ຊຽງຂວາງ ເປີດຕະຫລາດນັດ 5 ແຂວງພາກເໜືອ ແລະ 1 ແຂວງພາກກາງ ນຳສິນຄ້າໂອດ໋ອບ 60 ກວ່າລາຍການຮ່ວມ

ທ່ານ ບົວວອນ ວົງປັນຍາ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງຊຽງຂວາງ ຫົວໜ້າຜູ້ຊີ້ນຳການສົ່ງເສີມວິສາຫະກິດ ແລະ ການຄ້າ ໃຫ້ສໍາພາດວັນທີ 15 ທັນວາ 2022 ວ່າ:

ການວາງສະແດງ ແລະ ຂາຍສິນຄ້າຄັ້ງນີ້ ເພື່ອສ້າງຂະບວນການຄໍານັບຮັບຕ້ອນວັນເກີດປະທານ ໄກສອນ ພົມວິຫານຄົບຮອບ 102 ປີ, ສະເຫຼີມສະຫຼອງມະຫະກຳກີລາແຫ່ງຊາດ ຄັ້ງທີ XI, ສະເຫຼີມ ສະຫຼອງໄຫຫີນ ເປັນມໍລະດົກໂລກ ແລະ ກະກຽມສົມໂພດພະເຈົ້າໃຫຍ່ອົງຫຼວງປະທານພອນ ເພື່ອສ້າງໂອ ກາດໃຫ້ຜູ້ຊື້ ແລະ ຜູ້ຂາຍມາພົບກັນເພື່ອເຈລະຈາທຸລະກິດແບບໂຕຕໍ່ໂຕ ເຮັດໃຫ້ຜູ້ປະກອບການເຂົ້າໃຈ ແລະ ເຫັນໄດ້ຄວາມສຳຄັນຂອງການວາງສະແດງສິນຄ້າ ທີ່ຖືເປັນເຄື່ອງມືການຕະຫຼາດທີ່ສຳຄັນສາມາດຊ່ວຍໃຫ້ພາກສ່ວນທຸລະກິດຕ່າງໆທີ່ມາວາງສະແດງນໍາສະເໜີຂາຍ ຫຼື ໂຄສະນາສິນຄ້າໃຫ້ກຸ່ມລູກຄ້າຖືກເປົ້າ ໝາຍ ທັງເປັນສືກາງທີ່ມີປະສິດທິຜົນໃນການເລີ່ມຕົ້ນ ແລະ ຮັກສາຄວາມສຳພັນລະຫວ່າງຜູ້ປະກອບການ ແລະ ລູກຄ້າ ເພື່ອນຳໄປສູ່ອຸດສາຫະກຳ ແລະ ທຸລະກິດຂອງຜູ້ປະກອບການມີປະສິດທິຜົນ ແລະ ເປັນຊ່ອງທາງການສື່ສານຄຸນລັກສະນະທີ່ດີໃຫ້ຜູ້ມາວາງສະແດງ ພ້ອມນີ້ຜູ້ມາຮ່ວມຍັງໄດ້ຂໍ້ມູນສິນຄ້າໃໝ່ເພື່ອຕິດຕໍ່ສືສານການຊື້-ຂາຍສິນຄ້າໃນອະນາຄົດ ແລະ ຊ່ວຍຜູ້ປະກອບການປັບປຸງທັກສະການຂາຍ ເປັນເງື່ອນໄຂການພັດທະນາສິນຄ້າໃຫ້ສາມາດສົ່ງອອກໃຫ້ນັບມື້ຂະຫຍາຍຕົວ ແລະ ເປີດໂອກາດໃຫ້ຫົວໜ່ວຍທຸລະກິດພາຍໃນ ແລະ ຕ່າງປະເທດ ໄດ້ແລກປ່ຽນບົດຮຽນ ກ້າວໄປເຖິງການຊື້-ຂາຍໃຫ້ກວ້າງຂວາງ ເຮັດໃຫ້ນັກທ່ອງທ່ຽວພາຍໃນແຂວງ ຕ່າງແຂວງ ແລະ ຕ່າງປະເທດ ເຂົ້າທ່ຽວຊົມສິນຄ້າ ສ້າງເງື່ອນໄຂຊຸກຍູ້ ສົ່ງເສີມຜູ້ຜະລິດ ເພື່ອພັດທະນາສິນຄ້າທົດແທນການນໍາເຂົ້າເທື່ອລະກ້າວ.

ການວາງສະແດງ ແລະ ຂາຍສິນຄ້າໂອດ໋ອບ 5 ແຂວງພາກເໜືອ ແລະ 1 ແຂວງພາກກາງມີ 38 ຫ້ອງວາງສະແດງ ໂດຍສິນຄ້າທີ່ນຳມາວາງຂາຍສ່ວນໃຫຍ່ມີສິນຄ້າໂອດ໋ອບຂອງແຂວງຊຽງຂວາງ 20 ຫົວໜ່ວຍ 22 ລາຍການ ມູນຄ່າ 3 ຕື້ກວ່າກີບ ບັນດາຫົວໜ່ວຍຜະລິດສິນຄ້າໂອດ໋ອບບາງແຂວງພາກເໜືອ ແລະ ພາກກາງ 42 ລາຍການ ມູນຄ່າ 130 ລ້ານກວ່າກີບ ນອກນີ້ຍັງມີຜະລິດຕະພັນກະສິກຳຂອງພະແນກກະສິກຳ ແລະ ປ່າໄມ້ ແລະ ສິນຄ້າທ່າແຮງຂອງແຂວງຊຽງຂວາງອີກຈຳນວນໜຶ່ງ .