ປະເທດຢູກັນດາ ປະກາດຍົກເລີກຂໍ້ຈຳກັດຄຸມເຂັ້ມພະຍາດອີໂບລາ ຫລັງບໍ່ມີການແພ່ລະບາດ

ປະທານາທິບໍດີ ໂຢເວຣີ ມູເຊເວນີ ຂອງຢູກັນດາ ປະກາດຍົກເລີກຂໍ້ຈຳກັດທຸກຢ່າງທີ່ກ່ຽວຂ້ອງກັບເຊື້ອໄວຣັສອີໂບລາ ໃນວັນທີ 17 ທັນວາ ໂດຍລະບຸວ່າ: ຢູກັນດາມີຄວາມຄືບໜ້າໃນການຄວບຄຸມພະຍາດ.

ທ່ານ ມູເຊເວນີ ປະກາດຍົກເລີກຂໍ້ຈຳກັດໃນເຂດສູນກາງການແພ່ລະບາດຂອງພະຍາດຄືມູເບນເດ ເຊິ່ງມີຜູ້ຕິດເຊື້ອ 66 ຄົນ ແລະ ເສຍຊີວິດ 29 ຄົນ ແລະ ເຂດຄັສຊັນດາ ເຊິ່ງມີຜູ້ຕິດເຊື້ອ 49 ຄົນ ແລະ ເສຍຊີວິດ 21 ຄົນ.

ຜູ້ນຳຢູກັນດາໄດ້ລະບຸໃນຖະແຫລງການວ່າ: “ປັດຈຸບັນ ຢູກັນດາບໍ່ມີການແພ່ລະບາດ, ບໍ່ມີການຕິດຕໍ່ລະຫວ່າງການຕິດຕາມອາການ, ບໍ່ມີຜູ້ຕິດເຊື້ອໃນສະຖານກັກກັນ ແລະ ພວກເຮົາກຳລັງເດີນໜ້າໄປໄດ້ດ້ວຍດີຕໍ່ການນັບຖອຍຫລັງສູ່ວັນສິ້ນສຸດການແພ່ລະບາດຂອງອີໂບລາ”.

ສຳນັກຂ່າວຣອຍເຕີລາຍງານວ່າ: ເຈົ້າໜ້າທີ່ໄດ້ຢືນຢັນການແພ່ລະບາດຂອງເຊື້ອໄວຣັສອີໂບລາຄັ້ງທຳອິດໃນເດືອນກັນຍາ ໂດຍລະບຸວ່າເປັນສາຍພັນຊູດານທີ່ພົບໄດ້ຍາກ ເຊິ່ງຂ້າຊີວິດຜູ້ຕິດເຊື້ອໄປ 40%-60% ແລະ ຍັງບໍ່ມີວັກຊີນໃດທີ່ໄດ້ຮັບການຮັບຮອງ.

ທັງນີ້, ໃນເດືອນຕຸລາ ລັດຖະບານຢູກັນດາໄດ້ວາງຂໍ້ຈຳກັດການເດີນທາງ ແລະ ປະກາດເຄີຟິວຊົ່ວຂ້າມຄືນ ຕະຫລອດຈົນປິດສະຖານທີ່ສັກກາລະ ແລະ ສະຖານບັນເທີງຕ່າງໆ. ເຖິງຢ່າງໃດກໍຕາມ, ໃນໄລຍະຕົ້ນເດືອນຜ່ານມາ ຢູກັນດາກ່າວວ່າ: ໄດ້ປ່ອຍຜູ້ຕິດເຊື້ອອີໂບລາຄົນສຸດທ້າຍແລ້ວ.