ຊຽງໄຮ້ຮຽກຮ້ອງໃຫ້ບັນດາໂຮງຮຽນສອນອອນລາຍ ເລີ່ມ 19 ທັນວານີ້ ຫລັງສະຖານະການໂຄວິດຮຸນແຮງຂຶ້ນ

ສຳນັກການສຶກສາຂອງຊຽງໄຮ້ໄດ້ຮຽກຮ້ອງໃຫ້ໂຮງຮຽນປະຖົມ, ມັດທະຍົມຕົ້ນ ແລະ ມັດທະຍົມປາຍສ່ວນຫລາຍຈັດຊັ້ນຮຽນທາງອອນລາຍນັບແຕ່ວັນທີ 19 ທັນວານີ້ ເນື່ອງຈາກການຕິດເຊື້ອໂຄວິດ-19 ທະວີຄວາມຮຸນແຮງຂຶ້ນໃນເມືອງໃຫຍ່ໆທົ່ວປະເທດຈີນ.

ສຳນັກງານການສຶກສາຊຽງໄຮ້ຍັງໄດ້ຮຽກຮ້ອງໃນວັນທີ 17 ທັນວາ ໃຫ້ໂຮງຮຽນອະນຸບານ ແລະ ສູນລ້ຽງເດັກຕ່າງໆໃນຊຽງໄຮ້ປິດຊັ້ນຮຽນແບບພົບປະກັນທັງໝົດນັບແຕ່ວັນທີ 19 ທັນວານີ້ນຳອີກ.

ສຳນັກຂ່າວຣອຍເຕີລາຍງານວ່າ: ໃນອາທິດຜ່ານມາ, ຈີນໄດ້ຍົກເລີກມາດຕະການຄວບຄຸມໂຄວິດທີ່ເຂັ້ມງວດທີ່ສຸດໃນໂລກ ແລະ ປັດຈຸບັນກຳລັງຜະເຊີນຈຳນວນຜູ້ຕິດເຊື້ອທີ່ເພີ່ມສູງຂຶ້ນ ໂດຍມີຄວາມກັງວົນວ່າໂຄວິດອາດລະບາດໃນປະຊາກອນ 1,4 ພັນລ້ານຄົນໃນໄລຍະມື້ພັກກຸດຈີນໃນເດືອນໜ້າ.