ເບນເຊມາ ປະກາດອຳລາທີມຊາດຝຣັ່ງໃນໄວ 35 ປີ ຢ່າງເປັນທາງການ
ຄາຣິມ ເບນເຊມາ ກອງໜ້າປະສົບການຫລາຍຂອງ ຣຽວ ມາດຣິດ ປະກາດອຳລາທີມຊາດຝຣັ່ງຢ່າງເປັນທາງການ ດ້ວຍອາຍຸ 35 ປີ.
ໂດຍ ເບນເຊມາ ຫາກໍໄດ້ຮັບໂອກາດໃນການກັບມາຕິດທີມຊາດຝຣັ່ງເປັນຄັ້ງທຳອິດໃນຮອບ 5 ປີໄປເມື່ອປີ 2021 ແລະ ມີຊື່ເປັນ 1 ໃນ 26 ນັກເຕະຝຣັ່ງ ຊຸດສູ້ເສິກບານໂລກ 2022.
ແຕ່ເຖິງແນວໃດກໍຕາມເຈົ້າຂອງລາງວັນບັນລົງດໍສະໄຫມຫລ້າສຸດ ພັດໂຊກຮ້າຍເນື່ອງຈາກອາການບາດເຈັບຕົ້ນຂາຈາກການເຝິກຊ້ອມສົ່ງຜົນໃຫ້ ເບນເຊມາ ຕ້ອງຖອນຕົວອອກຈາກທີມຊາດໃນທີ່ສຸດ.
ຈົນຫລ້າສຸດວັນທີ 19 ທັນວາ ເຊິ່ງເປັນວັນເກີດປີທີ 35 ຂອງລາວ ເບນເຊມາ ໄດ້ປະກາດຜ່ານໂຊຊຽວ ມີເດຍ ໃນຖອນຕົວອອກຈາກທີມຊາດຢ່າງເປັນ ທາງການພ້ອມຂໍ້ຄວາມວ່າ : “ ຂ້ອຍໃຊ້ຄວາມພະຍາຍາມ ແລະ ຄວາມຜິດພາດທີ່ເກີດຂຶ້ນຈົນເປັນຂ້ອຍໃນທຸກມື້ນີ້ ແລະ ຂ້ອຍກໍພູມໃຈກັບມັນ ຂ້ອຍຂຽນເລື່ອງລາວຂອງຂ້ອຍ ແລະ ເລື່ອງຂອງເຮົາ (ທີມຊາດ) ຈົບລົງແລ້ວ ”.
ທັງນີ້ ເບນເຊມາ ຕິດທີມຊາດຝຣັ່ງຊຸດໃຫຍ່ເປັນຄັ້ງທຳອິດໃນປີ 2007 ດ້ວຍສະຖິຕິ 37 ປະຕູຈາກການລົງສະໜາມ 97 ເກມທຸກລາຍການ.
