ອົງການອະນາໄມໂລກຫວັງປະກາດຢຸດສະຖານະການສຸກເສີນ ດ້ານສຸຂະພາບໂລກຈາກໂຄວິດໃນປີໜ້າ

ທ່ານ ທີໂດສ ອັດຮານອມ ກີບຣີເຢຊຸສ ຜູ້ອຳນວຍການໃຫຍ່ຂອງອົງການອະນາໄມໂລກ (WHO) ເປີດເຜີຍໃນວັນທີ 14 ທັນວາວ່າ: ທ່ານຫວັງວ່າໂຄວິດ-19 ຈະບໍ່ເປັນສະຖານະການສຸກເສີນດ້ານສຸຂະພາບທົ່ວໂລກອີກຕໍ່ໄປໃນປີໜ້າ.

ທ່ານ ທີໂດສ ລະບຸໃນການຖະແຫລງຂ່າວ ຢູ່ນະຄອນຫລວງເຈນີວາວ່າ: ຄະນະກຳມະການສຸກເສີນດ້ານພະຍາດໂຄວິດ-19 ຂອງ WHO ກຽມຫາລືກ່ຽວກັບຫລັກເກນໃນການປະກາດຢຸດສະຖານະການສຸກເສີນຂອງພະຍາດໂຄວິດ-19 ໃນເດືອນໜ້າ.

ນອກຈາກນີ້, ທ່ານ ທີໂດສ ຍັງກ່າວອີກວ່າ: ໜຶ່ງໃນບົດຮຽນທີ່ສຳຄັນທີ່ສຸດຈາກການລະບາດທີ່ເກີດຂຶ້ນກໍຄືທຸກປະເທດຈຳເປັນຕ້ອງສົ່ງເສີມລະບົບສາທາລະນະສຸກຂອງຕົນເພື່ອກຽມພ້ອມ, ປ້ອງກັນ, ກວດຫາ ແລະ ຕອບສະໜອງຕໍ່ການແພ່ລະບາດຂອງພະຍາດໃນລະດັບຕ່າງໆ. ໃນຂະນະທີ່ບົດຮຽນທີ່ສຳຄັນອີກປະການໜຶ່ງກໍຄື ເຮົາຕ້ອງການການຮ່ວມມືທີ່ແໜ້ນແຟ້ນຍິ່ງຂຶ້ນໃນການເຮັດວຽກຮ່ວມກັນ ຫລາຍກວ່າການແຂ່ງຂັນ ແລະ ຄວາມສັບສົນວຸ້ນວາຍທີ່ເກີດຂຶ້ນໃນການຮັບມືຕໍ່ການແພ່ລະບາດຂອງພະຍາດໂຄວິດ-19 ທົ່ວໂລກ.

ຂະນະດຽວກັນ, ທ່ານ ນາງ ມາເຣຍ ຟານ ເດິໂຄບ ຫົວໜ້າຝ່າຍເຕັກນິກຂອງໂຄງການສຸກເສີນດ້ານສຸຂະພາບ (Health Emergencies) ຂອງ WHO ເຕືອນວ່າ: ການແພ່ລະບາດຮອບໃໝ່ ແລະ ການຕິດເຊື້ອຊ້ຳຈະຍັງດຳເນີນຕໍ່ໄປທົ່ວໂລກ. ຂະນະທີ່ຈຳນວນຜູ້ເສຍຊີວິດໃໝ່ປະຈຳອາທິດທີ່ລາຍງານໂດຍປະເທດຕ່າງໆຍັງຢູ່ລະຫວ່າງ 8.000 ເຖິງ 10.000 ຄົນ.