ເອດີບີ ຄາດຄະເນ ອັດຕາເງິນເຟີ້ໃນ ສປປ ລາວ ສະເລ່ຍ 23% ໃນປີນີ້ ແລະ ຫຼຸດລົງເປັນ 10% ໃນປີໜ້າ
December 16, 2022 - 2:53 PM
ທະນາຄານພັດທະນາອາຊີ (ADB) ໄດ້ເຜີຍແຜ່ບົດລາຍງານ ຄາດຄະເນການພັດທະນາໃນອາຊີ (ADO) 2022 ໃນວັນທີ 14 ທັນວາ ຜ່ານມາ ໂດຍລະບຸວ່າ ADB ຍັງຄົງຮັກສາການຄາດຄະເນການເຕີບໂຕທາງດ້ານເສດຖະກິດ ຂອງ ສປປ ລາວ, ໃນຂະນະທີ່ການຄາດຄະເນອັດຕາເງິນເຟີ້ທີ່ສູງຂຶ້ນ, ແຕ່ຄາດວ່າອັດຕາເງິນເຟີ້ໃນ ສປປ ລາວ ຈະຢູ່ໃນລະດັບສະເລ່ຍຢູ່ທີ່ 23% ໃນປີ 2022, ກ່ອນຈະຫຼຸດລົງເປັນ 10% ໃນປີ 2023.
ADB ລະບຸໃນບົດລາຍງານວ່າ ອັດຕາເງິນເຟີ້ ຍັງສືບຕໍ່ເພີ່ມຂຶ້ນໃນເສດຖະກິດທົ່ວເອເຊຍ ແລະ ປາຊີຟິກ ຈາກລາຄາພະລັງງານ ແລະ ສະບຽງອາຫານທີ່ສູງຂຶ້ນ ຊຶ່ງມີຕົ້ນເຫດມາຈາກຜົນກະທົບຂອງຄວາມຂັດແຍ່ງລະຫວ່າງ ຣັດເຊຍ ແລະ ອູແກຣນ. ໃນຂະນະທີ່ລາຄານ້ໍາມັນ, ອາຍແກັສ ແລະ ອາຫານໃນທົ່ວໂລກ ໄດ້ຫຼຸດລົງຈາກຈຸດສູງສຸດແລ້ວ, ແຕ່ລາຄາຍັງຄົງສູງກວ່າກ່ອນເກີດຄວາມຂັດແຍ່ງ. ບົດລາຍງານຍັງຄາດຄະເນວ່າ ອັດຕາເງິນເຟີ້ໃນ ສປປ ລາວ ຈະຢູ່ໃນລະດັບສະເລ່ຍ 23% ໃນປີ 2022 ກ່ອນຈະຫຼຸດລົງເປັນ 10% ໃນປີ 2023.
ADB ລະບຸວ່າ: “ຄວາມກົດດັນຂອງອັດຕາເງິນເຟີ້ ຄາດວ່າຈະສືບຕໍ່ໃນໄລຍະສັ້ນ, ຈາກນະໂຍບາຍເຄັ່ງຄັດຂອງທະນາຄານກາງ ໃນທົ່ວໂລກ ໃນສະພາບການອ່ອນຄ່າຂອງສະກຸນເງິນທ້ອງຖິ່ນ, (ສະກຸນເງິນພາຍໃນປະເທດ)” ທ່ານ Sonomi Tanaka ຜູ້ຕາງໜ້າ ADB ປະຈໍາ ສປປ ລາວ ກ່າວ. “ມັນມີຄວາມສໍາຄັນ ທີ່ໃຫ້ມີຄວາມພະຍາຍາມປະສານງານ ໃນການແກ້ໄຂຜົນກະທົບຈາກການອ່ອນຄາຂອງເງິນຕາ ຕໍ່ອັດຕາເງິນເຟີ້ ພາຍໃນປະເທດ ໂດຍສະເພາະແມ່ນຕໍ່ລາຄາອາຫານ ແລະ ນໍ້າມັນເຊື້ອໄຟ ເນື່ອງຈາກການເໜັງຕີງຂອງລາຄາສິນຄ້າເຫຼົ່ານີ້ ສ້າງຜົນກະທົບຕໍ່ປະຊາຊົນ ໂດຍສະເພາະຜູ້ທຸກຍາກ.
“ກໍລະນີສຶກສາໃໝ່ຂອງ ADB ທີ່ເຜີຍແຜ່ໃນວັນທີ 14 ທັນວາ ຜ່ານມາ ລະບຸວ່າ: ການພັດທະນາຕະຫຼາດພັນທະບັດລັດຖະບານສະກຸນເງິນທ້ອງຖິ່ນ ໃນຕະຫຼາດທີ່ເກີດໃໝ່ ໃນພາວະການລະບາດໂຄວິດ-19, ໄດ້ຍົກໃຫ້ເຫັນເຖິງວິທີການພັດທະນາຕະຫຼາດ ພັນທະບັດລັດຖະບານ ສະກຸນເງິນທ້ອງຖິ່ນໃນ ສປປ ລາວ ສາມາດຊ່ວຍເພີ່ມຄວາມເຂັ້ມແຂງໃຫ້ແກ່ການຟື້ນຟູເສດຖະກິດ ແລະ ສາມາດຮັບມືຕໍ່ການປ່ຽນແປງໄດ້.
ADB ຍັງລະບຸອີກວ່າ: “ການລົງເລິກຕະຫຼາດການເງິນພາຍໃນ ໂດຍສະເພາະພັນທະບັດລັດຖະບານສະກຸນເງິນທ້ອງຖິ່ນ, ໃຫ້ຜົນປະໂຫຍດທີ່ຫຼາກຫຼາຍ ລວມທັງການຍົກສູງຄວາມອາດສາມາດຂອງເສດຖະກິດ ທີ່ຈະຕອບສະໜອງຕໍ່ການປ່ຽນແປງ ແລະ ສະໜອງແຫຼ່ງທຶນທີ່ໝັ້ນຄົງໃຫ້ແກ່ລັດຖະບານ ໃນລາຄາທີ່ເໝາະສົມ ແລະ ອາຍຸພັນທະບັດຕາມຄວາມຕ້ອງການ,”. “ເສດຖະກິດເຫຼົ່ານັ້ນທີ່ມີຄວາມຄືບໜ້າໃນການລົງເລິກຕະຫຼາດເງິນຕາທ້ອງຖິ່ນຂອງຕົນ ແມ່ນໄດ້ຮັບການປ້ອງກັນຫຼາຍກວ່າ ຈາກການປ່ຽນແປງກະທັນຫັນຂອງເງິນຕາ.”
ການໝູນໃຊ້ປະສົບການຈາກການລິເລີ່ມຕະຫຼາດພັນທະບັດອາຊີ, ກໍລະນີສຶກສາ ໄດ້ວາງມາດຕະການໄລຍະສັ້ນ ແລະ ກາງ ທີ່ສາມາດຊ່ວຍປັບປຸງປະສິດທິພາບຂອງຕະຫຼາດພັນທະບັດລັດຖະບານ, ລວມທັງການຄຸ້ມຄອງກະແສເງິນສົດຂອງລັດຖະບານ ແລະ ໜີ້ສິນສາທາລະນະຢ່າງມີປະສິດທິພາບ.
