ຮັກສາສຸຂະພາບໃນຍາມໜາວ ເພື່ອຫລີກລ່ຽງພະຍາດຊະນິດອື່ນໆທີ່ອາດຕາມມາ
ເມື່ອເລີ່ມເຂົ້າເດືອນພະຈິກ ຫາ ເດືອນກຸມພາຂອງທຸກໆປີ, ສະພາບດິນຟ້າອາກາດຢູ່ປະເທດເຮົາຖືວ່າເປັນຊ່ວງຍາມໜາວ, ແຕ່ຈະໜາວໜ້ອຍໜາວຫລາຍນັ້ນກໍຂຶ້ນກັບແຕ່ລະປີ, ແຕ່ສຳລັບປີນີ້ເທົ່າທີ່ຕິດຕາມສະພາບດິນຟ້າອາກາດ ຖືວ່າທົ່ວທຸກພາກຂອງປະເທດໄດ້ເລີ່ມໜາວກັນໝົດແລ້ວ ໂດຍສະເພາະແມ່ນບັນດາແຂວງພາກເໜືອ ແລະ ພາກເໜືອດ້ານຕາເວັນອອກເຊັ່ນ: ແຂວງຜົ້ງສາລີ, ໄຊສົມບູນ, ຫົວພັນ, ຊຽງຂວາງ, ອຸດົມໄຊ ແລະ ພາກໃຕ້ແຖວພູພຽງບໍລິເວນ ແຂວງຈຳປາສັກ. ສ່ວນບັນດາແຂວງພາກກາງເຊັ່ນ: ນະຄອນຫລວງວຽງຈັນ, ບໍລິຄຳໄຊ, ຄຳມ່ວນ ແລະ ສະຫວັນນະເຂດ ກໍເລີ່ມມີອາກາດໜາວເຢັນ ທັງມີລົມພັດເລີ່ມແຕ່ຕົ້ນເດືອນທັນວາເປັນຕົ້ນມາ.
ແຕ່ແນວໃດກໍຕາມ, ໃນຊ່ວງຍາມໜາວຄືແນວນີ້ອາດມີພະຍາດຊະນິດອື່ນໆຕາມມາເຊັ່ນ: ເປັນໄອ, ເຈັບຄໍ, ໄຂ້ຫວັດ ຫລື ອາດເຈັບເປັນມີຜົນກະທົບຍ້ອນຄວາມໜາວເຢັນ ຫລື ບາງກໍລະນີ ບໍ່ວ່າຄົນ ຫລື ສັດແມ່ນຕາຍຍ້ອນຄວາມໜາວເຢັນກໍອາດເປັນໄປໄດ້. ໃນເງື່ອນໄຂທີ່ສະພາບດິນຟ້າອາກາດມັກປ່ຽນແປງເລື້ອຍໆຄືດັ່ງທຸກວັນນີ້ ພວກເຮົາຍິ່ງຈະຕ້ອງເອົາໃຈໃສ່ເບິ່ງແຍງສຸຂະພາບຂອງຕົນເອງໃຫ້ດີ ໂດຍສະເພາະແມ່ນຜູ້ເຖົ້າ ແລະ ເດັກນ້ອຍ ເພາະຄວາມໜາວອາດເຮັດໃຫ້ເຊື້ອພະຍາດຕາມມາໂດຍບໍ່ຄາດຄິດຈຶ່ງຂໍໃຫ້ທຸກຄົນພ້ອມກັນຮັກສາສຸຂະພາບນັ້ນລະຈຶ່ງດີ.
