ອິດສະລາແອນໃຊ້ເຕັກໂນໂລຊີ ເພີ່ມປະສິດທິພາບ ການກວດຈັບ “ລົດສຽງດັງ”

ລັດຖະບານອິດສະລາແອນກຳລັງຮວບຮວມວິທີການແກ້ໄຂບັນຫາທາງນະວັດຕະກຳ ເພື່ອຫລຸດສຽງລົບກວນຂອງລົດຕາມທ້ອງຖະໜົນ ດ້ວຍເຕັກໂນໂລຊີກວດຈັບອັດຕະໂນມັດ.

ວັນທີ 19 ທັນວາ, ສຳນັກຂ່າວຊິນຮົວລາຍງານວ່າ: ກະຊວງວັດທະນະທຳ, ວິທະຍາສາດ ແລະ ເຕັກໂນໂລຊີ ແລະ ກະຊວງຄຸ້ມຄອງສິ່ງແວດລ້ອມ ກ່າວໃນຖະແຫລງການຮ່ວມວ່າ: ແຜນດັ່ງກ່າວສະໜັບສະໜູນໃຫ້ບໍລິສັດ ແລະ ຜູ້ປະກອບການເຕັກໂນໂລຊີ ຄິດຄົ້ນວິທີແກ້ໄຂບັນຫາ ເຊິ່ງຊ່ວຍໃຫ້ສາມາດກວດຈັບລົດທີ່ມີ “ສຽງດັງຜິດປົກກະຕິ” ໃນທັດນະວິໄສ ແລະ ສະພາບອາກາດຕ່າງໆເຊັ່ນ: ຄວາມມືດ ແລະ ໝອກ ເພື່ອໃຫ້ການບັງຄັບໃຊ້ກົດໝາຍມີຄວາມສັບຊ້ອນໜ້ອຍລົງ ແລະ ຫລຸດແຮງງານຄົນ.

ທັງນີ້, ລັດຖະບານອິດສະລາແອນຈະຄັດເລືອກວິທີແກ້ໄຂບັນຫາ 3 ລາຍການ ເພື່ອເຂົ້າຮ່ວມການສາທິດ ເຊິ່ງແຕ່ລະວິທີຈະໄດ້ຮັບເງິນສະໜັບສະໜູນຈາກລັດຖະບານຈຳນວນ 50.000 ເຊເກລ.

ລາຍງານໂດຍໜ່ວຍງານລັດທີ່ກ່ຽວຂ້ອງຫລາຍແຫ່ງຂອງລັດຖະບານອິດສະລາແອນລະບຸວ່າ: ສຽງລົບກວນຈາກລົດຍົນ ເປັນບັນຫາຊຳເຮື້ອຂອງປະເທດ ໃນໄລຍະຫລາຍປີຜ່ານມາ ເຊິ່ງກໍ່ໃຫ້ເກີດບັນຫາສຸຂະພາບ ແລະ ລົບວນກິດຈະກຳປະຈຳວັນ ໂດຍສຽງທີ່ດັງເກີນໄປນັ້ນມາຈາກເຄື່ອງຈັກ ແລະ ລະບົບໄອເສຍຂອງລົດຈັກ ເຊິ່ງດັດແປງຢ່າງຜິດກົດໝາຍ.

ແຜນດັ່ງກ່າວໄດ້ຮັບການເຜີຍແພ່ໃນເວັບໄຊ “ເນຊັນແນລ ຊາເລນເຈສ” ທີ່ສ້າງຂຶ້ນເພື່ອປັບປຸງປະສິດທິພາບຂອງລັດຖະບານອິດສະລາແອນ ຜ່ານການປະສົມປະສານເຕັກໂນໂລຊີທາງນະວັດຕະກຳໃໝ່.