ຜົນການສຶກສາບອກວ່າ ຖ້າຢາກໃຫ້ສະໝອງແຈ່ມໃສ ມີຄວາມຈໍາທີ່ດີ ຄວນຫລຸດການບໍລິໂພກນໍ້າຕານ

ການປ່ຽນແປງພຶດຕິກໍາຕົວເອງດ້ວຍ 1 ເລື່ອງທີ່ບໍ່ງ່າຍ ແລະ ບໍ່ຍາກເກີນໄປ, ຈະຊ່ວຍໃຫ້ຊີວິດມີເປົ້າໝາຍດີໆເພີ່ມຂຶ້ນອີກໜຶ່ງຢ່າງ ແຕ່ຫລາຍຄົນອາດຈະຄິດບໍ່ອອກວ່າຕ້ອງເລີ່ມຈາກສິ່ງໃດ ຫລື ປ່ຽນຫຍັງດີ? ພວກເຮົາຈຶ່ງຢາກຊວນຄົນອ່ານມາປ່ຽນແປງບາງຢ່າງທີ່ເຮັດໄດ້ແທ້ໃນຊີວິດປະຈໍາວັນ (ຖ້າຕັ້ງໃຈ), ສິ່ງທໍາອິດທີ່ພວກເຮົາຊວນທ່ານເຮັດແມ່ນການຫລຸດຫວານ ຫລີກລ່ຽງການບໍລິໂພກນໍ້າຕານເພື່ອສຸຂະພາບທີ່ດີກວ່າເກົ່າ,​ ເຖິງແມ່ນວ່ານໍ້າຕານຈະໃຫ້ພະລັງງານໄດ້ດີ ແຕ່ນອກຈາກນັ້ນກໍບໍ່ມີສານອາຫານອື່ນທີ່ເປັນປະໂຫຍດຕໍ່ຮ່າງກາຍ. ດັ່ງນັ້ນ ໃຜທີ່ມັກກິນຫວານ ແຕ່ບໍ່ມັກອອກກໍາລັງກາຍ ກໍເທົ່າກັບໄດ້ຮັບພະລັງງານແຕ່ບໍມີການເຜົາຜານອອກໄປ ເຮັດໃຫ້ເປັນສາເຫດຂອງພະຍາດອ້ວນ, ເບົາຫວານ ແລະ ບັນຫາສຸຂະພາບອື່ນໆຕາມມາ. ດັ່ງນັ້ນ ມາເລີ່ມເຝິກຕັ້ງແຕ່ມື້ນີ້ເພື່ອສຸຂະພາບທີ່ດີໃນໄລຍະຍາວ.