຍກ່ວາປົກກະຕິ.

– ຄົນທໍ້ຖອຍຫົດຫູ່ ມັກຄິດວ່າຕົນເອງບໍ່ມີຄ່າ, ບໍ່ມີບ່ອນເພິ່ງພາອາໄສ, ບໍ່ມີໝູ່, ມັກຮູ້ສຶກຫງ່ວມເຫງົາ, ໂດດດ່ຽວປ່ຽວພອຍ, ເບື່ອໜ່າຍ, ຫົດຫູ່ໃຈ, ສິ້ນຫວັງ ຈະມີຄວາມສ່ຽງໃນການເປັນພະຍາດຫລອດເລືອດສະໝອງຫລາຍກ່ວາຄົນທົ່ວໄປເຖິງ 3 ເທົ່າ.

ການຮັກສາສະພາບຈິດໃຈໃຫ້ດີ, ອາລົມດີຢູ່ສະເໝີ ຊ່ວຍປ້ອງກັນພະຍາດຫລອດເລືອດສະໝອງໄດ້ ຍ້ອນອາລົມດ້ານບວກຈະສົ່ງຜົນຕໍ່ຮໍໂມນເອັນໂດຣຟິນ ເຮັດໃຫ້ເສັ້ນເລືອດຜ່ອນຄາຍ, ຫົດຢືດໂຕດີຂຶ້ນ, ອະໄວຍະວະທຸກພາກສ່ວນ ແລະ ຈິດໃຈຈະເຮັດວຽກປະສານກັນໄດ້ດີ, ເມລາໂທນິນຈະຫລັ່ງອອກມາຄວບຄຸມການນອນຫລັບໃຫ້ເປັນປົກກະຕິໄດ້, ການໄຫລວຽນຂອງເລືອດຈະດີຂຶ້ນ, ຫົວໃຈເຮັດວຽກປົກກະຕິ, ສະໝອງພັກຜ່ອນ ແລະ ໂກຣດຮໍໂມນຈະຮັກສາຄວາມດຸ່ນດ່ຽງໃຫ້ແກ່ຮ່າງກາຍ,  ສາມາດປ້ອງກັນພະຍາດຮ້າຍຕ່າງໆໄດ້, ຜູ້ທີ່ມັກມີອາລົມດ້ານລົບຫລາຍໆຄວນປັບປ່ຽນໂຕເອງເພື່ອສຸຂະພາບຈິດທີ່ດີ ແລະ ສຸຂະພາບກາຍທີ່ແຂງແຮງສົມບູນຂຶ້ນຂອງທ່ານເອງ.