ເຊກອງ ກໍານົດເອົາ 4 ຈຸດສຸມ ໃນການພັດທະນາຊົນນະບົດ ແລະແກ້ໄຂຄວາມທຸກຍາກຂອງປະຊາຊົນ

ທ່ານ ສີສຸພັນ ມະຫາວົງ ຫົວໜ້າຫ້ອງວ່າການແຂວງເຊກອງ ໃຫ້ຮູ້ວ່າ: ໃນປີ 2016-2022 ນີ້ ແຂວງເຊກອງໄດ້ສຸມທຶນຮອນເຂົ້າໃສ່ການພັດທະນາຊົນນະບົດ ແລະ ແກ້ໄຂຄວາມທຸກຍາກທົ່ວແຂວງ ໂດຍການກໍ່ສ້າງຜັນຂະຫຍາຍພື້ນຖານໂຄງລ່າງໄປສູ່ເຂດຊົນນະບົດຫ່າງໄກສອກຫລີກໃຫ້ທົ່ວເຖິງ ແລະມີຄຸນນະພາບດ້ວຍການສົ່ງເສີມກໍາລັງແຮງທຸກພາກສ່ວນເສດຖະກິດເຂົ້າຮ່ວມ ແລະ ເຮັດຢ່າງມີຈຸດສຸມເພື່ອປັບປຸງກໍ່ສ້າງພື້ນຖານໂຄງລ່າງ ພື້ນຖານສາທາລະນະ,ຈັດສັນ, ເຕົ້າໂຮມບ້ານນ້ອຍເຂ້າເປັນບ້ານໃຫຍ່, ຈັດສັນພູມລໍາເນົາຄົງທີ່ ແລະ ບ່ອນທໍາມາຫາກິນທີ່ຫມັ້ນທ່ຽງຍືນຍົງໃຫ້ປະຊາຊົນ, ສ້າງເງື່ອນໄຂ ແລະ ສົ່ງເສີມການຜະລິດເປັນສິນຄ້າສ້າງລາຍໄດ້ໃຫ້ແກ່ຄອບຄົວ, ປັບປຸງຍົກລະດັບຊີວິດການເປັນຢູ່ໃຫ້ດີຂຶ້ນ ເພື່ອຫລຸດພົ້ນອອກຈາກຄວາມທຸກຍາກເທື່ອລະກ້າວ.

ໂດຍປະຕິບັດຕາມທິດນໍາທີ່ວ່າ ”ເຮັດຢ່າງຮອບດ້ານ ແລະມີຈຸດສຸມ” ຄະນະພັກອົງການປົກຄອງແຂວງ ໄດ້ເປັນໃຈກາງສົມທົບກັບພະແນກການ, ກົມກອງ, ຂະແຫນງການ, ເມືອງກຳນົດບ້ານ, ຈຸດສຸມພັດທະນາຊົນນະບົດ ແລະ ລຶບລ້າງຄວາມທຸກຍາກ ປະກອບມີ 4 ວຽກຈຸດສຸມຄື: 1. ຈຸດສຸມບູລິມະສິດຂອງທ້ອງຖິ່ນ ລວມມີ 3 ເມືອງຄື ລະມາມ, ກະລຶມ ແລະ ເມືອງດາກຈຶງ, ການແກ້ໄຂຄວາມທຸກຍາກໃນບໍລິເວນດັ່ງກ່າວ ແມ່ນໄດ້ດຳເນີນໄປຢ່າງຮອບດ້ານ ຕາມ 4 ເນື້ອໃນ 4 ຄາດໝາຍໂດຍສຸມໃສ່ບ້ານທີ່ເປັນໃຈກາງທາງດ້ານເສດຖະກິດ-ສັງຄົມ ເປັນຕົ້ນແມ່ນການກໍ່ສ້າງພື້ນຖານໂຄງລ່າງຊົນນະບົດຖະໜົນຫົນທາງ, ໄຟຟ້າ, ສ້າງໂຮງຮຽນ, ສຸກສາລາ, ສະໜອງນໍ້າສະອາດ, ຫ້ອງການ ແລະ ສະໂມສອນກຸ່ມບ້ານ ເພື່ອສ້າງເງື່ອນໄຂອຳນວຍຄວາມສະດວກໃນການດຳລົງຊີວິດໃຫ້ແກ່ປະຊາຊົນ, ຊຸກຍູ້, ສົ່ງເສີມການຜະລິດເປັນສິນຄ້າ ເພື່ອສ້າງລາຍຮັບຂອງຄອບຄົວ, ປັບປຸງລະບົບການເມືອງຂັ້ນບ້ານ, ກຸ່ມບ້ານ ໃຫ້ມີຄວາມເຂັ້ມແຂງ, 2. ຈຸດສຸມຈັດສັນພູມລໍາເນົາ ແລະ ບ່ອນທໍາມາຫາກິນຖາວອນຂອງທ້ອງຖິ່ນລວມມີ 2 ເມືອງຄື: ກະລຶມ ແລະ ດາກຈຶງ, ທີ່ກໍານົດເປັນເປົ້າໝາຍເພື່ອປະຕິບັດຕາມທິດໂຮມບ້ານນ້ອຍເຂົ້າເປັນບ້ານໃຫຍ່, ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ ຕິດພັນກັບການແກ້ໄຂບັນກາການຍົກຍ້າຍແບບຊະຊາຍຂອງພົນລະເມືອງ; 3. ຈຸດສຸມບູລິມະສິດສ້າງບ້ານໃຫຍ່ ເປັນຕົວເມືອງນ້ອຍໃນຊົນນະບົດ ລວມມີ 4 ເມືອງ ຊຶ່ງນອນໃນເຂດທີ່ໝັ້ນພື້ນຖານການປະຕິວັດ, ເຂດເມືອງ-ບ້ານວິລະຊົນ, ເຂດຫ່າງໄກສອກຫລີກທຸລະກັນດານທີ່ມີເງື່ອນໄຂສ້າງເປັນໃຈກາງທາງດ້ານເສດຖະກິດ-ສັງຄົມ, ການແກ້ໄຂຄວາມທຸກຍາກບໍລິເວນດັ່ງກ່າວ ແມ່ນໄດ້ດໍາເນີນໄປຢ່າງຮອບດ້ານ ຕາມ 4 ເນື້ອໃນ 4 ຄາດໝາຍ ໂດຍໄດ້ສຸມໃສ່ການກໍ່ສ້າງພື້ນຖານໂຄງລ່າງ ຕິດພັນກັບການຈັດສັນພູມລໍາເນົາບ່ອນທໍາມຫາກິນຖາວອນ ແລະ ສ້າງອາຊີບທີ່ໝັ້ນຄົງ, ສົ່ງເສີມການຜະລິດເປັນສິນຄ້າ ສ້າງລາຍຮັບຂອງຄອບຄົວ ເຮັດໃຫ້ຊີວິດການເປັນຢູ່ຂອງປະຊາຊົນດີຂຶ້ນກວ່າເກົ່າ; 4. ຈຸດສຸມພັດທະນາຊົນນະບົດໃໝ່ ມີ 1 ຈຸດສຸມ ໂດຍຈະໄດ້ກໍານົດເປັນຈຸດສຸມຕົວແບບຂອງການພດທະນາ, ເຊິ່ງຈະໄດ້ຮ່ວມກັນຈັດຕັ້ງປະຕິບັດ ລະຫວ່າງສູນກາງ, ແຂວງ ແລະເມືອງ, ປະຈຸບັນ ພວມດໍາເນີນການຈັດຕັ້ງຜະຕິບັດການສ້າງແຜນພັດທະນາໃນ 5 ປີ ຕໍ່ໜ້າ.